ފްރޭންކްފާޓް (ޖޫން 26) - އިންގްލެންޑް ފުޓުބޯޅަ ޓީމުގެ ކުޅުންތެރިން ތިބީ ބަދަހިކޮށް ކަމަށާއި، އެކަމަކު ސަޕޯޓަރުން ޓީމާ އެކު ހަމަ އެ ގޮތަށް ތިބެންޖެހޭ ކަމަށް އެ ޓީމުގެ ކޯޗު ގަރެތު ސައުތުގޭޓް ބުނެފި އެވެ.

މި ފަހަރުގެ ޔޫރޯ ފުޓުބޯޅަ މުބާރާތުގައި އެންމެ ބޮޑު ފާޑުކިޔުމެއް އަމާޒުވެފައި ވަނީ އިންގްލަންޑް ޓީމަށެވެ. އެ ޓީމުން މި މުބާރާތުގައި ދެއްކި ދަށް ކުޅުމާ އެކު, ވެސް ގްރޫޕް ސީގެ އެއް ވަނަ ޓީމުގެ ގޮތުގައި ދެ ވަނަ ބުރުން ޖާގަ ހޯދި އެވެ. އެ ޓީމަށް ކުޅުނު ތިން މެޗުން ފަސް ޕޮއިންޓް ލިބުނެވެ.

ޔޫރޯ ފުޓްބޯޅަ މުބާރާތުގައި ރޭ ސްލޮވީނިއާ އަތުން 0-0 ގެ ނަތީޖާ އަކުން އެއްވަރުވި މެޗަށްފަހު ވާހަކަ ދައްކަމުން ސައުތުގޭޓް ބުނީ މުބާރާތުގެ ތިން މެޗު ކުޅެވުނުއިރު, ފެނިގެންދިޔައީ ކުޅުންތެރިން ބަދަހިކޮށް އެކަތިގަނޑެއްގެ ގޮތުގައި ތިބިކަން ކަމަށެވެ.

އެކަމަކު އެ މަންޒަރު ސަޕޯޓަރުންގެ ފަރާތުން ނުފެންނާތީ ކަންބޮޑުވާ ކަމަށް ސައުތުގޭޓް ވަނީ ބުނެފަ އެވެ.

"އަހަރެންއަށް މި ފެންނަނީ ކުޅުންތެރިން މުބާރާތް ފެށުނީއްސުރެ ބަދަހިކޮށް ކާމިޔާބު ހޯދަން އަޒުމު ކަނޑައަޅައިގެން ތިބިތަން. އެ މަންޒަރު އަހަރެން އަށް ސަޕޯޓަރުންގެ ފަރާތުން ނުފެނޭ. ސަޕޯޓަރުން އެބަ ޖެހޭ ބަދަހި ކޮށް ޓީމާއެކު ތިބެން" ސައުތުގޭޓް ބުންޏެވެ.

ރޭގެ މެޗަށް ފަހު އިނގިރޭސި ސަޕޯޓަރުން ވަނީ ސައުުތުގޭޓާ ދިމާލަށް އެއްޗެހި ވެސް އުކައިފަ އެވެ.

ސައުތުގޭޓް ބުނީ އޭނާ އަށް އަމާޒުކޮށް އަންނަ ފާޑުކިޔުންތަކަށް މަރުހަބާ ކިޔާ ކަމަށާއި، އެކަން އަމިއްލަ އަށް ވެސް ގަބޫލުކުރާ ކަމަށެވެ. އަދި އަމާޒުވާ ފާޑުކިޔުންތައް ރަނގަޅުކުރަން މަސައްކަތް ކުރާނެ ކަމަށް ވެސް ސައުތުގޭޓް ވަނީ ބުނެފަ އެވެ.

ވަރުގަދަ ސްކޮޑަކާ އެކު, މުބާރާތައް ނުކުތް އިންގްލަންޑަކީ މުބާރާތް ފެށުނުއިރު, ފޭވަރިޓުންގެ ތެރޭގައި ހިމެނޭ ޓީމެކެވެ.

އެކަމަކު، ގްރޫޕް ސްޓޭޖުގައި އެ ޓީމުން ކުޅުން ތިން މެޗުގެ ތެރެއިން މޮޅުވެވުނީ އެންމެ މެޗަކުންނެވެ. އެކަމާ ހުރެ، އެ ޓީމަށް އަންނަނީ ބޮޑެތި ފާޑުކިޔުންތަކެއް އަމާޒުވަމުންނެވެ.