ޑަސެލްޑޯފް (ޖުލައި 6) - ޔޫރޯ ފުޓްބޯޅަ މުބާރާތުގެ ކުއާޓާ ފައިނަލުގައި މިރޭ އިންގްލެންޑާ ދެކޮޅަށް ކުޅޭއިރު، އެ ޓީމުން ހަމަޖެހިލައިގެން ކުޅެން ފުރުސަތުނުދީ ސްވިޒަލެންޑުން ވެސް ޕްލޭނަކާ އެކު ނުކުމެ މޮޅުވާން ކުރެވެން ހުރި ހުރިހާ ކަމެއް ކުރާނެ ކަމަށް ސްވިޒަލެންޑްގެ ކޯޗު މުރާތުު ޔަކިން ބުނެފި އެވެ.

މިއީ ބައިނަލްއަގުވާމީ ބޮޑު މުބާރާތެއްގައި އިންގްލެންޑާއި ސްވިޒަލެންޑްގެ ހަތަރު ވަނަ ކުރިމަތިލުމެވެ. އިންގްލެންޑް އަދި މުބާރާތެއްގައި ސްވިޒަލެންޑް އަތުން ބަލިނުވެ އެވެ. އެ ގޮތުން، މީގެ ކުރިން، ކުޅުނު މެޗުތަކަށް ބަލާއިރު، 1954 ވަނަ އަހަރުގެ ވޯލްޑް ކަޕްގައި އިންގްލެންޑުން 2-0 އިން މޮޅުވިއިރު، 2004 ވަނަ އަހަރުގެ ޔޫރޯގައި އިންގްލެންޑް މޮޅުވީ 3-0 އިންނެވެ. އަދި 1996 ވަނަ އަހަރުގެ ޔޫރޯގައި 1-1 އިން އެއްވަރުވި އެވެ.

ސްވިޒަލެންޑަށް މީގެ ކުރިން މުބާރާތެއްގައި، އިންގްލެންޑް ބަލިކުރެވިފައި ނުވުން އެއީ މާ ބޮޑު ކަމެއްގެ ގޮތުގައި، ސްވިޒަލެންޑް ކޯޗު، ޔަކިން ނުދެކެ އެވެ. އޭނާ ބުނީ މި ވަގުތުގެ ހާލަތަށް ބަލައިގެން ކަންކަން ކުރަން އުޅެފިނަމަ ސްވިޒަލެންޑަށް ހާސިލްކުރެވޭނެ ކަންތައް ގިނަ ކަމަށެވެ.

މެޗުގެ ކުރިން ދެ ޓީމުގެ ސްކޮޑަށް ބަލާފައި ފޭވަރިޓުން ނަގާނަމަ، ގިނަ ބަޔަކު ބުރަވާނީ އިންގްލެންޑަށް ކަމަށް ޔަކިން ވެސް ގަބޫލުކުރެ އެވެ. އެކަމަކު، މި ފަހަރުގެ މުބާރާތުގައި ސްވިޒަލެންޑުން ގްރޫޕް ސްޓޭޖުގައި ޖަރުމަނާ ދެކޮޅަށް ދެއްކި ކުުޅުމާއި ގަދަ 16 ބުރުގައި އިޓަލީ ކަޓުވާލިއިރު، ކުރި ހިތްވަރު ފެންނަން އޮތްއިރު، އިންގްލެންޑާ ދެކޮޅަށް ވެސް އެކަން ކުރެވިދާނެ ކަމަށް ޔަކީން ވަނީ ބުނެފަ އެެވެ.

"އިންގްލެންޑަށް ދިމާވި މައްސަލަ އަކީ އިދިކޮޅަށް ނުކުތް ޓީމުތައް ޑިފެންސިވްލީ ކުޅުން. އަހަރެމެންނަކީ އެ ގޮތަށް ކުޅޭނެ ބައެއް ނޫން، އަހަރެމެން ފުޓްބޯޅަ ކުޅެގެން ކާމިޔާބު ހޯދަން މި އަރަނީ،" ޔަކިން ބުންޏެވެ.

"އިންގްލެންޑް ވަރުގަދަ ކަންކަމާއި ބަލިފައި އަހަރެމެންނަށް އެނގޭ. އަހަރެމެންނަށް ތިން ދުވަސް ލިބުނު މި މެޗަށް ތައްޔާރުވާން. އެހެންވީމަ، އަހަރެމެންގެ އެންމެ ވަރުގަދަ ކަންކަން ދައްކާލެވޭނެ. ފޯކަސް އަކީ އަހަރެމެންގެ ޓީމު، އަހަރެމެންނަށް ކުރެވޭނެ ކަންތައްތައް،"

އިންގްލެންޑާ ދެކޮޅަށް ޗެލެންޖިން މެޗަކަށް ސްވިޒަލެންޑް ތައްޔާރުވަނީ، "މި ފައިޓް" ކާމިޔާބުކުރަން ހުރިހާ ގަޑިއެއްގައި ވެސް ސަމާލުވެގެން މަސައްކަތްކުރުމުގެ ވިސްނުމުގައި ކަމަށް ޔަކިން ވަނީ ބުނެފަ އެވެ.

ސްވިޒަލެންޑުން ހަމައެކަނި ވިސްނަނީ އިންގްލެންޑްގެ ޖޫޑް ބެލިންހަމް އަށް ކަމަށްވެއްޖެނަމަ، އޭގެ ފައިދާނަގައި، މެޗުގެ ނަތީޖާ ނެރެވޭނެ އިންގްލެންްޑްގެ އެހެން ކުޅުންތެރިން ތިބޭނެ ކަމަށާއި އޭގެ ބަދަލުގައި، ސްވިޒަލެންޑުން ނުކުންނާނީ އިންގްލެންޑްގެ މުޅި ޓީމު ހުއްޓުވުމަށް ކަމަށް ޔަކިން ބުންޏެވެ.

މި ފަހަރުގެ ޔޫރޯގައި ސްވިޒަލެންޑުން ޖެހި ހަތް ގޯލު ކާމިޔާބުކުރީ މުޅިން ތަފާތު ކުޅުންތެރިންނެވެ. ޔަކީން ބުނީ ގޯލު ޖަހަން ބަރޯސާވެވޭނެ ކުޅުންތެރިން ގިނަ ވުމަކީ މުބާރާތެއްގައި އެޑްވާންޓޭޖެއްގެ ގޮތުގައި ނެގޭނެ ކަމެއް ކަމަށެވެ.

އިންގްލެންޑާއި ސްވިޒަލެންޑް ކުޅޭ މެޗު ފަށާނީ މިރޭ 9 ޖަހާއިރު އެވެ.