ޓެކްސަސް (ޖުލައި 5) - ކޮޕަ އެމެރިކާ ފުޓުބޯޅަ މުބާރާތުގެ ކުއާޓާ ފައިނަލުގައި އެކުއެޑޯގެ މައްޗަށް ޕެނަލްޓީގައި 4-2 ގެ ނަތީޖާ އަކުން ކުރިހޯދައި އާޖެންޓީނާ ސެމީ ފައިނަލަށް ދަތުރުކޮށްފި އެވެ.

މި މެޗުގެ ފުރިހަމަ ވަގުތު ހަމަވީ 1-1 ގެ ނަތީޖާ އަކުން އެއްވަރުވެގެންނެވެ.

މި މެޗުގެ 36 ވަނަ މިނެޓުގައި އާޖެންޓީނާ އިން ވަނީ ގޯލު ޖަހާ ލީޑު ނަގައިފަ އެވެ. ކޯނަރެއްގެ ބޭނުން ހިފައި އާޖެންޓީނާ އަށް މި ގޯލު ކާމިޔާބު ކޮށްދިނީ ޑިފެންޑަރު ލިސާންޑްރޯ މާޓިނޭޒް އެވެ. އޭގެ ފަހުން މެޗުގެ 40 ވަނަ މިނެޓުގައި އެކުއެޑޯ ކުޅުންތެރިން އަށް ހެދުނު ގޯހެއްގެ ފައިދާ ނަގާ އެންޒޯ ފެނާންޑޭޒް އަށް ލީޑު ފުޅާ ކުރަން ފުރުސަތު ލިބުނެވެ. އެކަމަކު، އެންޒޯ ނަގާދިން ހުރަސް އާޖެންޓީނާ ކުޅުންތެރިއަކަށް ނުލިބި ދިޔައީ ބޭރަށެވެ.

ދެ ވަނަ ހާފު ފަށައިގެން އެކުއެޑޯ އިން މެޗުގެ ކޮންޓްރޯލް ނަގައިގެން އާޖެންޓީނާގެ ގޯލަށް ނުރައްކާ ކުރެވޭތޯ ބެލި އެވެ. މެޗުގެ 60 ވަނަ މިނެޓުގައި އާޖެންޓީނާގެ ރޮޑްރީގޯ ޑެ ޕޯލް އަތުގައި އޭރިއާ ތެރެއިން ބޯޅަ ޖެހުމާއެކު, ރެފުރީ ވަނީ އެކުއެޑޯ އަށް ޕެނަލްޓީ އެއް ދީފަ އެވެ. އެކަމަކު، އެކުއެޑޯގެ ކެޕްޓަން އެނާ ވެލެންސިއާ ފޮނުވާލި ޕެނަލްޓީ އަމާޒުވީ ގޯލުގެ އަރިމަތީ ދަނޑި އަށެވެ.

އޭގެ ފަހުން މެޗުގެ 67 ވަނަ މިނެޓުގައި އާޖެންޓީނާގެ ތަރި ލިއޮނަލް މެސީ އަށް ވަނީ ގޯލު ޖަހަން ހުސްފުރުސަތެއް ލިބިފަ އެވެ. ޑެ ޕޯލް އޭރިއާ ތެރެއަށް ނަގާދިން ބޯޅަ އެއް މުޅިން ހުސްކޮށް ހުރެ މެސީ ފޮނުވާލި ނަމަވެސް އުނދަގުލަކާ ނުލާ އެކުއެޑޯގެ ކީޕަރު އެލެކްސެންޑާ ޑޮމިންގޭޒް ވަނީ ދިފާއު ކޮށްފަ އެވެ.

މެޗު ނިމެން މިނެޓަކަށްވެފައި ވަނިކޮށް އެކުއެޑޯގެ މޮސަސް ކައެސޭޑޯ އަށް ވަނީ ގޯލު ޖަހަން ރަނގަޅު ފުރުސަތެއް ލިބި ބޭކާރުވެފަ އެވެ. އޭރިއާ ތެރެއިން ކައެސޭޑޯ ފޮނުވާލި ހަމަލާ ދިޔައީ ގޯލާ އަމާޒުނުވެ ބޭރަށެވެ.

މެޗުގެ އިތުރު ވަގުތުގެ ތިން ވަނަ މިނެޓުގައި އެކުއެޑޯ އަށް ގޯލު ޖަހާދީ ނަތީޖާ ހަމަހަމަ ކޮށްދިނީ ކެވިން ރޮޑްރިގޭޒް އެވެ. މިއީ, ޖޯން ޔަބޯވާ ނަގާދިން ހުރަސް ބޮލުން ގޯލުގެ ތިރީ ކަނަށް އަމާޒުކޮށްލައިގެން ރޮޑްރިގޭޒް ޖެހި ގޯލެކެވެ. މި ގޯލާއެކު އާޖެންޓީނާ ކުޅުންތެރިން ވަނީ ވަރަށް ބޮޑަށް މިއީ އޮފްސައިޑް ގޯލެއް ކަމަށް އެޕީލް ކޮށްފަ އެވެ. އެކަމަކު، ވީޑިއޯ އެސިސްޓެންޓް ރެފުރީ (ވީއޭއާރް) ބެލުމަށްފަހު ރެފުރީ ނިންމީ މިއީ ގޯލެއް ކަމަށެވެ.

މި ލަނޑަށް ފަހު ވެސް އެކުއެޑޯ އަށް ގޯލު ޖަހަން ރަނގަޅު ފުރުސަތެއް ލިބި ބޭކާރުވި އެވެ. އޭރިއާ ތެރެއިން ކައެސޭޑޯ ބޮލުން ފޮނުވާލި ހަމަލާ ދިޔައީ އަރިމަތީ ދަނޑިކައިރިން ބޭރަށެވެ.

މެޗުގެ ފުރިހަމަ ވަގުތު ހަމަވިއިރު, ނަތީޖާ ހަމަހަމަ ވެފައި އޮތުމުން ނަތީޖާ ނެރުނީ ޕެނަލްޓީ ޖަހައިގެންނެވެ. މި ފަހަރުގެ ކޮޕަ އެމެރިކާގެ ކުއާޓާ ފައިނަލާއި ސެމީ ފައިނަލްގައި 90 މިނިޓް ހަމަވާއިރު، އެއްވަރުވެފައި އޮވެއްޖެނަމަ ނަތީޖާ ނެރޭނީ ޕެނަލްޓީ ޖަހައިގެންނެވެ.

ޕެނަލްޓީގައި އާޖެންޓީނާ އިން ޖެހި ފުރަތަމަ ޕެނަލްޓީ މެސީ ފޮނުވާލި ނަމަވެސް ޕެނަލްޓީ އަމާޒުވީ ގޯލުގެ ހުރަސް ދަނޑި އަށެވެ. މިއީ މެސީ ފޮނުވާލި ޕެނަންކާ ޕެނަލްޓީ އެކެވެ އެކުއެޑޯ ގެ ފުރަތަމަ ޕެނަލްޓީ އެންހެލް މޭނާ ފޮނުވާލިއިރު, މި ޕެނަލްޓީ އާޖެންޓީނާގެ ކީޕަރު މާޓިނޭޒް ވަނީ ދިފާއު ކޮށްފަ އެވެ. އަދި އެކުއެޑޯގެ އަލަން މިންޑާ ފޮނުވާލި ޕެނަލްޓީ ވެސް މާޓިނޭޒް ވަނީ ދިފާއު ކޮށްފަ އެވެ.

އެކުއެޑޯ އިން ޕެނަލްޓީ ކާމިޔާބުކުރީ ކައެސޭޑޯ އާއި ޔެބޯއާ އެވެ. އާޖެންޓީނާ އިން އަލްވަރޭޒް، މޮންޓިއެލް، މެކް އަލިސްޓާ އަދި އޮޓަމެންޑީ ވަނީ ޕެނަލްޓީ ކާމިޔާބުކޮށްފަ އެވެ.

އެންމެ ފަހުގެ ޗެމްޕިއަން، އާޖެންޓީނާ އިން ސެމީގައި ކުޅޭނީ ކެނަޑާ އާއި ވެނެޒުއޭލާ ކުޅެގެން މޮޅުވާ ޓީމަކާ އެވެ.