އެކިއެކި ވިހަ މާއްދާތަކާއި ގުރޯތު ހޯމޯން އެކުލެވޭ މާއްދާތައް އެކުލެވޭ ތަރުކާރީ އާއި މޭވާތައް ކެވިގެން ރާއްޖޭގެ "އަންހެން ބޭފުޅުންގެ ރީތިކަަމަށް ބުރޫ އަރާ ކަމަށް" ވިދާޅުވެ، ރައްޔިތުންގެ މަޖިލީހުގެ މައްޗަންގޮޅި އުތުރު ދާއިރާގެ ޕީއެންސީ މެންބަރު އިބްރާހީމް މުހައްމަދު މިއަދު ކަންބޮޑުވުން ފާޅުކުރައްވައިފި އެވެ.

ސިއްހީ ހިދުމަތް ދިނުމުގެ ގާނޫނަށް ބަދަލުތަކެއް ގެންނަން ސަރުކާރުގެ ފަރާތުން ހެންވޭރު ދެކުނު ދާއިރާގެ ޕީއެންސީ މެންބަރު ހުސައިން އިމްރާން ލަތީފު ހުށަހެޅުއްވި ބިލަށް މަޖިލީހުގެ މިއަދުގެ ޖަލްސާގައި ކުރި ބަހުސްގައި މެންބަރު އިބްރާހީމް ވިދާޅުވީ އެފަދަ ބިލެއްގެ މުހިއްމުކަން އެކި ދިމަދިމާލުން ފެންނަން އެބަހުރި ކަމަށެވެ. އެފަދަ ހައްސާސް އެއް ކަމަކީ އޭނާ ވިދާޅުވި ގޮތުގައި އަންހެނުންގެ ސިއްހަތެވެ.

"އެއްވެސް ބޭފުޅަކަށް ވިހައެއް، ފުޅިއަކަށް އަޅާފައި ކާންދޭން ބުނެފިއްޔާ ވަރަށް އުނދަގޫވާނެ އެކަން ބަލައިގަންނަން. އެހެން ނަމަވެސް ތަރުކާރީގެ ސިފައިގައި، އެކިއެކި ވިހަ މާއްދާތައް އެކުލަވައިގެން އުފެއްދިފައި ހުރި، ނުވަތަ އެކަށީގެން ނުވާ ގުރޯތު ހޯމޯން، މިދަންނަވާ ތަރުކާރީ މޭވާގެ ތެރޭގައި ހިމެނިގެން އައިސް އެ ކެވިގެން، އޭގެ ނަތީޖާއެއްގެ ގޮތުން، ވަރަށް ޅައުމުރުގައި އަންހެން ބޭފުޅުންގެ މޫނުމަތީގައި ފެންނަން ނުޖެހޭ އިސްތަށި ފެނި، އެފަރާތްތަކުގެ ރީތިކަަމަށް ބުރޫއަރައިގެން ދިއުމަކީ ހަމަ ފެންނަ ކަމެއް،" އިބްރާހީމް ވިދާޅުވި އެވެ.

އެއީ ވަރަށް ދެރަކަމެއް ކަަމަށާއި އެއީ "ޕްރިވެންޓް ކުރަން ޖެހޭ" ކަންކަން ކަމަށް ވެސް އޭނާ ވިދާޅުވި އެވެ. ޅައުމުރުގެ ކުދިންނަށް ވެސް އެ މައްސަލަ ކުރިމަތިވާ ކަމަށާއި އެކަމުގެ ސަބަބުން އެކުދިން ބުލީގެ ޝިކާރައަކަށްވާ ކަަމަށް ވެސް އޭނާ ވިދާޅުވި އެވެ.

ހެލްތު ބިލަށް މިއަދު ބަހުސް ކުރައްވަމުން ވަރަށް ގިނަ މެންބަރުން ސިސްޓަމުގައި ހުރި މައްސަލަތައް ވަނީ ފާހަގަކޮށްފަ އެވެ. އެގޮތުން، އަޅާލާނެ މީހަކު ނެތިގެން ލ. ގަމުގައި މަރުވި ބިދޭސީއެއްގެ މައްސަލަ ވެސް މެންބަރަކު ވަނީ ފާހަގަކޮށްފަ އެވެ.