އިންޑިއާގެ ބޮޑުވަޒީރު ނަރެންދުރަ މޯދީއަށް ފުރައްސާރަ ކުރި މައްސަލައިގައި ސަސްޕެންޑު ކުރި ތިން ޑެޕިއުޓީ މިނިސްޓަރުން ލައްވައި އެއްވެސް މަސައްކަތެއް ނުކުރުވައި މުސާރަ ދެމުން ދިޔުމަކީ ގާނޫނީ ކުށެއް ކަމަށާއި އެ މައްސަލަ ތަހުގީގު ކުރަންޖެހޭ ކަމަށް ކުރީގެ ނައިބު ރައީސް، ޑރ. މުހައްމަދު ޖަމީލް ވިދާޅުވެއްޖެ އެވެ.

ޖަމީލް އެހެން ވިދާޅުވީ މޯދީއަށް ފުރައްސާރަ ކުރި މައްސަލައިގައި މިދިޔަ ޖެނުއަރީ 7، ގައި ސަސްޕެންޑު ކުރި، ޔޫތު މިނިސްޓަރީގެ ޑެޕިއުޓީ މިނިސްޓަރުންގެ މަގާމުގައި ތިއްބެވި، މަރިޔަމް ޝިއުނާއާއި މަލްޝާ ޝަރީފާއި މަހުޒޫމް މާޖިދުއަށް ގޭގައި ބައިތިއްބައިގެން އެއްވެސް މަސައްކަތެއް ނުކުރުވައި މުސާރަ އާއި އިނާޔަތުގެ ގޮތުގައި ދައުލަތުގެ ބަޖެޓުން ފަސް ލައްކައަށްވުރެ ގިނަ ރުފިޔާ ދިން ހަބަރު "އަދަދު" އިން ޝާއިއު ކުރުމުންނެވެ.

އެ ހަބަރު ރީ ޕޯސްޓު ކުރައްވައި ޖަމީލު ވިދާޅުވީ "އެއްވެސް މަސައްކަތެއް ނުކުރުވައި އެއްވެސް މީހަކަށް އެންމެ ދުވަހަކަށް ވެސް ރައްޔިތުންގެ ފައިސާ ހަރަދެއް ނުކުރެވޭނެ" ކަމަށާއި އެގޮތަށް ހަރަދު ކުރުމަކީ "ގާނޫނީ ކުށެއް" ކަމަށެވެ.

އަދި "ރައްޔިތުންގެ ފައިސާ، މަގާމުގެ ނުފޫޒުގެ ބޭނުން ކޮށްގެން ވަކި ބަޔަކަށް ދެމުން ގެންދާ މައްސަލަ ތަހުގީގު ކުރެވެންޖެހޭ" ކަމަށް ވެސް ޖަމީލު ވިދާޅުވެފައިވެ އެވެ.

މައުލޫމާތު ހޯދައި ލިބިގަތުމުގެ ގާނޫނުގެ ދަށުން މީގެ ތިން މަސްދުވަސް ކުރިން "އަދަދު" އިން ހޯދުމަށް އެދުނު މައުލޫމާތު ހިއްސާ ކުރަމުން އިއްޔެ ޔޫތު މިނިސްޓަރީން ބުނީ ޖެނުއަރީ އިން މާޗުގެ ނިޔަލަށް ކޮންމެ ނައިބަކަށް ދިން މުސާރައިގެ ޖުމްލަ އަދަދަކީ 94،500ރ. ކަމަށެވެ. އެއީ މަހަކަށް 31،500ރ. އެވެ.

އޭގެ ފަހުން ހިނގާދިޔަ ތިން މަސްދުވަހުގެ މުސާރަ އެއް ކޮށްލުމުން ސަސްޕެންޝަނުގެ މުއްދަތުގައި މިއަދާ ހަމައަށް ކޮންމެ ނައިބު ވަޒީރަކަށް މުސާރައާއި އިނާޔަތްތަކުގެ ގޮތުގައި 189،000ރ. ދީފައިވެ އެވެ. މި ހިސާބުތަކުން އެނގޭ ގޮތުގައި ވަޒީފާގެ އެއްވެސް މަސައްކަތެއް ނުކުރައްވާ ޝިއުނާ، މަލްޝާ އަދި މަހްޒޫމު ވަނީ މުސާރައާއި އިނާޔަތްތަކުގެ ގޮތުގައި ޖުމްލަ 567،000ރ. ވަނީ ދައުލަތުގެ ބަޖެޓުން ދީފަ އެވެ.

ޔޫތު މިނިސްޓްރީން މައުލޫމާތު ދިން ގޮތުގައި ތިން ނައިބުން ސަސްޕެންޑުކުރަން ނިންމީ ސުލޫކީ މިންގަނޑާ ހިލާފުވެގެންނެވެ. އެއީ ރައީސް އޮފީހުގެ ނިންމުމެއް ކަމަށާއި މައްސަލަ އަދިވެސް ބަލަމުން ދަނީ އެ އޮފީހުން ކަމަށް މިނިސްޓްރީގެ ޖަވާބުގައި ބުނެފައިވެ އެވެ.

އިންޑިއާގެ ބޮޑުވަޒީރަށް ފުރައްސާރަކުރި މައްސަލައާ ގުޅިގެން އެ ގައުމުގެ މަޝްހޫރު ފިލްމީ ތަރިންނާއި އެ ގައުމުގެ ރައްޔިތުން ވަނީ ފަތުރުވެރިކަމުގެ މަންޒިލެއްގެ ގޮތުގައި ރާއްޖެ ބޮއިކޮޓު ކުރުމަށް ގޮވާލާ ކެމްޕޭނެއްވެސް ކުރިއަށް ގެންދިޔަ އެވެ. މީގެއިތުރުން މި މައްސަލާގައި ދެ ގައުމުގެ ދެމެދުގައި ހާރިޖީ ބޮޑު ކޯޅުމެއްވެސް ހިނގާދިޔަ އެވެ.

ނައިބުންގެ ބަސްމަގާއި ސިޔާސަތުގެ ސަބަބުން ރާއްޖޭގެ ޓޫރިޒަމަށް ދެ ބިލިއަން ރުފިޔާގެ ގެއްލުން ލިބިފައިވާ ކަމަށް، ކުރީގެ ފިނޭންސް މިނިސްޓަރު އިބްރާހިމް އަމީރުވެސް ވަނީ ޖޫން 30، ގައި ވިދާޅުވެފަ އެވެ.

އަމީރު ވިދާޅުވީ މި އަހަރުގެ ޖޫން މަހުގެ ނިޔަލަށް އިންޑިއާއިން ރާއްޖެއަށް ޒިޔާރަތްކުރި ޓޫރިސްޓުންގެ އަދަދު ކުރީ އަހަރަށް ވުރެ 47،000 މަދުވެފައިވާ ކަމަށެވެ. އެގެ ސަބަބުން ޓެކްސްގެ ގޮތުގައި ލިބެންޖެހޭ 450 މިލިއަން ރުފިޔާ ގެއްލިގެން ގޮސްފައިވާ ކަމަށް އޭނާ ވިދާޅުވި އެވެ.

"އަދި ފަތުރުވެރިކަމުގެ ސިނާއަތަށް ޖުމުލަ ގޮތެއްގައި 2.3 ބިލިއަން ރުފިޔާގެ ގެއްލުންވެފައިވޭ،" އަމީރު ވިދާޅުވި އެވެ.