އއ. ތޮއްޑޫ ރަށު ކައުންސިލު ކުރިމައްޗަށް އެއްވެ މުޒާހަރާކޮށް އެ ކައުންސިލް އިދާރާގެ ފުރާޅަށް ގާ އުކި މައްސަލާގައި އަށް މީހަކު ހައްޔަރުކޮށްފި އެވެ.

ފުލުހުން މިއަދު ބުނި ގޮތުގައި މި އަށް މީހުން ހައްޔަރުކުރީ ކޯޓު އަމުރެއްގެ ދަށުން މިއަދެވެ. އަދި މި މައްސަލަ ބަލަމުންދާ ކަމަށްވެސް ފުލުހުން ބުންޏެވެ. ނަމަވެސް މި މީހުން ހައްޔަރުކޮށް ބަންދުކުރީ ކިހާ މުއްދަތަކަށް ކަމެއް ނުބުންޏެވެ.

ތޮއްޑޫގައި މި މަހު ފަހެއްގައި މުޒާހަރާ ކުރީ އެ ރަށުގެ ދަނޑުބިންތައް ދަނޑުވެރިން އަތުން އަތުލަން ނިންމާފައިވާ ކަމަށް ބުނެ އެވެ.

މި މުޒާހަރާގެ ތެރެއިން ފުލުހުކަށް ވެސް އަނިޔާވި އެވެ. ފުލުސް މީހާއަށް އަނިޔާވީ މުޒާހަރާގެ ބައިވެރިން ތޮއްޑޫ ކައުންސިލުގެ ފުރާޅަށް ގާ އުކަން ފެށުމުން ކަމަށް އެ ދުވަހު ފުލުހުން ބުނެފައިވެ އެވެ.