ދިރާގުގެ "ވިން އަ ޓެސްލާ" ޕްރޮމޯޝަނުގެ ދަށުން ދޭ ޓެސްލާ ކާރު ލިބުނު މުސްތަފާ މުހައްމަދު، 50, އަށް ކުރެވެނީ ވަރަށް އުފާވެރި އިހުސާސުތަކެއް ކަމަށް އޭނާ ބުނެފި އެވެ.

"އަދަދު" އާ ވާހަކަ ދައްކަމުން މުސްތަފާ ބުނީ ޓެސްލާ ލިބޭނެ ކަމުގެ އުންމީދު އޮތް ކަމަށާއި އެކަމަށް އުންމީދު ކަނޑާ ނުލާ ހުއްޓާ ލިބުމުން ވަކިން އުފާވި ކަމަށެވެ.

މީގެ ކުރިން އެއްވެސް ފަހަރަކު ލަކީޑްރޯއަކުން އިނާމެއް ލިބިފައި ނުވާ މުސްތަފާއަށް އުމުރުގައި ވެސް ލިބުނު ހަމައެކަނި މިފަދަ އިނާމަކަށް ވެގެން ގޮސްފައި ވަނީ ޓެސްލާ ކަމަށް އޭނާ ވަނީ ބުނެފަ އެވެ.

"ޓަސްލާފައި އެއްޗެއް ލިބުނީމަ ވަރަށް އެހެން ކަހަލަ އިހުސާސްތަކެއް ކުރެވުނު. ވަރަށް އުފާވި. ހެއްދެވި ފަރާތަށް ވަރަށް ޝުކުރުވެރިވަން މިފަދަ ނިއުމަތެއް އަޅުގަނޑަށް ދެއްވީތީ،" މުސްތަފާ ބުންޏެވެ.

މޯލްޑިވްސް ކަސްޓަމްސް ސާވިސްގައި މަސައްކަތް ކުރާ މުސްތަފާއަށް ޓެސްލާ ލިބުނުކަން އެނގުނީ އޭނާގެ ރަށް ތުލުސްދޫއަށް އޮފް ދުވަހަށް ގޮސް ހުއްޓަ އެވެ.

މުސްތަފާ ބުނީ އޭނާ ދައްތައެއްގެ ގޭގައި ސައިބޯން ހުއްޓާ ޓެސްލާގެ ގުރުން އޭނާ ހޮވިގެން ދިރާގުުން ގުޅުމުން ފުރަތަމަ ގަބޫލު ވެސް ނުކުރެވުނު ކަމަށެވެ. ނަމަވެސް ސޯޝަލް މީޑިއާއިން އެކަން ކަށަވަރު ކުރެވުނު ކަމަށް މުސްތަފާ ބުންޏެވެ.

"އަޅުގަނޑަށް ކުރިން ވެސް އެނގިފައި އޮތީ ދިރާގުން މެސެޖު ކުރީމަ ދިރާގު އީދު ޝޯގައި ޓެސްލާގެ ގުރު ނަގާކަން. ދައްތައެއް ގޭގައި ސައިބޯން ހުއްޓާ އެމީހުން ގުޅީ. ފުރަތަމަ ގަބޫލެއް ނުކުރަން. ނެޓުން އަޅުގަނޑަށް ޔަގީންވީ ކާރު އަޅުގަނޑަށް ލިބުނުކަން،" މުސްތަފާ ބުންޏެވެ.

ޓެސްލާއަށް ހަދާނެ ގޮތަކާމެދު ވިސްނާނީ އާއިލާއާ މަޝްވަރާ ކުރުމަށްފަހުކަން ފާހަގަކޮށް މުސްތަފާ ބުނީ އޭނާ އަތުގައި ކާރު އަދި ސައިކަލު ދުއްވުމުގެ ލައިސަންސް އޮތުމާއެކު، ކާރު ދުއްވުން ވެސް އެކަށީގެންވާ ކަމަށެވެ.

މުސްތަފާއަށް ލިބުނީ ޓެސްލާ މޮޑެލް ތިނެއްގެ ހުދު ކުލައިގެ އިލެކްޓްރިކް ކާރެކެވެ. އަދި މިއީ މިހާތަނަށް ރާއްޖޭގައި ހިންގި ޕްރޮމޯޝަނަކުން ލިބުނު އެންމެ އަގު ބޮޑު އިނާމެވެ.

ދިރާގުން މި ޕްރޮމޯޝަން ހިންގީ އެ ކުންފުނީގެ 35 ވަނަ އަހަރާ ދުވަހާ ގުޅުވާ ހިންގި ހާއްސަ ޕްރޮމޯޝަނެއްގެ ގޮތުގަ އެވެ. މި ޕްރޮމޯޝަނަށް ގިނަ ބަޔެއްގެ ތަރުހީބު ލިބުނު ކަމަށް ދިރާގުން ބުނެފައިވެ އެވެ.