ހެމްބާގް (ޖުލައި 6) - ޕެނަލްޓީ ޖަހައިގެން 3-5 އިން ޕޯޗުގަލް ބަލިކޮށް އެ ޓީމު ކަޓުވާލުމަށް ފަހު، ފްރާންސް އިން މި ފަހަރުގެ ޔޫރޯ ފުޓްބޯޅަ މުބާރާތުގެ ސެމީ ފައިނަލުން ފުރުސަތު ހޯދައިފި އެވެ.

ސެމީގައި ފްރާންސް ކުޅޭނީ ސްޕެއިނާ ދެކޮޅަށެވެ. ސްޕެއިން ސެމީ އަށް ދިޔައީ ޖަރުމަނު ކަޓުވާލައިފަ އެވެ.

ވޯލްކްސްޕާކް ސްޓޭޑިއަމް ހެމްބާގްގައި މިރޭ ކުޅުނު މެޗު ފަށައިގެން ދެ ޓީމުގެ ފަރާތުން ފެނިގެންދިޔައީ، އަވަސް އެޓޭކްތަކެއް ކުރަން މަސައްކަތްކޮށް އޭރިއާބޭރުން ޝޮޓެއް ފޮނުވާލައިގެން ގޯލެއް ޖެހޭތޯ ބެލި ތަނެވެ. އެ ގޮތުން، ޕޯޗުގަލްގެ މިޑްފީލްޑަރު، ބްރޫނޯ ފެނާންޑޭސް ޖެހި ޝޮޓެއް ދަނޑިކައިރިން ދިޔައިރު، ފްރާންސްގެ ފުލްބެކް، ތެއޯ ހެނާންޑޭޒް ޖެހި ޝޮޓް، ޕޯޗުގަލްގެ ކީޕަރު، ޑިއޯގޯ ކޮސްޓާ ވަނީ މަތަކޮށްފަ އެވެ.

ޕޯޗުގަލްގެ ކެޕްޓަން، ކްރިސްޓިއާނޯ ރޮނާލްޑޯ އަށް ޖާގައެއް ނުދީ ފްރާންސްގެ ޑިފެންސްލައިން ބެލެހެއްޓުމުގައި ވިލިއަމް ސަލީބާ ވަނީ މޮޅު ކުޅުމެއް ދައްކައިފަ އެވެ.

ފްރާންސްގެ ކަމަވިންގާ (ކ) އާއި ސަލީބާ (ވ) ކައިރިން ރޮނާލްޑޯ ބޯޅަ ހިފައިގެންދަނީ.

ފްރާންސްގެ ކެޕްޓަން، ކީލިއަން އެމްބާޕޭ، އެޓޭކުގައި ބޯޅަ ހިފަަހައްޓައިގެން ކުޅެ، ހަމަލާއެއް ފޮނުވާލެވޭތޯ ފުރަތަމަ ހާފުގައި ކުރި މަސައްކަތުގައި ރަނގަޅު އެއް ހުރަސް ގޯލު ކުރިމައްޗަށް ނެގި ނަމަވެސް ކީޕަރު ކޮސްޓާ ވަނީ އެ ބޯޅަ ސަލާމަތްކޮށްފަ އެވެ.

ދެ ވަނަ ހާފުގައި ޕޯޗުގަލަށް ލީޑުނަގައިދޭން އޭރިއާތެރެއަށް އަރައި، ވިޓީނިއާ ޖެހި ޝޮޓް ފްރާންސްގެ ކީޕަރު މައިކް މައިންގްނޯން މަތަކުރިއިރު، ރީބައުންސް ބޯޅަ ބެކްހީލަކުން ގޯލަށް ވައްދާލަން ރޮނާލްޑޯ ކުރި މަސައްކަތް ވީ ނާކާމިޔާބެވެ.

އޭގެ ފަހުން، މެޗުގެ 65 ވަނަ މިނިޓްގައި، ފްރާންސްގެ ފޯވާޑް، ރަންޑަލް ކޯލޯ މުއާނީ، ޕޯޗުގަލްގެ އޭރިއާތެރެއަށް ވަދެ ޖެހި ޝޮޓް، އެ ޓީމުގެ ޑިފެންޑަރު، ރުބެން ޑިއާޒް ވަނީ ބްލޮކްކޮށްފަ އެވެ. އޭގެ ހަަަތަރު މިނިޓް ފަހުން، ފްރާންސްގެ އެޑޮއާޑް ކަމަަވިންގާ އަށް އޭރިއާތެރެއިން މުޅިން ހުސްކޮށް ލިބުނު ފުރުސަތުގައި ޖެހި ޝޮޓް ދިޔައީ ބޭރުންނެވެ.

މެޗުގެ ފުރިހަމަ ވަގުތު ހަމަވިއިރު ދެ ޓީމު ލަނޑެއް ނުޖެހި އެއްވަރުވުމުން ނަތީޖާ ނެރެން އިތުރު ވަގުތުގެ ދެ ހާފް ކުޅުނެވެ. އިތުރު ވަގުތުގެ ދެ ހާފުގައި ދެ ޓީމަށް ވެސް ލަނޑު ޖަހާނެ ފުރުސަތު ލިބި ބޭނުމެއް ނުކުރެވުނެވެ. ފްރާންސް އޭރިއާތެރެއިން ލިބުނު ފުރުސަތުތަކަކުން، ރޮނާލްޑޯ ޖެހި ޝޮޓެއް ހުރަސްދަނޑިމަތިން ދިޔައިރު، ރަފައެލް ލެއާއޯ ޖެހި ބޯޅަ ފްރާންސްގެ ޑިފެންޑަރު، ޑަޔޫޓް އުޕަމެކާނޯ ވަނީ ބްލޮކްކޮށްފަ އެެވެ. އަދި އިތުރު ވަގުތުގެ ދެ ވަނަ ހާފުގެ ފަހު މިނިޓްގައި، ނޫނޯ މެންޑޭޒް ޖެހި ބޯޅައެއް އަމާޒުވީ ކީޕަރު މައިންގްނޯން އަތަށެވެ.

ފްރާންސްގެ ފޯވާޑް އެމްބާޕޭ: މި ފަހަރުގެ ޔޫރޯގައި އުންމީދުކުރި ލެވަލްގެ ކުޅުމެއް ނުދައްކާ

ފްރާންސަށް އިތުރު ވަގުތުގެ ދެ ހާފުގައި އެންމެ ރަނގަޅަށް ކުޅުނީ އޮސްމާން ޑެމްބެލޭ އެވެ. އޭނާގެ ރަނގަޅު ކުޅުމަށް ފަހު، އެމްބާޕޭ އަށް ލިބުނު ފުރުސަތުގައި އޭނާ ޖެހި ޝޮޓް، ޕޯޗުގަލްގެ 41 އަހަރުގެ ޑިފެންޑަރު، ޕެޕޭ ބްލޮކްކުރި އެެވެ. އެމްބާޕޭ ވަނީ އިތުރު ވަގުތުގެ ދެ ވަނަ ހާފުގައި ބަދަލުކޮށްފަ އެވެ.

ގަދަ 16 ބުރުގައި ސްލޮވީނިއާއާ ދެކޮޅަށް ޕެނަލްޓީގައި ނަތީޖާ ނެރެން ޖެހުނު، ޕޯޗުގަލް އިން ކުއާޓާ ފައިނަލުގައި ވެސް ނަތީޖާ ނެރެން ޖެހުނީ ޕެނަލްޓީގަ އެވެ.

ޕެނަލްޓީގައި ފުރަތަމަ ފްރާންސްގެ ޑެމްބެލޭ ޖެހި ބޯޅަ ގޯލަށް ވައްދާލި އެވެ. ޕޯޗުގަލްގެ ފުރަތަމަ ޕެނަލްޓީ ރޮނާލްޑޯ ވަނީ ކާމިޔާބުކޮށްފަ އެވެ. ފްރާންސްގެ ދެ ވަނަ ޕެނަލްޓީ ފޮނުވާލި ޔޫސުފް ފޮފާނާ ވެސް ކާމިޔާބުކުރިއިރު، ޕޯޗުގަލްގެ ދެ ވަނަ ޕެނަލްޓީ ޖަހަންދިޔަ، ބެނާޑޯ ސިލްވާ ވަނީ ގޯލަށް ވައްދާލައިފަ އެވެ. ފްރާންސްގެ ތިން ވަނަ ޕެނަލްޓީ ޖެހި، ޖޫލްސް ކޫންޑޭ ފޮނުވާލި ޕެނަލްޓީ އަމާޒުވީ ގޯލުގެ ކަނަށެވެ. ޖޮއާއޯ ފެލިކްސް ޖެހި ޕޯޗުގަލްގެ ތިން ވަނަ ޕެނަލްޓީ އަމާޒުވީ ދަނޑިއަށެވެ. ފްރާންސަށް ޕެނަލްޓީގައި ލީޑުނަގައިދެން ދިޔަ، ބްރެޑްލީ ބަކޯލާ އެ ޓީމުގެ ހަތަރު ވަނަ ޕެނަލްޓީ ކާމިޔާބުކުރި އެވެ. ޕޯޗުގަލްގެ ހަތަރު ވަނަ ޕެނަލްޓީ ޖެހި، ނޫނޯ މެންޑޭޒް ބޯޅަ އަމާޒުކޮށްލީ މަތީ ކަނަށެވެ. ފްރާންސް މޮޅުވި އެ ޓީމުގެ ފަސް ވަނަ ޕެނަލްޓީ ތެއޯ ހެނާންޑޭޒް ވަނީ ގޯލަށް ވައްދާލައިފަ އެވެ.

މި ނަތީޖާއާ އެކު ޔޫރޯ ފުޓްބޯޅަ މުބާރާތުގައި 39 އަހަރުގެ ރޮނާލްޑޯގެ ކެރިއަރު ނިމުނީ އެވެ. ރޮނާލްޑޯ ވަނީ 2004 އާއި 2016 ވަނަ އަހަރު ޔޫރޯގެ ފައިނަލުގައި ކުޅެފަ އެވެ. އެ ގޮތުން، 2004 ވަނަ އަހަރުގެ ފައިނަލުގައި ގްރީސް އަތުން ބަލިވި ނަމަވެސް، 2016 ވަނަ އަހަރުގެ ފައިނަލުގައި ފްރާންސް ބަލިކޮށް ތަށި ހޯދި އެވެ. އެހެން ނަމަވެސް މި ފަހަރުގެ ޔޫރޯގައި، ފްރާންސް އަތުން ބަލިވެ، ކުއާޓާ ފައިނަލުން ކެޓީ އެވެ.