ބާލިން (ޖޫން 16) - ސްޕެއިންގެ ޑިފެންޑަރު ޑެނީ ކާވަހާލް ގައުމީ ޓީމަށް ޖަހައިދިން ފުރަތަމަ ގޯލު ޖެހިއިރު، ބޭނުންކުރި ޖޯޒީ، އޭނާއާ އެކު ކްލަބް ލެވަލްގައި އެ ޓީމަށް ކުޅޭ ކްރޮއޭޝިއާގެ ކެޕްޓަން، ލޫކަ މޮޑްރިޗަށް ދީފި އެވެ.

ކްލަބް ލެވަލްގައި މި ދެ ކުޅުންތެރިންނަކީ ސްޕެއިންގެ ގަދަ ބާރު ރެއާލް މެޑްރިޑަށް ކުޅެމުން އަންނަ ދެ ކުޅުންތެރިންނެވެ. އެ ޓީމުގެ ކެޕްޓަނުންގެ ލިސްޓުގައި ވެސް މި ދެ ކުޅުންތެރިން ހިމެނެ އެވެ.

މި ދެ ކުޅުންތެރިން ވަނީ ކުލަބް ލެވަލްގައި އެއްކޮށް ގިނަ މެޗުތަކެއް ކުޅެފަ އެވެ. އިއްޔެ، ޔޫރޯ ފުޓްބޯޅަ މުބާރާތުގައި، ސްޕެއިނުން ކްރޮއޭޝިއާގެ މައްޗަށް 3-0 ގެ ނަތީޖާ އަކުން ކުރިހޯދި މެޗުގައި ކާވަހާލް ޖެހި ގޯލަކީ އޭނާ ގައުމީ ޓީމަށް ކާމިޔާބުކުރި ފުރަތަމަ ގޯލެވެ.

އެހެންވެ, ކާވަހާލް ބޭނުންވީ އޭނާގެ ޖާޒީ އޭނާގެ އަތުގައި ހަނދާނަކަށް ބޭއްވުމަށެވެ. އެކަމަކު، މެޗު ނިމުމުން މޮޑްރިޗް ވަނީ ކާވަހާލްގެ ޖާޒީ ބޭނުންވާ ކަމަށް އޭނާގެ ގާތު ބުނެފަ އެވެ. އެއާއެކު ކާވަހާލް ވަނީ އޭނާގެ ޖާޒީ މޮޑްރިޗަށް ދީފަ އެވެ.

"އަހަރެން ބޭނުންވީ ގައުމީ ޓީމަށް ފުރަތަމަ ގޯލު ޖެހެ ޖާޒީ އަހަރެންގެ އަތުގައި ބައިންދަން. އެކަމަކު މޮޑްރިޗް އަހަރެން ގާތު ޖާޒީ ދޭން ބުނުމުން އެއްވެސް ވިސްނުމެއް ނެތި އަހަރެން މޮޑްރިޗަށް އެ ޖާޒީ ހަދިޔާ ކުރީ. މޮޑްރިޗަކީ އަހަރެންގެ ވަރަށް ގާތް އެކުވެރި އެއް އަދި އަހަރެންގެ ޓީމް މޭޓް." ކާވަހާލް ބުންޏެވެ.

ކާވަހާލް އަކީ މި ފަހަރުގެ ޔޫރޯގައި ސްޕެއިން ޓީމަށް މުހިންމު ރޯލެއް ކުޅޭނެ ކުޅުންތެރިއެއް ކަމަށް އެ ޓީމުގެ ކޯޗު ލުއިސް ޑެ ލަ ފުއެންޓޭ ވަނީ ބުނެފަ އެވެ.