ޑަސެލްޑޯފް، ޖަރުމަނު (ޖުލައި 1) - ޔޫރޯ ފުޓްބޯޅަ މުބާރާތުގެ ގަދަ 16 ޓީމު ވާދަކުރާ ބުރުގައި ބެލްޖިއަމާ ދެކޮޅަށް ފްރާންސް އިން ކުޅޭ މެޗަށް ނުކުންނައިރު ހުރިހާ ހާލަތަކަށް ތައްޔާރުވާނެ ކަމަށް އެ ޓީމުގެ ކޯޗު، ޑިޑިއޭ ޑެޝޯމްޕްސް ބުނެފި އެވެ.

ފްރާންސާ އެކު، 2000 ވަނަ އަހަރުގެ ޔޫރޯ ފުޓްބޯޅަ މުބާރާތުގެ ޗެމްޕިއަންކަން ހޯދި ކެޕްޓަން، ޑެޝޯމްޕްސް ބުނީ ނޮކައުޓް ބުރާ ހަމައިން އަބަދުވެސް ފެށޭނީ މުޅިން އާ މުބާރާތެއް ކަމަށެވެ. އެހެންކަމުން، މެޗެއްގައި ކުރިމަތިވެދާނެ ކަންކަމަށް ވިސްނައި މޮޅުވާން ކުރަން ޖެހޭ މަސައްކަތްތަކަށް ވިސްނަން ޖެހޭނެ ކަމަށް ޑެޝޯމްޕްސް ވަނީ ބުނެފަ އެވެ.

ރިޕޯޓްތައް ބުނާގޮތުން، ބެލްޖިއަމާ ދެކޮޅަށް ކުޅެން ފްރާންސް އިން އާ ފޯމޭޝަނަކަށް ވަނީ ޕްރެކްޓިސް ކޮށްފަ އެވެ. އަދި ޕެނަލްޓީ ޝޫޓައުޓް ވެސް ޕްރެކްޓިސް ކުރި މަންޒަރު މީޑިއާ އަށް ފެނިފައިވެ އެެވެ.

ޑެޝޯމްޕްސް ބުނީ ނޮކައުޓް މެޗަކަށް ތައްޔާރުވާއިރު، އަބަދުވެސް ޕެނަލްޓީ އަށް ފަރިތަކުރާ ކަމަށާއި އެކަމަކު، ބެލްޖިއަމް މެޗުގައި ކުޅޭނެ ގޮތް ރާވަން ކުރި މަސައްކަތާ ބެހޭގޮތުން މެޗުގެ ކުރިން ވާހަކަ ދެއްކުމަކީ އެންމެ ރަނގަޅު ގޮތެއް ނޫން ކަމަށެވެ.

"އަހަރެމެންނަށް އެބަހުރި އިދިކޮޅަށް ކުޅޭ ޓީމު (ބެލްޖިއަމް)ގެ މައުލޫމާތު ލިބިފައި، އެހެންވީމަ، ކޮންމެ ކަަމަކަށް ވެސް ތައްޔާރުވެގެން މި ތިބީ. މެޗުގައި އަހަރެެމެންގެ ކަންކަން ބަލާލީމަ އެނގޭނެ ތައްޔާރުވެފައި ހުރި މިންވަރު،" ޑެޝޯމްޕްސް ބުންޏެވެ.

ބައިނަލްއަގުވާމީ މުބާރާތެއްގައި މިހާތަނަށް ފްރާންސާއި ބެލްޖިއަމް ބައްދަލުކުރި ހަތަރު މެޗުން ވެސް ފްރާންސް މޮޅުވި އެވެ. ޔޫރޯގައި ފްރާންސާއި ބެލްޖިއަމާ ކުޅުނު ހަމައެކަނި ފަހަރަކީ މީގެ 40 އަހަރު ކުރިން، 1984 ވަނަ އަހަރުގެ ޔޫރޯގެ ގްރޫޕް ސްޓޭޖުގަ އެވެ. އެ މެޗުން ފްރާންސް ވަނީ 5-0 އިން މޮޅުވެފަ އެވެ.

ފްރާންސާއި ބެލްޖިއަމް ކުޅޭ މެޗު ފަށާނީ މިރޭ 9 ޖަހާއިރު އެވެ.