ފުޅާ ދާއިރާއެއްގައި ހަށި ވިއްކަމުންދިޔަ ކަމަށް ތުހުމަތުކުރެވޭ ބިދޭސީ ދެ އަންހެނަކު އިމިގްރޭޝަންގެ ބެލުމުގެ ދަށަށް ގެންގޮސްފި އެވެ.

އެ ދެ މީހުން ހައްޔަރުކުރީ ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން ރޭ އިމިގްރޭޝަންގެ ޓާސްކްފޯސްއިން ހިންގި ހާއްސަ އޮޕަރޭޝަނެއްގަ އެވެ.

އިމިގްރޭޝަނުން ބުނީ ބެލުމުގެ ދަށަށް ގެންދިޔައީ ވިއެޓްނާމަށް ނިސްބަތްވާ ދެ އަންހެނުން ކަމަށެވެ. ނަމަވެސް މިކަމާ ގުޅޭ އިތުރު ތަފްސީލެއް ހާމައެއް ނުކުރެ އެވެ.

ރާއްޖޭގައި ގަވައިދާ ހިލާފަށް އުޅޭ، ވިޔަފާރިކުރާ އަދި ގާނޫނާ ހިލާފު ކަންކަން ކުރާ ބިދޭސީން ދެނެގަނެ، އެ ބިދޭސީން ފޮނުވާލުމުގެ މަސައްކަތް ފުލުހުންނާއި އިމިގްރޭޝަން އަންނަނީ ކުރަމުންނެވެ.

އެގޮތުން މާލޭގައި ވިޔަފާރިކުރާ 50 އެއްހާ ބިދޭސީން މިވަގުތު ވެސް އިމިގްރޭޝަންގެ ބެލުމުގެ ދަށަށް ގެންގޮސްފައިވާއިރު، ގަވައިދާ ހިލާފަށް ކަޅު ބާޒާރުގައި ޑޮލަރުގެ ވިޔަފާރިކުރާ ބިދޭސީން ޑީޕޯޓުކޮށް ދަނީ އަތުލައިގަންނަމުންނެވެ.