ކޮލޯން (ޖޫން 30) - ޔޫރޯ ފުޓުބޯޅަ މުބާރާތުގެ ދެ ވަނަ ބުރުގައި ސްޕެއިނާ ދެކޮޅަށް ޖޯޖިއާ އިން ނުކުންނައިރު, އެ ޓީމަށް އެއްވެސް ޕްރެޝަރެއް ނެތް ކަމަށާއި އެ ޓީމަށް މިހާރު ވެސް ޔޫރޯ އިން ހާސިލްކުރަން ބޭނުންވި މައިގަނޑު ކަންކަން ހާސިލްވެފައިވާ ކަމަށް ޖޯޖިއާގެ ކޯޗު ވިލީ ސަންޔޯލް ބުނެފި އެވެ.

މުޅިން އަލަށް ބައިނަލްއަގުވާމީ މުބާރާތެއްގައި ވާދަކުރާ ޖޯޖިއާ އިން މި މުބާރާތުގެ ދެ ވަނަ ބުރުން ޖާގަ ހޯދީ މުބާރާތުގެ ފޭވަރިޓުންގެ ތެރޭގައި ހިމެނޭ ޕޯޗުގަލް 2-0 ގެ ނަތީޖާ އަކުން ބަލިކޮށްގެންނެވެ. އެއާ އެކު, ސްޕެއިން މެޗަށް ނުކުންނައިރު، ޖޯޖިއާ ޓީމުގެ ރޫހު އޮތީ ވަރަށް ރަނގަޅަށެވެ.

ތާރީހުގައި ފުރަތަމަ ފަހަރަށް ޖޯޖިއާ އިން ބޮޑު މުބާރާތެއްގެ ދެ ވަނަ ބުރުގެ މެޗަށް ނުކުންނައިރު, އެ ޓީމުގެ ކުޅުންތެރިން "މޯޓިވޭޓް" ކުރަން ނުޖެހޭނެ ކަމަށް ކޯޗު ސަންޔޯލް ހާމަކުރި އެވެ.

"އަހަރެން ކުޅުންތެރިން ކައިރީ ބުނެފައި ވާނެ ސްޕެއިން މެޗުގައި އެ ކުޅުންތެރިން އަށް ބޯޅަ ލިބުނީމަ ވިސްނައިގެން ކުޅެން. މިއީ ހިސާބެއް ނޫން. މިއީ ޗެސް މެޗެއް ވެސް ނޫން." ސަންޔޯލް ބުންޏެވެ.

މި މެޗަށް ނުކުންނައިރު، ޖޯޖިއާ އަށް އެއްވެސް ޕްރެޝަރެއް ނެތް ކަމަށާއި، ޖޯޖިއާގެ އަމާޒަށް ވުރެ ދުރަށް މިހާރުވެސް ވާސިލްވެވިފައިވާ ކަމަށް، ފްރާންސް ގައުމީ ޓީމުގެ ކުރީގެ ފުލްބެކް، ސަންޔޯލް ބުނެފައިވެ އެވެ.

ސްޕެއިން މެޗަށް ނުކުންނައިރު, ސްޕެއިން އަކީ ވެސް މުބާރާތުގެ ފޭވަރިޓުންގެ ތެރޭގައި ހިމެނޭ ޓީމެއް ކަން އެނގޭ ކަމަށާއި, އެކަމަށް ކުޅުންތެރިން ތިބޭނީ ތައްޔާރަށް ކަމަށް ސަންޔޯލް ގަބޫލުކުރެ އެވެ.

މި މެޗަށް ނުކުންނައިރު، ހުރިހާ ގޮތަކުންވެސް އެޑުވާންޓޭޖް އޮތީ ޖޯޖިއާ އަށް ކަމަށް ސަންޔޯލް ގަބޫލުކުރަނީ އެ ޓީމަށް ޕްރެޝަރެއް ނެތުމެވެ.

ސްޕެއިނުން ވަނީ ޔޫރޯ ކޮލިފައިންގައި، 2023 ގެ ސެޕްޓެމްބަރުގައި، ޖޯޖިއާ ދަނޑުގައި، 7-1 އިން މޮޅުވެފަ އެވެ. ސަންޔޯލް ބުނީ އެ މެޗުގެ ނަތީޖާގެ ހިތި ހަނދާންތައް އެބަހުރި ކަމަށެވެ. އަދި ބަދަލު ހިފުމުގެ ރޫހަށް ވުރެ، ކުރިއެރުމެއް ހޯދުމުގެ އަމާޒަކާ އެކު ނުކުންނަން ސަންޔޯލް ހުރީ އަމާޒުހިފައިގެންނެވެ.

ޖޯޖިއާ އާއި ސްޕެއިން ކުޅޭ މެޗު ފަށާނީ މިރޭ 12 ޖަހާއިރު އެެވެ.