ޔޫރޯ ފުޓްބޯޅަ މުބާރާތުގެ ގަދަ 16 ޓީމު ވާދަކުރާ ބުރުގައި ރޭ ކުޅުނު މެޗުގެ ފަހުސިކުންތު ކޮޅުގެ ތެރޭގައި އޮސްޓްރިއާގެ ބޯމްގާޓްނާ ބޮލުން ޖެހި ބޯޅަ، ތުުރުކީގެ ކީޕަރު، މާޓް ގުނޮކް މަތަކުރިއިރު، އެ ސޭވްއާ އެކު، 1970 ވަނަ އަހަރުގެ ވޯލްޑް ކަޕްގައި އިންގްލެންޑްގެ ބޭންކްސް ކުރި ސޭވް މަތިން ގިނަ ބަޔަކު ހަނދާން އާ ކޮށްފި އެވެ.

ތުރުކިން 2-1 އިން ކުރީގައި އޮއްވައި، ރޭގެ މެޗުގެ އިތުރު ވަގުތުގެ ގޮތުގައި ދެއްކި ހަތަރު މިނިޓްގެ ތެރެއިން ފަހު ވަގުތު ކޮޅު، އޮސްޓްރިއާގެ ބޯމްގާޓްނާ އޭރިއާތެރެއިން ބޮލުން ޖެހި ބޯޅަ ކީޕަރު ގުނޮކް ވަނީ މަތަކޮށްފަ އެވެ.

ތުރުކީ އަށް މެޗުގައި ޖަހައިދިން ދެ ގޯލު ކާމިޔާބުކުރި ޑިފެންޑަރު މެރިހް ޑެމިރާލް ވަނީ، މެޗުގެ މޮޅު ކުޅުންތެރިއަކީ އޭނާގެ ނަޒަރުގައި ގުނޮކް ކަމަށް ބުނެފަ އެވެ.

އޮސްޓްރިއާގެ ބޯމްގާޓްނާ ބޮލުން ޖެހި ބޯޅަ ކީޕަރު ގުނޮކް ހުއްޓުވަނީ.

ގުނޮކްގެ އެ މޮޅު ސޭވްއާ އެކު، ބްރެޒިލްގެ ލެޖެންޑް، ޕެލޭ ބޮލުން ފޮނުވާލި ބޯޅަ ބޭންކްސް މަތަކުރި ގޮތް ގިނަ ބަޔަކު ހަނދާން އާ ކުރަނީ މިއީ ގާތްގަނޑަކަށް އެއް ލެވަލެއްގެ ދެ ސޭވް ކަމަށް ބުނެ އެވެ.

"އަހަރެމެންނަށް ގޯލު ޖަހައި އެއްވަރުކޮށްލަން ފުރުސަތު ލިބުނު ވަގުތު އޮއްވައި، އެކަމަކު، ކިހިނެއް އެކަން ކުރާނީ ގޯލުގައި ބޭންކްްސް ހުއްޓައި،" ރޭގެ މެޗަށް ފަހު އޮސްޓްރިއާގެ ކޯޗު، ރަލްފް ރަންގްނިކް ބުންޏެވެ.

އިނގިރޭސި ކުރީގެ ޑިފެންޑަރު، މެތިއު އަޕްސަން ބުނީ، މިއީ ހަމަ ގޯޑަން ބޭންކްސްގެ ލެވަލްގެ ކުޅުމެއް ކަމަށެވެ.

އަދި ގުނޮކް އެ ބޯޅަ މަތަކުރި ހާލަތާއި ވަގުތަށް ބަލާއިރު، މި ސޭވްގެ ތަފާތު މޮޅުކަން އިތުރުވާ ކަމަށް ވެސް އަޕްސަން ވަނީ ބުނެފަ އެވެ.

ބޭންކްސް އެ ސޭވްކުރީ، 1970 ފީފާ ވޯލްޑް ކަޕްގެ ގްރޫޕް ސްޓޭޖުގައި ބްރެޒިލުން އިންގްލެންޑް 1-0 އިން ބަލިކުރި މެޗުގަ އެވެ.

ކީޕަރު ގުނޮކް: މި ފަހަރުގެ ޔޫރޯގައި މޮޅު ކުޅުމެއް ދެއްކި ތުރުކީގެ ކީޕަރު ގުނޮކް

މަޝްހޫރު ކުޅުންތެރިޔާ، ލީ ޑިކްސަން ބުނީ، މިއީ ބޭންކްސްގެ އެ ސޭވްއާ އެއް ލެވަލެއްގައި ގުނޭނެ ސޭވެއް ކަމަށެވެ.

ބީބީސީގެ ޕަންޑިޓް، ކްރިސް ސަޓަން ބުނީ، ޔޫރޯގެ ތާރީހުގައި ވެސް ގުނޮކްގެ މި ސޭވް ހާއްސަވާނެ ކަމަށާއި މިއީ ގޯލްކީޕަރުންނަށް ނަމޫނާ ކުޅުމެއް ކަމަށެވެ.

ތުރުކީގެ ކޯޗު ވިންޗެންޒޯ މޮންޓެލާ ބުނީ، ގުނޮކްގެ ވަޒީފާ އަކީ ގޯލު ސަލާމަތްކުރުން ކަމަށާއި އޭނާ އަދާކުރީ ޓީމާއި ގައުމަށްޓަކައި ކުރަން ޖެހޭ ޒިންމާއެއް ކަމަށެވެ. އަދި ގުނޮކްގެ މި ސޭވްއާ ބެހޭގޮތުން ވާހަަކަ ދައްކާއިރު، މުޅި ޓީމުގެ މަސައްކަތް ފާހަގަކުރުމަކީ އޭނާ ކުރަން ޖެހޭ ކަމެއް ކަމަށް މޮންޓެލާ ވަނީ ބުނެފަ އެވެ.

ތުރުކީން 16 އަހަރަށް ފަހު ޔޫރޯގެ ކުއާާޓާ ފައިނަލެއްގައި ކުޅުމުގެ ފުރުސަތު ހޯދިއިރު، ގަދަ އަށް ޓީމުގެ ކުރިމަތިލުމުގައި ތުރުކީން ނުކުންނާނީ ނެދަލެންޑްސްއާ ދެކޮޅަށެވެ. ތުރުކީން އެންމެ ފަހުން، ޔޫރޯގެ ކުއާޓާ ފައިނަލުގައި ކުޅުނީ 2008 ވަނަ އަހަރު އެވެ. އެ ފަހަރު އެ ޓީމުން ސެމީ ފައިނަލުގައި ވެސް ވާދަކުރި އެވެ.