ބާލިން (ޖުލައި 6) - ޔޫރޯ ފުޓްބޯޅަ މުބާރާތުގެ ކުއާޓާ ފައިނަލުގައި ތުރުކީއާ ދެކޮޅަށް ނެދަލެންޑްސް އިން ކުޅޭ މެޗުގައި، ނެދަލެންޑްސްގެ ކޯޗު ރޮނާލްޑް ކޫމަން ބޭނުންވާ އެއް ކަމަކީ، ދަނޑު ތެރޭގައި ޓީމަށް ހިތްވަރުދީ ފޯރި ނެގުމަށް ތުރުކީގެ ސަޕޯޓަރުން ކުރިއަށްގެންދާ އުފާފާޅުކުރުމުގެ ޕާޓީގެ އަޑުކަނޑުވާލުން ކަމަށް ބުނެފި އެވެ.

"ތުރުކީ ޓީމުތަކާ ދެކޮޅަށް އަހަރެންގެ ތަޖުރިބާތަކެއް އެބަހުރި، އެ މީހުން ކުޅޭއިރު މާހައުލު އަބަދުވެސް އޮންނާނީ ޓީމާ އެކު، އެކަން އެބަޖެހޭ މި މެޗުގައި ބަދަލުވާން، ތުރުކީގެ ސަޕޯޓަރުންގެ އަޑު މަޑުކޮށް ނެދަލެންޑްސްގެ ހިތްވަރު ގަދަވާ ގޮތަށް ކަންކަން ވާން އެބަޖެހޭ،" ތުރުކީ މެޗުގެ ކުރިން ކޫމަން، ނޫސްވެރިންގެ ބައްދަލުވުމުގައި ބުންޏެވެ.

"އަހަރެމެން އަތުގައި ބޯޅަ ގިނަ ވަގުތު ބާއްވައިގެން، އަހަރެމެންގެ ގޭމް ކުޅެންވީ، ބިޒްނަސް ކަހަލަ ވިސްނުމެއްގައި، އޭރުން އެ މީހުން (ތުރުކީ ސަޕޯޓަރުން)ގެ އަޑު މަޑުވާނެ،"

ތުރުކީ ދަރިކޮޅަށް ނިސްބަތްވާ ގިނަ އަދަދެއްގެ ބަޔަކު ޖަރުމަނުގައި ދިރިއުޅޭތީ، އެ ގައުމުގެ ގިނަ ސަޕޯޓަރުން މެޗު ބަަލަން ވަދެ އެވެ. އަދި މިރޭގެ މެޗު އޮތީ ޖަރުމަނުގެ ބާލިން އޮލިމްޕިކް ސްޓޭޑިއަމްގައި ކަމަށްވާއިރު، އެ ދަނޑަށް ވަދެވޭ ސަޕޯޓަރުންގެ ނިސްބަތް ވެސް އިތުރެވެ.

ނެދަލެންޑްސް އަށް 1988 ވަަނަ އަހަރުގެ ޔޫރޯ ކާމިޔާބު ކޮށްދިން ކެޕްޓަން، ކޫމަން ބުނީ، މި ފަަހަރުގެ މުބާރާތް ދަށްކޮށް އެ ޓީމުން ފެށި ކަމުގައި ވިޔަސް މަޑުމަޑުން ކުރިއަރައިގެން ގޮސް، ގަދަ 16 ބުރުގައި 3-0 އިން ރުމޭނިއާ ބަލިކުރި މެޗުގައި އޭނާ ބޭނުންވާ ލެވަލަށް ޓީމު ހިއްލައިލެވިއްޖެ ކަމަށެވެ.

ތުރުކީން ގަދަ 16 ބުރުގައި އޮސްޓްރިއާ ކަޓުވާލުމަކީ، ނެދަލެންޑްސް އިން ވިސްނަން ޖެހޭ ކަމެއްގެ ގޮތުގައި ކޫމަން ނުދެކެ އެވެ. އެއީ ގްރޫޕް ސްޓޭޖުގައި، ނެދަލެންޑްސް އަތުން 3-2 އިން މޮޅުވި އޮސްޓްރިއާގެ ކުޅުމާއި، ގަދަ 16 ބުރުގައި ތުރުކީން 2-1 އިން ބަލިކުރި އޮސްޓްރިއާގެ ކުޅުން ތަފާތު ކަމަށް ކޫމަން ވަނީ ބުނެފަ އެވެ.

"އެހެންވީމަ މީގަ އަހަރެމެން ވިސްނަންވީ، އޮސްޓްރިއާ މެޗުގައި އަހަރެމެން ދެއްކި އާދައިގެ ކުޅުން ތަކުރާރުނުކޮށް، ރުމޭނިއާ މެޗުގައި އެ ހުރި ލެވަލް އަދި ވެސް ރަނގަޅުކުރުން،" ކޫމަން ބުންޏެވެ.

ތުރުކީ އާއި ނެދަލެންޑްސް އެންމެ ފަހުން ބައްދަލުކޮށްފައިވަނީ، 2022 ވަނަ އަހަރުގެ ވޯލްޑް ކަޕް ކޮލިފައިންގަ އެވެ. އެ ގޮތުން، 2021 ވަނަ އަހަރު މާޗް މަހު ތުރުކީން 4-2 އިން މޮޅުވިއިރު، ސެޕްޓެމްބަރު މަހު، ނެދަލެންޑްސް މޮޅުވީ 6-1 އިންނެވެ.

ސޯޅަ އަހަރަށް ފަހު ނެދަލެންޑްސް އާއި ތުރުކީން ޔޫރޯގެ ކުއާޓާ ފައިނަލަށް ދަތުރުކުރިއިރު، މި ދެ ޓީމު ކުޅޭ މެޗު ފަށާނީ މިރޭ 12 ޖަހާއިރު އެވެ.