ފުލުހަކަށް މަގުމަތިން ބަޔަކު ބިރުދައްކައި ބްލެކްމެއިލްކުރި ކަމަށް ބުނާ މައްސަލައެއް ބަލަމުން އަންނަ ކަމަށް ފުލުހުން ބުނެފި އެވެ.

މީޑިއާތަކަށް ފުލުހުން ފޮނުވި މެސެޖެއްގައި ބުނީ ފުލުހަކަށް މަގުމަތިން ބިރުދެއްކި ކަމަށް ބުނާ މައްސަލައެއް އެ މުއައްސަސާއިން ބަލަމުން އަންނަ ކަމަށެވެ. ނަމަވެސް މިހައިތަނަށް އެ މައްސަލައާ ނުރައްކާތެރި ގުރޫޕަކާ ގުޅުމެއް އޮތްކަން ފާހަގަވެފައި ނުވާ ކަމަށް ފުލުހުން ބުންޏެވެ.

ފުލުހަކަށް މަގުމަތިން ބިރުދެއްކި ވާހަކަ ފުރަތަމަ ފެންމަތިވީ ސޯޝަލް މީޑިއާ ޕްލެޓުފޯމު، އެކްސްގަ އެވެ.

އެކްސްގައި "ދޮންއަމާ" ގެ ނަމުގައި ހިންގާ އެކައުންޓަކުން ކުރި ޕޯސްޓެއްގައި ބުނެފައި ވަނީ ހުޅުމާލޭގައި ފޮރެންސިކް ފުލުހެއްގެ ދަރިފުޅާއި އަނބިމީހާއަށް ފުރައްސާރަ ކުރުމަށްފަހު ފުލުސް މީހާއަށް ބިރު ދައްކައި ގޭންގަކުން އިންޒާރު ދީފައިވާ ކަމަށެވެ.

އަދި އެކަން ކުރި މީހުންގެ މަސްތުވާތެކެތީގެ މައްސަލައެއްގެ ޝަރީއަތް ކޯޓުގައި ހިނގަމުންދާ ކަމަށް ވެސް އެ ޕޯސްޓުގައި ބުނެފައިވެ އެވެ.

ފުލުހަކަށް މަގުމަތިން ބިރުދެއްކި މައްސަލައެއް ފެންމަތިވެފައިވާއިރު، މި ފަހަކަށް އައިސް ފުލުހުންނަށް ހަމަލާ ދިނުމާއި ބިރުދެއްކުން ފަދަ ކަންކަން ދަނީ އިތުރުވަމުންނެވެ.

އެގޮތުން މީގެ ހަފުތާއެއްހައި ދުވަސް ކުރިން ފުވައްމުލަކުގައި ފުލުހުން ހިންގި މަސްތުވާތަކެތީގެ އޮޕަރޭޝަކަށް ވެސް ބަޔަކު ހުރަސް އަޅައި ފުލުހަކަށް ހަމަލާ ދީފައިވެ އެވެ.

އޭގެއިތުރުން މީގެ ދެ މަސް ކުރިން މާލޭގައި ވެސް ފުލުހަކަށް ވަޅިން ބިރު ދެއްކި މައްސަލައެއް ފުލުހުން ބަލާފައިވެ އެވެ.