ގްރޭޑް ހައަކުން މަތީގެ ދަރިވަރުންނަށް ހުކުރު ނަމާދު، ކޭތަ ނަމާދު، އަދި އީދު ނަމާދުގެ އިމާމުކަން ކުރެވޭ ގޮތަށް އުސޫލެއް އިސްލާމިކް މިނިސްޓްރީން މިއަދު ނެރެފި އެވެ.

"ދިވެހިރާއްޖޭގައި އިމާމުވެ ހުކުރުނަމާދާއި އީދު ނަމާދާއި ކޭތަ ނަމާދު ކުރުމަށް ހުއްދަ ދިނުމުގެ އުސޫލު" ނަމުގައި ނެރުނު އުސޫލުގައި ވަގުތީ ހުއްދަ ދޫކުރެވޭނެ ހާލަތްތަކެއް ހިމަނާފައިވެ އެވެ.

ގްރޭޑް ހައަކުން މަތީގެ ދަރިވަރުންނަށް ހުއްދަ ދޫކުރުން ހިމަނާފައިވަނީ މި ވަގުތީ ހުއްދަ ދޫކެރެވޭ ހާލަތްތަކުގެ ތެރޭގަ އެވެ.

އޭގައި ބުނާ ގޮތުން، ގްރޭޑް ހައަކުން ފެށިގެން މަތީ ގްރޭޑުތަކުގައި ތައުލީމު ހާސިލުކުރަމުންދާ ދަރިވަރުންގެ ތެރެއިން ރީތިކޮށް ގުރުއާން ކިޔަވަން ދަންނަ އަަދި ނަމާދުގެ ހުކުމުތައް ދަންނަ ދަރިވަރުންނަށް ވަގުތީ ހުއްދަ ދޫކުރެވޭނީ ތަމްރީނު ދިނުމުގެ ބޭނުމުގަ އެވެ.

އެ ރަށެއްގައި ނުވަތަ ސިޓީއެއްގައި ދާއިމީ ހުއްދަ އޮތް މީހަކު ލިބެން ދެން ވަގުތީ ހުއްދަ ދޫކުރެވޭނެ އުސޫލުތަކެއް ވެސް އޭގައި ހިމަނާފައިވެ އެވެ.

ވަގުތީ ހުއްދަ ހޯދުމަށް ޓަކައި ތައުލީމީ ސެޓްފިކެޓްތަކާއި، 18 އަހަރު ނުފުރޭ ނަމަ އެ ކުއްޖެއްގެ ބެލެނިވެރިންގެ އިއުތިރާޒެއް ނެތް ކަމުގެ ލިޔުމާއި، ސްކޫލް ދަރިވަރެއް ނަމަ ސްކޫލު ދަރިވަރެއްކަން އަންގައިދޭ ލިޔުން ހުށަހަޅަން ޖެހޭނެ ކަމަށް އުސޫލުގައި ބުނެ އެވެ.