މި މަހު ޒެމްބިއާ އާއި ބޮޓްސްވާނާގައި ކުރިއަށްދިިޔަ ބެޑްމިންޓަން ދުނިޔޭގެ ޖަމިއްޔާ، ބެޑްމިންޓަން ވޯލްޑް ފެޑެރޭޝަން (ބީޑަބްލިއުއެފް)ގެ މުބާރާތްތަކުގައި ރާއްޖޭގެ ރިވައިވަލް ސްޕޯޓްސް އިން ހޯދި ކާމިޔާބަށް ރައީސް ޑރ. މުހައްމަދު މުއިއްޒު މަރުހަބާ ދަންނަވައިފި އެވެ.

ޒެމްބިއާ މުބާރާތާއި ބޮޓްސްވާނާ މުބާރާތުން ޖުމްލަ އެކު، ރިވައިވަލް އިން ވަނީ އަށް މެޑަލް ހޯދައިފަ އެވެ. ބޮޓްސްވާނާ މުބާރާތުން އަންހެން ޑަބަލްސް އިން ފާތިމަތު ނަބާހާ (ނަބާ) އާއި އައިމިނަތު ނަބީހާ (ނަބީ)ގެ ޕެއާ އިން ރަން މެޑަލް ހޯދިއިރު، މިކްސް ޑަބަލްސް އިން ޒަޔާން ޒަކީ އާއި ނަބާގެ ޕެއާ އިން ލޯ މެޑަލް އަދި އަންހެން ސިންގަލްސް އިން ނަބާ ވަނީ ލޯ މެޑަލް ހޯދައިފަ އެވެ.

އަންހެން ސިންގަލްސް އިން ނަބާގެ ރަން މެޑަލާއި އައިމިނަތު ނަބީހާ (ނަބީ)ގެ ރިހި މެޑަލްގެ އިތުރުން، މިކްސް ޑަބަލްސް އިން ޒަޔާން އާއި ނަބާގެ ރިހި މެޑަލާއި ފިރިހެން ޑަބަލްސް އިން ޒަޔާން ޒަކީ އާއި ނިބާލް އަހުމަދުގެ ޕެއާގެ ލޯ މެޑަލްގެ އިތުރުުން އަންހެން ޑަބަލްސްގައި ފާތިމަތު ނަބާހާ (ނަބާ) އާއި އައިމިނަތު ނަބީހާ (ނަބީ)ގެ ޕެއާ އިން ހޯދި ލޯ މެޑަލް އެވެ.

"ބެޑްމިންޓަން ވޯލްޑް ފެޑެރޭޝަންގެ މުބާރާތެއްގައި.... އަންހެނުންގެ ސިންގަލްސް ފައިނަލުގައި ވާދަކުރަން، ދިވެހިރާއްޖޭގެ އާމިނަތު ނަބީހާ އާއި، ފާޠިމަތު ނަބާހާ ހޮވުމާއެކު، ޗެންޕިއަންކަމާއި ރަނައަޕްކަން ވެސް ރާއްޖެ އަށް ކަށަވަރުވެއްޖެ. މި މުބާރާތުގައި، 2 ގޯލްޑް މެޑެލް، 2 ސިލްވަރ މެޑެލް އަދި 4 ބްރޯންޒް މެޑެލް ކަށަވަރުކޮށް، ދިވެހި ކުޅުންތެރީން ދައްކަމުންދާ މޮޅު ކުޅުމަށް ޓަކައި ފަޚުރުވެރިކަމާއެކު ސާބަސް ދެން. މި ޝަރަފް ރާއްޖެއަށް ހޯދަައިދިން ހުނަރުވެރި ދެބެއިންނަށާއި، ދިވެހި މުޅި ޓީމަށް ތަހުނިޔާ ދަންނަވަން،" ސޯޝަލް މީޑިއާގައި ކުރެެއްވި ޕޯސްޓެއްގައި ރައީސް ޑރ. މުއިއްޒު ލިޔުއްވާފައިވެ އެވެ.

މީގެ ކުރިން ނަބާ އާއި ނަބީ ވަނީ ގައުމީ ފައިނަލުގައި ބައްދަލުކޮށްފަ އެވެ. އިންޓަނޭޝަނަލް ފައިނަލެއްގައި މިއީ މި ދެބެން އެއް ކުޅުންތެރިއަކު އަނެއް ކުޅުންތެރިއަކާ ދެކޮޅަށް ކުޅޭ ފުރަތަމަ ފަހަރެެވެ. މިއީ، ބީޑަބްލިއުއެފް އިން ރުހުންދީފައިވާ މުބާރާތެއްގެ ސިންގަލްސް އިވެންޓެއްގެ ފައިނަލުގައި ރާއްޖޭގެ ކުޅުންތެރިން ވާދަކުރި ފުރަތަމަ ފަހަރެވެ. ބޮޓްސްވާނާ މުބާރާތުގެ ކުރިން، ރާއްޖޭން ފައިނަލުގައި މުޅިން ވެސް ކުޅެފައިވަނީ، ޑަބަލްސް އިވެންޓްތަކުގަ އެވެ.