ޑޯޓްމަންޑް (ޖޫން 25) - ޔޫރޯ ފުޓްބޯޅަ މުބާރާތުގައި ޕޮލެންޑް މި ފަހަރު ކުޅޭނެ ފަހު މެޗުން ފްރާންސް އަތުން ޕޮއިންޓެއް ލިބުނަސް އެކަމާ ހިތްހަމަ ޖެހޭނެ ކަމަށާއި, މިހާރުގެ ވިސްނުން ހުރީ ފީފާ ވޯލްޑް ކަޕް ކޮލިފިކޭޝަނަށް ކަމަށް ޕޮލެންޑްގެ ކޯޗު މައިކަލް ޕްރޮބިއާޒް ބުނެފި އެވެ.

މި ފަހަރުގެ ޔޫރޯގައި ޕޮލެންޑުން ގްރޫޕް ސްޓޭޖުގައި ކުޅުނު ދެ މެޗުން ވެސް ބަލިިވިއިރު، އެ ޓީމަކީ މި ފަހަރުގެ ޔޫރޯ އިން ކެޓި ފުރަތަމަ ޓީމެވެ.

މި ފަހަރުގެ ޔޫރޯގައި ޕޮލެންޑް ކުޅޭނެ ފަހު މެޗަކީ މިރޭ ފްރާންސާ ބައްދަލުކުރާ މެޗެެވެ.

ޕޮލެންޑްގެ ކޯޗު ޕްރޮބިއާޒް ބުނީ އެ ޓީމުގެ ފޯކަސް މިވަގުތު ހުރީ ވޯލްޑް ކަޕް ކޮލިފިކޭޝަނަށް ކަމަށެވެ. އަދި އޭގެ ކުރިން ފްރާންސް މެޗުން ޕޮއިންޓެއް ލިބުނަސް އެކަމާ ހިތްހަމަ ޖެހޭނެ ކަމަށް ޕްރޮބިއާޒް ބުނެފައިވެ އެވެ.

މި މެޗުގެ ކުރިން ނޫސްވެރިންނާ ވާހަކަ ދައްކަމުން ޕޮލެންޑްގެ ތަރި ރޮބާޓް ލެވަންޑޯސްކީ, ބުނީ އުންމީދަކީ މި މެޗަކީ މި ފަހަރުގެ ޔޫރޯގައި ފެންނާނެ އެންމެ ފެންވަރު ރަނގަޅު މެޗު ކަމުގައި ވުން ކަމަށެވެ.

"އަހަރެން އުންމީދު ކުރަން މި މެޗަކީ ފެންވަރު ރަނގަޅު މެޗަކަށްވާނެ ކަމަށް. ގިނަ ފުރުސަތުތައް ލިބި ގިނަ ގޯލުތަކެއް ފެނިގެންދާނެ މެޗަކަށް ވުނެ ކަމަށް." ލެވަންޑޯސްކީ ބުންޏެވެ.

ލެވަންޑޯސްކީ ބުނީ މި މެޗަށް ނުކުންނަނީ ޕްލޭނަކާ އެކުގައި ކަމަށާއި, ޕްލޭނާ އެއްގޮތައް ކުޅެވޭނެ ކަމަށް އުންމީދު ކުރާ ކަމަށެވެ.

އަނިޔާގެ ސަބަބުން ޔޫރޯގެ ގްރޫޕް ސްޓޭޖުގައި ޕޮލެންޑުން ނެދަލަންޑްސްއާ ދެކޮޅަށް ކުޅުނު މެޗުގައި ލެވަންޑޯސްކީ ފެނިފައި ނުވެ އެވެ. އެކަމަކު، ދެ ވަނަ މެޗުގައި އޮސްޓްރިއާއާ ދެކޮޅަށް ފަހު ހާފުގައި އޭނާ ވަނީ ކުޅެފަ އެވެ.

ފްރާންސާއި ޕޮލެންޑް ކުޅޭ މެޗު ފަށާނީ މިރޭ 9 ޖަހާއިރު އެވެ.