ގއ. ވިލިނގިލީގައި ކުޑަކުއްޖަކަށް ގަނާ ކުރަމުންދާ މައްސަލައެއް ފުލުހުން ބަލަން ފަށައިފި އެވެ.

ވިލިނގިލީގައި ކުޑަ އަންހެން ކުއްޖަކަށް ގަނާ ކުރަމުން ދަނީ އެ ކުއްޖާ ބަނޑުބޮޑު ކަމަށް ބުނެ އެވެ. އެކަމުގައި 18 އަހަރު ނުފުރޭ ކުދިންނާއި, އެ ކުދިންގެ ބެލެނިވެރިން ހިމެނޭ ކަމަށް ވެސް ވަނީ އަޑުފެތުރިފަ އެވެ.

މިކަމަ ގުޅިގެން ފުލުހުންގެ ތަރުޖަމާނު އަހުމަދު ޝިފާން ވިދާޅުވީ އެ މައްސަލަ ގުޅުންހުރި އިދާރާތަކާ އެކު ބަލަމުންދާ ކަމަށެވެ.

އަދި މިކަމުގައި މަސްލަހަތު ހިމެނޭ ފަރާތްތަކަށް ރައްކާތެރި މާހައުލެއް ޔަގީންކޮށް ދިނުމަށް ކުރަންޖެހޭ ކަންކަން ވެސް ފުލުހުން ކުރަމުންދާ ކަމަށް އޭނާ ވިދާޅުވި އެވެ.

ކުޑަކުދިންނާމެދު އެކުދިންގެ ރައްކާތެރިކަމާއި ދިރިއުޅޭ މާޙހައުލުގެ އުފާވެރިކަން ގެއްލޭ ޒާތުގެ ވާހަކަ ދެއްކުމާއި ކަންކަން އެއްވެސް ފަރާތަކުން ނުކުރުމަށް ޝިފާން ވަނީ އިލްތިމާސް ކުރައްވާފަ އެވެ.