ސިންގަޕޫރުގެ ކޮންމެ ގެއަކަށް 300 ސިންގަޕޫރު ޑޮލަރުގެ ކޮމިއުނިޓީ ޑިވެލޮޕްމަންޓް ކައުންސިލް (ސީޑީސީ) ވައުޗަރެއް ދިނުމަށް ނިންމައިފި އެވެ.

ސިންގަޕޫރުގެ ބޮޑުވަޒީރު ލޯވްރެންސް ވޮންގް "އެކްސް" ގައި ކުރެއްވި ޕޯސްޓެއްގައި ވިދާޅުވީ ސިންގަޕޫރުގެ ކޮންމެ ގެއަކަށް މިއަދުން ފެށިގެން 300 ޑޮލަރުގެ ސީޑީސީ ވައުޗަރެއް ލިބޭނެ ކަމަށާއި އެ ވައުޗަރު މެދުވެރިކޮށް އެކި ތަންތަނުން ހިދުމަތް ހޯދޭނެ ކަމަށެވެ.

ސީޑީސީ ވައުޗަރު ތައާރަފްކުރީ މިދިޔަ ޖެނުއަރީ މަހު ކަމަށްވާއިރު، އެފަހަރު 500 ޑޮލަރުގެ ވައުޗަރު ގެތަކަށް ވަނީ ދޫކޮށްފަ އެވެ. އަދި މިދިޔަ އަހަރު 200 ޑޮލަރުގެ ސީޑީސީ ވައުޗަރު ދޫކުރި އެވެ.

މިއީ ސިންގަޕޫރުގައި އަހަރެއް ތެރޭގައި ދެ ފަހަރު ސީޑީސީ ވައުޗަރު ދޫކުރި ފުރަތަމަ ފަހަރު ކަމަށްވާއިރު، މި އަހަރު ސިންގަޕޫރުގެ ގެތަކަށް ޖުމްލަ 800 ޑޮލަރުގެ ސީޑީސީ ވައުޗަރު ލިބޭނެ އެވެ.

މި ވައުޗަރުތައް ބޭނުންކޮށްގެން ކާބޯތަކެތީގެ އިތުރުން ގެއަށް ބޭނުންވާ އެކި ސާމާނުތައް ސުޕަމާޓުތަކުން ގަނެވެ އެވެ.

ސިންގަޕޫރުގެ ރައްޔިތުންގެ ދިރިއުޅުމުގެ ފެންވަރު މަތި ކުރުމަށް ދޫކުރާ މި ވައުޗަރުތަކަކީ ބަޖެޓުގައި ހިމަނައިގެން ދޫކުރަމުން އަންނަ ވައުޗަރުތަކެކެވެ.