އީދު ފާހަގަކުރުމުގައި ދިވެހިންގެ ރީތި އާދަކާދަތަކާއި ބީރައްޓެހި ސަގާފަތްތައް މަސްހުނިނުކޮށް އިސްލާމީ ރިވެތި އަހުލާގާއި އުސޫލުތަކުގައި ހިފެހެއްޓުމަށް ރައީސުލްޖުމުހޫރިއްޔާ ޑރ. މުހައްމަދު މުއިއްޒު އިލްތިމާސްކުރައްވައިފި އެވެ.

މިއަހަރުގެ އަޟްހާ އީދުގެ މުނާސަބަތުގައި ފޮނުއްވި ތަހުނިޔާގެ ހިތާބުގައި ރައީސް ވަނީ ވަނީ ހެޔޮ އަމަލުކުރުމަށާއި މެހްމާންދާރީ އަދާކޮށް ސަދަގާތް ކުށް ހެޔޮ ދުއާކޮށްދިނުމުގެ އިތުރުން ނުތަނަވަސްކަން ފިލުވައިދިނުންފަދަ ރަނގަޅު އަމަލުތައް ކުރުމަށް ހަނދާން ކޮށްދެއްވާފަ އެވެ.

އީދު ފަދަ މުނާސަބާތަކުގައި އެކަކު އަނެކަކުގެ ހާލުބަލައި އިޖްތިމާއީ ރޫހު އާލާކޮށް، ކުޅިވަރުކުޅެ އުޅުމަށް ރައީސް ވަނީ ބާރުއަޅުއްވާފަ އެވެ. އަދި އީދު ފަދަ ކޮންމެ މުނާސަބާއެއްގައި އިސްލާމްދީނާއި ދިވެހިވަންތަކަމަށްޓަކައި ފަހުރުވެރިވާން ދަރީންނަށް އުނގަންނައިދީ، އިސްލާމީ ރިވެތި އާދަތަކަށް ދަރީން ހޭނުވުމަށް ހާއްސަ ސަމާލުކަމެއް ދިނުމަށް ރައީސް މުއިއްޒު ވަނީ ހިތާބުގައި އިލްތިމާސްކުރައްވާފަ އެވެ.

އޭގެ އިތުރުން މިއަހަރު އީދު ފާހަގަކުރާއިރު އެންމެ އިސްކުރަންޖެހޭނީ ފަލަސްތީނުގެ ރައްޔިތުންނަށް ހެޔޮ ދުއާ ކޮށްދިނުންކަން އެމަނިކުފާޏު ފާހަގަކުރެއްވި އެވެ. އަދި ދިވެހިރާއްޖެ އަބަދުވެސް ދެމިއޮންނާނީ، ފަލަސްތީނުގެ މުސްލިމުންނަށް ދެމުންގެންދާ ބޮޑެތި އަނިޔާތަކާ ދެކޮޅުހަދައި، މަސްޖިދުލްއަގްސާ މިނިވަންކުރުމުގެ މަތިވެރި ޖިހާދުގައި ކަމަށް ރައީސް ވިދާޅުވި އެވެ.

"ދިވެހީންގެ ހިތްތަކުގައި ހާއްސަ ލޯތްބަކާ ކުލުނެއް ދެވިފައިވާ ފަލަސްތީނުގެ މުސްލިމް ކޮންމެ އާއިލާއަކާ، ކޮންމެ ކުޑަކުއްޖަކަށްޓަކައި ހެޔޮ ދުއާތައް ތަކުރާރު ނުކޮށް، އެ ހަނދާންތައް އައުނުކޮށް، އެންމެ ރެޔަކާ ދުވާލެއްވެސް އަޅުގަނޑުމެން ދުލެއް ނުކުރާނެ،" ރައީސް މުއިއްޒު ވިދާޅުވި އެވެ.

މާލެ ސަރަހައްދުގައި ވެސް އީދު ފާހަގަކުރުމަށް ގިނަ ހަރަކާތްތަކެއް ކުރިއަޑް ގެންދިއުމަށް މާލެ ސިޓީ ކައުންސިލުން ވަނީ ނިންމާފަ އެވެ. އެގޮތުން މާލެ، ވިލިމާލެ އަދި ހުޅުމާލޭގައި ވެސް އީދުގެ ކުލަގަދަ ހަރަކާތްތައް މާދަމާއިން ފެށިގެން ކުރިއަށްދާނެ އެވެ.