ކުޅުދުއްފުށީގައި ބޮޑު އީދު މަށިމާލި ޕެރޭޑުގައި ސަރުކާރުން މަސްވެރިކަން މެނޭޖް ކުރާ ގުޅޭ ގޮތުން ދައްކާލި ފާޑުކިޔުންތައް ބަލައިގަންނަ ކަމަށް ފިޝަރީޒް މިނިސްޓަރު އަހުމަދު ޝިޔާމް ވިދާޅުވެއްޖެ އެވެ.

ޝިޔާމް "އެކްސް" ގައި ކުރެއްވި ޕޯސްޓެއްގައި ވިދާޅުވީ ކުޅުދުއްފުށީ މަށިމާލި ޕެރޭޑަކީ ޢީދުގެ އުފާވެރި ޖައްވުން އަބަދުވެސް ގިނަބައެއްގެ ސަމާލުކަން ހުއްޓޭ ހަރަކާތެއް ކަމަށެވެ.

ސަރުކާރުތަކުގެ ބައެއް ސިޔާސަތަައް ފާޑުކިޔުމާއި ވައުދުތައް ހަނދާންކޮށްދޭ ފުޅަނދުތަކަކީ ބިނާކުރުވަނިވި ފާޑުކިޔުން އަދި މެސެޖުތަކެއްގެ ގޮތުގައި ދެކޭ ކަމަށް ވެސް ޝިޔާމް ވިދާޅުވި އެވެ.

ކުޅުދުއްފުށި މަށިމާލި ޕެރޭޑުގައި މިފަހަރު ވެސް ގައުމަށް ދިމާވެފައިވާ ބޮޑެތި މައްސަލަތަކާއި, ސިޔާސީ ޖޯކުތައް ހިމެނޭހެން ގިނަ މާލިތައް ނެރެފައިވެ އެވެ.

ނަމަވެސް މި އަހަރު އެންމެ ބޮޑު ސަމާލުކަމެއް ދީފައިވަނީ މަސްވެރިންނަށް ދިމާވެފައިވާ ގޮންޖެހުންތަކާއި, ސަރުކާރުން މަސްވެރިންނަށްވީ ވައުދުތަކާ ގުޅުންހުރި މާލިތަކަށެވެ.

މަސްވެރިންނަށް މިޔަރުގެ އުނދަގޫ ބޮޑުވެފައިވާކަން ދައްކަން, ބޮޑު މިޔަރެއް, އިންސާނަކު ކާލާ މަންޒަރު ދައްކުވައިދޭ މާއްޔެއް ހިމަނާފައިވެ އެވެ. އަދި ސަރުކާރުންވީ ވައުދުތަކަށް އަލިއަޅުވާލާ, "ށިޔާމަށް ނޭޅުނު ފަރުމަސް ބޮއި", "ނުނިމުނު މެއި މަސް, އަދި "ވައުދު ކަނދުފަތި" މާލި ވެސް ޕެރޭޑުގައި ހިމެނެ އެވެ.

މަސްވެރިންނަށް ފައިސާ ދިނުން ލަސްވެފައިވާކަން ހާމަކޮށް "މަސް ބުހުތާން ނަން ކިރާ މަހުގެ ރުފިޔާ ދެވޭނީ 48 ދަރިން ވިހާފަހުން" އަދި "ޗަކޮއި ލާރިކޮޅު ކޮބާ" މާލި ހިމެނެ އެވެ.

ލޭނު އަޅައިގެން ބޮޑު ކަންނެލި ބޭނުމުގެ ހުއްދަ ސަރުކާރުން ދޭން އުޅޭތީ އެކަމާ ދެކޮޅަށް 35 ދޯންޏާއެކު މަސްވެރިން މިދިޔަ ބުދަ ދުވަހު މާލެ ފަޅުގައި މުޒާހަރާ ކުރި އެވެ.

އެ މުޒާހަރާ ނިންމާލީ މަސްވެރިންގެ ބައެއް ޑިމާންޑުތަކަށް ސަރުކާރުން އެއްބަސްވެ، މަސްވެރިންނަށް ޑީސަލް ވިއްކާ އަގު އެއްގަމު ޝެޑުތަކާ އެއްހަމަ ކޮށްދޭން ނިންމުމުންނެވެ. އަދި މަސްވެރިންގެ ޑިމާންޑާ އެއްގޮތަށް އެ މުޒާހަރާ އޮތް ސަރަހައްދަށް މިނިސްޓަރު ޝިޔާމް ވަޑައިގެން މަސްވެރިންނާ ބައްދަލު ވެސް ކުރެއްވި އެވެ.

ކުޅުދުއްފުށީގެ ހުރިހާ އުމުރުފުރާއެއްގެ އެންމެންހެން ބައިވެރިވާ, "މަށިމާލި" ގޮތުގައި މާލިތައް ތައްޔާރުވެގެން ބާއްވާ މި ޕެރޭޑަކީ ޒަމާނުއްސުރެން ކޮންމެ ބޮޑު އީދާ ދިމާކޮށް ވަޅު އީދު ދުވަހު އެ ރަށުގައި ބާއްވާ ހަރަކާތެކެވެ. މަށިމާލިތަކާއެކު މުޅި ޕެރޭޑްގެ ސަމާލުކަން ލިބެނީ އޭގައި ބައިވެރިވާ އުފެއްދުންތެރި ފުޅަނދުތަކަށެވެ.