ޕެރިސް (ޖޫން 10) - މެންޗެސްޓާ ޔުނައިޓެޑްގެ ކޯޗުކަމާ ހަވާލުވާން ޖަރުމަނުގެ ކޯޗު ތޯމަސް ޓުޗެލް އަށް ލިބުނު ފުރުސަތުގެ ބޭނުންނުހިފަން ނިންމައިފި އެވެ.

ފާއިތުވި ސީޒަނަށް ފަހު ޖަރުމަނުގެ ގަދަބާރު ބަޔާން މިއުނިކްގެ ކޯޗުކަމުން ވަކިކުރި ޓުޗެލް އަށް ޔުނައިޓެޑްގެ ވަޒީފާ ހުށަހެޅީ ދާދި ފަހުން ފްރާންސްގައި ބޭއްވި ބައްދަލުވުމެއްގެ ތެރެއިންނެެވެ.

އެ ބައްދަލުވުމުގައި ޓުޗެލްއާ މަޝްވަރާކުރީ ޔުނައިޓެޑްގެ ފުޓްބޯޅައިގެ ކަންކަމާ ހަވާލުވެހުރި އިނިއޯސް ކުންފުނީގެ ވެރިޔާ، އިނގިރޭސި މަހުޖަނު، ޖިމް ރެޓްކްލިފް އެވެ.

ޗެލްސީ އާއި ބޮރޫޝިއާ ޑޯޓްމަންޑް އަދި ޕީއެސްޖީގެ ކުރީގެ ކޯޗު ޓުޗެލް އަކީ އިިނިއޯސް ކުންފުނިން ޔުނައިޓެޑަށް ގެންނަން އެންމެ ބޭނުންވާ ކޯޗެވެ. އެކަމަކު، އޭނާ މި ވަނީ ޔުނައިޓެޑަށް މި ވަގުތު އާދެވެން ނެތްކަން އެ ކްލަބަށް އަންގައިފަ އެެވެ.

ޓުޗެލްގެ ވިސްނުމަކީ ޗެމްޕިއަންސް ލީގުގައި އޮތް ކްލަބަކާ ހަވާލުވުން ކަމަށް ޖަރުމަނުގެ މީޑިއާ ރިޕޯޓްތައް ބުނެ އެވެ.

ޔުނައިޓެޑްގެ ޓެކްނިކަލް ޑިޕާޓްމަންޓުން އަންނަނީ އެ ޓީމުގެ ކޯޗަކަށް ހުރި ނެދަލެންޑްސްގެ އެރިކް ޓެން ހާގްގެ ރިވިއު އެއް ހަދަމުންނެވެ. ރިޕޯޓްތައް ބުނާގޮތުން، މިއީ މެންޗެސްޓާ ޔުނައިޓެޑްގެ ބޯޑު މެމްބަރުންގެ އެދުމުގެ މަތިން، އެ ކްލަބްގެ ޓެކްނިކަލް ޑިޕާޓްމަންޓުން ކުރަމުން އަންނަ މަސައްކަތެކެެވެ.

މިއީ، ޓެން ހާގަށް އެ ކްލަބްގެ ކޯޗުގެ މަގާމުގައި ދެމިހުންނަން ފުރުސަތު ދިނުމާ މެދު، ގޮތެއް ނިންމަން ކުރެވޭ މަސައްކަތެކެވެ.