ސައުދީ އަރަބިއްޔާއަށް މި އަހަރުގެ ހައްޖުގެ މަތިވެރި އަޅުކަން އަދާކުރުމަށް ގޮސް ތިބި ދިވެހިންގެ 1150 ހައްޖުވެރިންގެ ހާލު ރަނގަޅު ކަމަށް، މި އަހަރު ހައްޖަށް ގޮސް ތިބި ދިވެހިންގެ ކަންކަން ބަލަހައްޓަން އިސްކޮށް ހުންނެވި "އަމީރުލް ހައްޖު" އަދި މިނިސްޓަރު ޑރ. މުހައްމަދު ޝަފީއު ވިދާޅުވެއްޖެ އެވެ.

އެޑިއުކޭޝަން މިނިސްޓަރު ޑރ. ޝަފީއު އިސްލާމިކް މިނިސްޓްރީގެ މީޑިއާއަށް ދެއްވި ވީޑިއޯ އިންޓަވިއުއެއްގައި ވިދާޅުވީ ރާއްޖޭގައި ތިބި ދިވެހިންނަށް، ސައުދީގައި ތިބި ދިވެހިން ހައްޖުވެރިންގެ ހާލަތުގެ އާދަހަމަ ގެނެސްދެއްވަމުން ގެންދަވާނެ ކަމަށެވެ.

އެ ގޮތުން ފުރަތަމަ ދެއްވި އަދާހަމައިގެ މައުލޫމާތުގައި ވިދާޅުވީ ދިވެހި ހުރިހާ ހައްޖުވެރިން ވެސް ހާލު ރަނގަޅު ކަމަށާއި އިންތިޒާމުތައް ވަރަށް ފުރިހަމަކޮށް ހަމަޖެއްސިފައިވާ ކަމަށެވެ.

"ދިވެހި ހުރިހާ ހައްޖުވެރިންގެ ހާލު ވެސް ރަނގަޅު، ވަރަށް އޮމާންކޮށް ހުރިހާ އިންތިޒާމެއް ވެސް މިކޮޅުގައި ހަމަޖެހިފައި ހުރީ،" އަމީރުލް ހައްޖު ވިދާޅުވި އެވެ.

ސައުދީން ރާއްޖެއަށް ދޫކުރާ ހައްޖު ކޯޓާގެ އަދަދަކީ 1000 އެވެ. ނަމަވެސް ދިވެހި ސަރުކާރުން ކުރި މަސައްކަތުން އިތުރު ޖާގަ ހޯދައި 1150 ހައްޖުވެރިން ވަނީ ހައްޖަށް ފުރައިފަ އެވެ. އޭގެ ތެރޭގައި ސަރުކާރުގެ ހަރަދުގައި 50 ހައްޖުވެރިން ގޮސްފައިވެ އެވެ.

ރައީސް ޑރ. މުހައްމަދު މުއިއްޒުގެ ވެރިކަމުގެ ފަސް އަހަރުގެ ދައުރުގެ ތެރޭގައި 1،000 ފަގީރުން ހައްޖަށް ފޮނުވުމަކީ އެމަނިކުފާނުގެ ވައުދުފުޅެކެވެ. ނަމަވެސް ހައްޖަށް ފޮނުވި 50 މީހުންގެ ތެރޭގައި އާމްދަނީ ލިބޭ އަދި ވަޒީފާގައި އުޅޭ މީހުން ތިބި ކަމަށް ބުނެ ފާޑުކިޔުންތައް އަމާޒުވެފައިވެ އެވެ. އެ ލިސްޓުގައި މުއްސަނދި މީހަކު ނޫޅޭނެ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވި އެވެ.