މިއުނިކް (ޖުލައި 2) - ރުމޭނިއާގެ މައްޗަށް 3-0 އިން ކުރިހޯދައި، ނެދަލެންޑްސް އިން 16 އަަަހަރަށް ފަހު ޔޫރޯ ފުޓްބޯޅަ މުބާރާތުގެ ކުއާޓާ ފައިނަލަށް ދަތުރުކޮށްފި އެވެ.

ނެދަލެންޑްސް އިން އެންމެ ފަހުން ޔޫރޯގެ ގަދަ އަށް ޓީމު ތެރޭގައި ހިމެނިގެން ވާދަކޮށްފައިވަނީ 2008 ވަަނަ އަހަރުގެ މުބާރާތުގަ އެވެ. އޭގެ ފަހުން، ނެދަލެންޑްސް އިން 2012 ވަނަ އަހަރުގެ ޔޫރޯގެ ގްރޫޕް ސްޓޭޖުން ކެޓިއިރު، 2016 ވަނަ އަހަރުގެ މުބާރާތަށް ކޮލިފައިނުވެ އެވެ. އަދި އެންމެ ފަހުން ބޭއްވި ޔޫރޯގެ ގަދަ 16 އިން ވަނީ ޗެކް ރިޕަބްލިކް އަތުން ކަޓައިފަ އެވެ.

ކުއާޓާ ފައިނަލުގައި ނެދަލެންޑްސްއާ ދެކޮޅަށް ކުޅޭނީ ގަދަ 16 ބުރުގެ ފަހު މެޗުން، ތުރުކީ އާއި އޮސްޓްރިއާ ކުޅެގެން މޮޅުވާ ޓީމެކެވެ. އޮސްޓްރިއާ އިން ވަނީ މި ފަހަރުގެ ޔޫރޯގައި ނެދަލެންޑްސް އަތުން 3-2 އިން މޮޅުވެފަ އެވެ.

މިއުނިކްގެ އަލިއާންޒް އެރީނާގައި ކުޅުނު މެޗުގެ 20 ވަނަ މިިނިޓްގައި ނެދަލެންޑްސް އިން ވަނީ ލީޑުނަގައިފަ އެވެ. މި ލަނޑު ޖެހީ، ޒަވީ ސިމޯންސް ދިން ބޯޅައަކުން އޭރިއާތެެެރެއިން ކޯޑީ ގަކްޕޯ ޖެހި ގޯލުންނެެވެ. މިއީ މި ފަހަރުގެ ޔޫރޯގައި ގަކްޕޯ ޖެހި ތިން ވަަނަ ގޯލެވެ. އޭނާ ވަނީ ލަނޑު ލިސްޓުގެ ކުރީގައި އޮތް ޖޯޖިއާގެ ޖޯޖެސް މިކައުޓަޑްޒޭ އާއި ޖަރުމަނުގެ ޖަމާލް މުސިއާލާ އަދި ސްލޮވާކިއާގެ އިވާން ޝްރަންޒާ އެއްވަރަށް ލަނޑު ޖަހައިފަ އެވެ.

ރުމޭނިއާ އިން ލަނޑެއް ޖެހޭތޯ ކުރި މަސައްކަތް ފުރަތަމަ ހާފުގައި ކާމިޔާބުވާގޮތެއްނުވި އެވެ.

ބަދަލު ކުޅުންތެރިއެއްގެ ގޮތުގައި ދެ ވަަނަ ހާފުގައި ކުޅެން އަރައި މާލެން ވަނީ ދެ ގޯލު ޖަހައިފައި.

ދެ ވަނަ ހާފް ފަށައިގެން ނެދަލެންޑްސް އިން ލީޑުފުޅާކުރެވޭތޯ ގިނަ މަސައްކަތްތަކެއް ކުރަން ފެށި އެވެ. އެ ގޮތުން، އެ ޓީމުގެ މެމްފިސް ޑިޕާއި އަށް އޭރިއާތެރެއިން ލިބުނު ބޯޅަ ފޮނުވާލުމުން ރުމޭނިއާ ޑިފެންޑަރުން އެ ހުއްޓުވިއިރު، ކޯނަރަކުން އައި ބޯޅައެއްގައި ނެދަލެންޑްސްްގެ ކެޕްޓަން، ވާޖިލް ވެން ޑައިކް ބޮލުން ޖެހި ބޯޅަ ބޭރުވީ ދަނޑީގައި ޖެހިފަ އެވެ.

ގަކްޕޯ ޖެހި ބޯޅައެއް، ރުމޭނިއާގެ ކީޕަރު ފްލޯރިން ނީޓްސާ މަތަކުރިއިރު، މެޗުގެ 63 ވަނަ މިނިޓްގައި ގަކްޕޯ ޖެހި ލަނޑެއް ވީޑިއޯ އެސިސްޓަންޓް ރެފްރީ (ވީއޭއާރް) އިން ވަނީ އޮފްސައިޑް ކަމަށް ނިންމައިފަ އެވެ.

ހިލޭ ޖެހުމަކުން ނެދަލެންޑްސްގެ ޑިޕާއި ޖެހި ބޯޅަ ތިރިތިރިން ދިޔައީ ދަނޑިކައިރިން ބޭރުންނެވެ.

ދެ ވަނަ ލަނޑެއް ޖަހަން, ނެދަލެންޑްސް އިން ކުރަމުން އައި މަސައްކަތް، މެޗުގެ 83 ވަނަ މިނިޓްގައި ކާމިޔާބުކުރި އެެވެ. މިއީ، ގަކްޕޯ އަރިމަތިން ބޯޅަ ހިފައިގެންވަދެ، ދިން ބޯޅައަކުން، ޑޮންޔެލް މާލެން ޖެހި ލަނޑެކެވެ.

އެޓޭކަށް ބަލާއިރު މި މެޗުގައި ރުމޭނިއާ އަށް ދިޔައީ ދަށްކޮށެވެ. އެ ޓީމަށް ނެދަލެންޑްސްގެ ކީޕަރު، ބާޓް ވާބްރޫގެން ޓެސްޓް ކޮށްލެވޭ ގޮތެއްނުވި އެވެ. އަނެއްކޮޅުން، އިތުރު ވަގުތުގެ ހަތަރު މިނިޓްގެ ތެރެއިން، ކައުންޓަ އެޓޭކުގައި ނެދަލެންޑްސް އިން ތިން ވަނަ ލަނޑު ޖެހި އެވެ. މިއީ، އަމިއްލަ ހާފުގެ ތެރެއިން ބޯޅަ ހިފައިގެން ގޮސް، ރުމޭނިއާ އޭރިއާތެރެއަށް ވަދެ، މާލެން ޖެހި ގޯލެކެވެ.