މިއުނިކް (14 ޖޫން) – ޔޫރޯގެ ފުރަތަމަ މެޗުގައި މިރޭ ސްކޮޓްލެންޑް ދެކޮޅަށް މުބާރާތް ބާއްވާ ގައުމު ކަމަށްވާ ޖަރުމަނުން ނުކުންނައިރު، ޕްރެޝަރު އޮތީ ޖަރުމަނަށް ކަމަށް އެ ޓީމުގެ ކޯޗު ޖޫލިއަން ނާގަލްސްމަން ބުނެފި އެވެ.

ޔޫރޯ ތިން ފަހަރު ހޯދާފައިވާ ޖަރުމަންގެ އަމިއްލަ ދަނޑުގައި މުބާރާތް ބާއްވާއިރު، އެ ގައުމުގެ ސަޕޯޓަރުންގެ އުންމީދުތައްވެސް ހުރީ މަތީގައެވެ.

މިރޭގެ މެޗުގެ ކުރިން މީޑިއާއާ ވާހަކަދައްކަމުން ނާގަލްސްމަން ބުނީ ސްކޮޓްލެންޑަށް ވުރެ ޕްރެޝަރު ބޮޑީ ޖަރުމަނަށް ކަމަށެވެ. އެކަމަކު، ޖަރުމަން އޮތީ މެޗަށް ރަނގަޅަށް ތައްޔާރަށް ކަމަށެވެ.

"އަހަރެން މި ތިބީ ތައްޔާރަށް، ރަނގަޅު ފޯމެއްގައި. ކުޅުންތެރިން ކުޑަކޮށް ފިނިވެފައި ތިބީ. އެކަމަކު މި ކަހަލަ މެޗަކަށް ނުކުންނައިރު އެއީ މައްސަލައެއް ނޫން،" ކުރިން ބަޔާން މިއުނިކް އާއި އާރްބީ ލައިޕްޒިގަށް ކޯޗުކޮށްދިން ނާގަލްސްމަން ބުންޏެވެ.

"ޕްރެޝަރު ބޮޑީ ޖަރުމަނަށް. އެހެންވީމަ ސްކޮޓްލެންޑުން ބަލާނެ އެކަމުގެ ފައިދާ ނަގަން."

ޖަރުމަންގެ ސްކޮޑްގައި ހިމެނޭ ބަޔާން މިއުނިކްގެ މިޑްފީލްޑަރު އެލެކްސަންޑާ ޕަވްލޮވިޗް ޓޮންސިލްގެ މައްސަލައަކާ ގުޅިގެން ބުދަ ދުވަހު ޖަރުމަންގެ ޓީމުން ވަކިވެފަ އެވެ. އޭނާގެ ބަދަލުގައި ޓީމުގައި ހިމެނީ ބޮރޫޝިއާ ޑޯޓްމަންޑަށް ކުޅޭ ތަޖުރިބާކާރު މިޑްފީލްޑަރު އެމްރޭ ޗާން އެވެ.

މި މެޗަށް ނުކުންނައިރު ޖަރުމަންގައި މިހާރު އޮތް ސްކޮޑުގެ އަނިޔާގެ މައްސަލައެއް ނެތެވެ.

ސްކޮޓްލެންޑްގެ ކޯޗު ސްޓީވް ކްލާކް ބުނީ ސްކޮޓްލޭންޑް އިން ހުރިހާ ޓީމަކަށް އިހުތިރާމްކުރިޔަސް، އެއްވެސް ޓީމެއް ދެކެ ޖެހިލުންނުވާނެ ކަމަށެވެ.

"އަހަރަމެންނަށް އެނގޭ އެ ޓީމު (ޖަރުމަން) ވަރަށް ވަރުގަދަކަން. އެކަމަކު އުންމީދަކީ މިރޭ އަހަރަމެންގެ ފެންވަރުވެސް ދައްކާލުން،" ކްލާކް ބުންޏެވެ.

"އަހަރެން އަބަދުވެސް ގަބޫލްކުރާ އުސޫލަކީ އެންމެނަށްވެސް އިހުތިރާމްކުރުން، އެކަމަކު އެއްވެސް ބަޔަކު ދެކެ ބިރު ނުގަތުން."

މުބާރާތުގެ ކުރިން ސްކޮޓްލެންޑަށް އަނިޔާގެ މައްސަލަތައް ކުރިމަތިވިޔަސް، މި ވަގުތު އޮތް ސްކޮޑް އޮތީ މުޅިން ފިޓުކޮށެވެ.

މިއީ ސްކޮޓްލެންޑް ޔޫރޯގައި ޖެހިޖެހިގެން ވާދަކުރާ ދެވަނަ އަހަރެވެ. އެންމެ ފަހުން 2021 ވަނަ އަހަރު އޮތް ޔޫރޯގައި 1998 ވަނަ އަހަރު ފީފާ ވޯލްޑް ކަޕަށްފަހު ސްކޮޓްލެންޑް ކުޅުނު ބައިނަލްއަޤްވާމީ ފުރަތަމަ މުބާރާތެވެ.

ފާހަގަކޮށްލެވޭ ސްޓެޓްސް:

• މިއީ ޖަރުމަނާއި ސްކޮޓްލެންޑް ބައިނަލްއަޤްވާމީ މުބާރާތެއްގައި ވާދަކުރާ ތިން ވަނަ ފަހަރު. އެއީ 1986 ވަނަ އަހަރުގެ ވޯލްޑް ކަޕާއި 1992 ވަނަ އަހަރުގެ ޔޫރޯ. ދެ މެޗުވެސް ކާމިޔާބުކުރީ ޖަރުމަން.

• ޖަރުމަނާ ދެކޮޅަށް އެންމެ ފަހުން ކުޅުނު 13 މެޗުގެ ތެރެއިން ސްކޮޓްލެންޑް މޮޅުވީ އެންމެ މެޗަކުން. އެއީ 1999 ވަނަ އަހަރު ކުޅުނު އެކުވެރިކަމުގެ މެޗެއް. ޖަރުމަން 8 މެޗުން މޮޅުވެފައިވާއިރު ހަތަރު މެޗު ވަނީ އެއްވަރުވެފައި.

• މިއީ ޖަރުމަން ޔޫރޯގައި ވާދަކުރާ 14 ވަނަ ފަހަރު. އިތުރު ޓީމެއް މިއަދަދަކަށް ނާރާ

• މިއީ ޖަރުމަނުން އަމިއްލައަށް ހޯސްޓްކުރާ ބައިނަލްއަޤްވާމީ ހަތަރު ވަނަ މުބާރާތް. މީގެ ކުރިން ތިން ފަހަރުވެސް ސެމީ ފައިނަލާ ހަމައަށް ޖަރުމަން ދަތުރުކުރި. އަމިއްލަ ގައުމުގައި 1970 ވަނަ އަހަރުގެ ވޯލްޑް ކަޕް ކާމިޔާބުކުރިއިރު، 1988 ވަނަ އަހަރުގެ ޔޫރޯގެ ސެމީއަށް ދަތުރުކުރި. އަދި 2006ގެ ވޯލްޑް ކަޕްގެ ސެމީއަށް ދަތުރުކުރި.

• މިއުނިކްގައި ޖަރުމަން އެންމެ ފަހުން ކުޅުނު ފަސް މެޗުގެ ތެރެއިން މޮޅުވީ އެންމެ މެޗަކުން. އެއީ 2020 ވަނަ އަހަރުގެ ޔޫރޯގައި ޕޯޗުގަލް އަތުން.