ނޭޝަނަލް ޑްރަގް އޭޖެންސީ (އެންޑީއޭ) އިން މަސްތުވާތަކެތީގެ ފަރުވާ ދޭ ރިހެބިލިޓޭޝަން ސެންޓަރުގައި ހުންނަ ރިމާންޑް ސެންޓަރު ފުލުހުންގެ ސެކިއުރިޓީއާއެކު އަލުން ހިންގަން ފަށައިފި އެވެ.

ފުލުހުންގެ ފަރާތުން މިއަދު މީޑިއާތަކަށް ފޮނުވި މެސެޖެއްގައި ބުނެފައިވަނީ ހޯމް މިނިސްޓްރީގެ އިސްނެގުމާއެކު، ޑްރަގް އޮފެންޑާސް ރިމާންޑް ސެންޓަރު ހިންމަފުށީގައި އަލުން ހިންގަން ފަށާފައިވަނީ ފުލުހުން ސެކިޔުރިޓީ ބަލަހައްޓާ ގޮތަށް ކަމަށެވެ.

އެގޮތުން މަސްތުވާތަކެތި ބޭނުންކުރާ މީހުންގެ ތެރެއިން ރަނގަޅުވާން އެދިފައިވާ ހަތް މީހަކު ޖޫން 15، އިން ފެށިގެން 21 ވަނަ ދުވަހާއި ހަމައަށް ފުލުހުންގެ ފަރާތުން އެންޑީއޭއާ ހަވާލުކޮށްފައިވާކަމަށް އެ އިދާރާއިން މައުލޫމާތުދެ އެވެ.

މިވަގުތު ރާއްޖޭގައި ތިން ރިހެބިލިޓޭޝަން ސެންޓަރެއް ހިންގަ އެވެ. އެއީ ކ. ހިންމަފުށީގައި ހިންގާ ތަނަކާއި ހުޅުމާލޭގެ ހާފްވޭ ހައުސް އަދި ވެރި ރަށް މާލޭގައި ހިންގާ ސެންޓަރެކެވެ. އެ ތިން ރިހެބިލިޓޭޝަން ސެންޓަރު ވެސް ހިންގަނީ ސަރުކާރުންނެވެ.

ރާއްޖޭގައި މަސްތުވާތަކެތި ބޭނުން ކުރާ 7500 ވަރަކަށް މީހުން އުޅޭ ކަމަށް ދިރާސާތަކުން ދައްކަ އެވެ. އަދި ޖަލުގައި ވެސް އެންމެ ގިނައީ މަސްތުވާތަކެތީގެ މައްސަލަތަކުގައި ހުކުމް ތަންފީޒު ކުރާ މީހުންނެވެ. އެގޮތުން, ޖަލުގެ އާބާދީގެ 80 ޕަސެންޓަކީ މަސްތުވާތަކެތި ބޭނުން ކުރުމާއި މަސްތުވާތަކެއްޗާ ގުޅުން ހުރި ކުށްތަކުގައި ހުކުމްކޮށްފައިވާ މީހުންނެވެ.