ކޮލޯން، ޖަރުމަނު (ޖުލައި 1) - ފަހަތުން އަރައި 4-1 އިން ޖޯޖިއާ ބަލިކޮށް، ސްޕެއިނުން މި ފަހަރުގެ ޔޫރޯ ފުޓްބޯޅަ މުބާރާތުގެ ކުއާޓާ ފައިނަލުގައި، މުބާރާތް ބާއްވާ ގައުމު، ޖަރުމަނާ ދެކޮޅަށް ކުޅެން ޖެހިއްޖެ އެވެ.

ޔޫރޯގެ ޗެމްޕިއަންކަން ތިން ފަހަރު ހޯދާފައިވާ ސްޕެއިނުން މި ވަނީ އެންމެ ފަހުން ބޮޑެތި މުބާރާތްތަކުގައި ކުޅުނު ފަސް ފަަހަރުގެ ތެރެއިން ދެ ވަނަ ފަހަރު ގަދަ 16 ފަަހަނައަޅައި ގޮސްފަ އެވެ. ސްޕެއިނުން އެންމެ ފަހުގެ ޔޫރޯގައި ކެޓީ، ސެމީ ފައިނަލުގައި ޕެނަލްޓީ ޖަހައިގެން އިޓަލީ އަތުންނެވެ.

ސްޕެއިނުން ވަނީ ކޮލޯން ސްޓޭޑިއަމްގައި މިރޭ ކުޅުނު މެޗު ފަށައިގެން ފުރަތަމަ މިނިޓުން ފެށިގެން މެޗުގެ ކޮންްޓްރޯލް ނަގައިފަ އެވެ. އަދި ޖޯޖިއާ ހާފުގައި ބޯޅަ ހިފަހައްޓައިގެން ކުޅެން ފަށައި ރަނގަޅު ހަަމަލާތަކެއް ވެސް ފޮނުވާލަން ފެށި އެވެ.

އެ ގޮތުން، ސްޕެއިނުގެ ރަނގަޅު ޝޮޓްތަކެއް ޖޯޖިއާގެ ކީޕަރު، ޖިއޯޖީ މަމަޑާޝްވިލީ ވަނީ މަތަކޮށްފަ އެވެ.

ކައުންޓަ އެޓޭކުގައި ނުރައްކާ ޓީމެއްގެ ގޮތުގައި ފާހަގަކުރެވޭ ޖޯޖިއާ އިން މެޗުގެ 18 ވަނަ މިނިޓްގައި ސްޕެއިން ސިއްސުވާލުމަށް ފަހު ލީޑުނެގި އެވެ.

ޖޯޖިއާގެ ތަރި، ކްވިޗާ ކްރަވަޝްކޭލިއާ އަށް އަމާޒުކޮށް، އެ ޓީމުގެ ކުޅުންތެރިއަކު ނެގި ހުރަހެއް ދިފާއުކުރަން އުޅުމުގެ ތެރޭގައި، ސްޕެއިންގެ ޑިފެންޑަރު، ރޮބިން ލެ ނޯމަންޑް ޖައްސާލި ބޯޅަ ވަނީ ބައިކޮޅަށެވެ.

ޖޯޖިއާ ކުޅުންތެރިން ލަނޑު ޖެހުމަށް ފަހު އުފާފާޅުކުރަނީ.

ޖޯޖިއާ ލީޑުނެގި ފަހުން ސްޕެއިނުން ގިނަ އެޓޭކްތަކެއްކޮށް، ރަނގަޅު ޝޮޓްތަކެއް ފޮނުވާލި އެވެ. އެ ގޮތުން، ސްޕެއިންގެ ނީކޯ ވިލިއަމްސް އާއި އަލްވާރޯ މޮރާޓާ އަދި މާކް ކުކުރޭލާ ޖެހި ބޯޅަތަކުގެ ހުރަހަކަށްވީ ސްޕެއިނުގެ ވެލެންސިއާ އަށް ކުޅެމުން އަންނަ ޖޯޖިއާގެ ކީޕަރު، މަމަޑާޝްވިލީ އެވެ.

ފުރަތަމަ ހާފު ނިމުމުގެ ކުރިން ސްޕެއިނުން އެއްވަރުކުރަން ކުރި މަސައްްކަތް ކާމިޔާބުކުރި އެވެ. ސްޕެއިނުގެ .ލަނޑު ޖެހީ މެޗުގެ، 39 ވަނަ މިނިޓްގައި ރޮޑްރީ އެވެ.

މިއީ، ނީކޯ ވިލިއަމްސް ދިން ބޯޅައަކުން ތިރިތިރިން ގޯލަށް ބޯޅަ ފޮނުވާލައިގެން ރޮޑްރީ ޖެހި ލަނޑެކެވެ. ވީޑިއޯ އެސިސްޓަންޓް ރެފްރީ (ވީއޭއާރް) އިން މި ގޯލު ޗެކް ކުރީ އޮފްސައިޑްގައި ހުރި މޮރާޓާ ހަރަކާތްކޮށް، ކީޕަރު މަމަޑާޝްވިލީ އަށް ހުރަސްއެޅިތޯ އެވެ.

އެކަމަކު، ރެފްރީ ވަނީ ގޯހެއް ނެތް ކަމަށް ވީއޭއާރް އިން ނިންމުމުން، ރޮޑްރީ ޖެހި މި މުހިންމު ގޯލު ބަލައިގަނެފަ އެވެ.

ރޮޑްރީ، ސްޕެއިނަށް އެއްވަރުކޮށްދިން ގޯލު ޖެހުމަށް ފަހު އުފާފާޅުކުރަނީ

ސްޕެއިނުން ވަނީ ދެ ވަނަ ހާފް ފެށިގެން ހަ ވަނަ މިނިޓްގައި ލީޑުނަގައިފަ އެވެ. އެ ގޮތުން، މެޗުގެ 51 ވަނަ މިނިޓްގައި ފަބިއަން ރުއީޒް ވަނީ ބޮލުން ގޯލެއް ޖަހައިފަ އެވެ. މިއީ، 16 އަހަރުގެ ލަމީން ޔަމާލް ނެގި ހުރަހަކުން ރުއީޒް ޖެހި ލަނޑެކެވެ.

މެޗުގެ 75 ވަނަ މިނިޓްގައި ސްޕެއިނުގެ ތިން ވަނަ ލަނޑު ޖެހީ އޭރިއާތެރެއިން ގޯލުގެ މަތީ ކަނަށް ބޯޅަ ފޮނުވާލައިގެން ނިކޯ ވިލިއަމްސް އެވެ. އެ ލަނޑު ޖެހިތާ އަށް މިނިޓް ފަހުން، އޭރިއާރޮނގުމަތިން ޑެނީ އޮލްމޯ ވަނީ ތިިރިތިރިން ގޯލަށް ބޯޅަ ފޮނުވާލައި ހަތަރު ވަނަ ލަނޑު ޖަހައިފަ އެވެ.

ޔަމާލް އަށް ވެސް ލަނޑު ޖަހަން ރަނގަޅު ދެ ފުރުސަތެއް ލިބުނުއިރު ބޭނުމެއް ނުކުރެވުނެވެ.

ޖޯޖިއާ އިން މުޅިން އަލަށް ބައިނަލްއަގުވާމީ މުބާރާތެއްގައި ވާދަކޮށް ގަދަ 16ގެ ތެރޭގައި ހިމެނުމަކީ ކާމިޔާބެއް ކަމަށް އެ ޓީމުން ގަބޫލުކުރެ އެވެ. ޖޯޖިއާ އިން ވަނީ މި ޔޫރޯގައި ޕޯޗުގަލް އަތުން 2-0 އިން މޮޅުވެފަ އެވެ.