ރާއްޖޭގެ މާލީ ހާލަތު ދެނެގަތުމަށް ރައްޔިތުންގެ މަޖިލީހުގެ މާލިއްޔަތު ކޮމިޓީން ފަށާފައިވާ މަސައްކަތްތަކަށް މައުލޫމާތު ހޯދުމުގެ ގޮތުން އޮޑިޓާ ޖެނެރަލް ހުސައިން ނިޔާޒީ އާއި މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރު އަލީ ހާޝިމް އެ ކޮމިޓީއަށް ހާޒިރުކުރަން ނިންމައިފި އެވެ.

މިއަދު ބޭއްވި މާލިއްޔަތު ކޮމިޓީގެ ތިންވަނަ ބައްދަލުވުމަކީ ފިނޭންސް މިނިސްޓަރު ޑރ. ޑރ. މުހައްމަދު ޝަފީގު ހާޒިރުވާން ޖެހޭ ބައްދަލުވުމެކެވެ. ނަމަވެސް, ބަލިވެ އުޅުއްވާތީ އޭނާ މިއަދު ކޮމިޓީއަށް ހާޒިރުވެވަޑައިނުގަންނަވަ އެވެ.

ކޮމިޓީގެ ބައްދަލުވުމުގައި މަޖިލީހުގެ ނައިބު ރައީސް އަހްމަދު ނާޒިމް ވަނީ މާލީ ހާލަތު ދެނެގަތުމުގެ މަސައްކަތް ފުރިހަމަވާނީ އޮޑިޓާ ޖެނެރަލާއި ގަވަރުނަރު ހާޒިރުކޮށްގެން ކަމަށް ވިދާޅުވެފަ އެވެ. އަދި, އެކަން އެގޮތަށް ކުރުމަށް އޭނާ ހުށަހެޅުއްވުމުން ބާރަށު ދާއިރާގެ މެންބަރު އިބްރާހިމް ޝުޖާއު ތާއިދުކުރެއްވި އެވެ.

"މި މަސައްކަތް ފުރިހަމަ ކުރަން އެ ބައްދަލުވުންތަކަށް ދައުވަތު ދީ އެ ބޭފުޅުން ކޮމިޓީއަށް ހާޒިރުކޮށް ބަސް އެހުމަށް ފަހު އެކަށީގެންވާ ނިންމުމެއް ނިންމޭނީ. އަދި މައުލޫމާތު ވެސް ފުރިހަމަވާނީ އޮޑިޓާ ޖެނެރަލް އާއި ގަވަރުނަރު އެވިޑެންސް ދެއްވައިގެން," ނާޒިމް ވިދާޅުވި އެވެ.

ކޮމިޓީ ސިއްރު ކުރުމާ ގުޅިގެން މިއަދުގެ ކޮމިޓީގައި ރާއްޖޭގެ މާލީ ހާލަތާ ގުޅޭގޮތުން ކުރާ މަޝްވަރާތަކުގެ ތަފްސީލެއް އެނގެން ނެތެވެ.

އެހެނިހެން ކަންކަމުގެ ތެރެއިން އޮޑިޓު އޮފީހުން ބައެއް މައުލޫމާތުތައް ސާފުކުރަން މިއަދުގެ އެޖެންޑާގައި ވަނީ ހިމަނާފަ އެވެ.

މާލިއްޔަތު ކޮމިޓީ އަކީ ދައުލަތުގެ މާލިއްޔަތާ ގުޅޭ ކަންތައްތައް ހިނގާ ނުހިނގާ ގޮތް ބަލަން މަޖިލީހުގައި އޮންނަ ދާއިމީ ކޮމިޓީއެކެވެ.