ދިރާގުގެ އެމްބެސެޑަރަކަށް ޖޫނިއާ ސާފިން ޗެމްޕިއަން ކަޔާން އަބްދުﷲ އަރީފް މިއަދު ހަމަޖައްސައިފި އެވެ.

އާޓިފިޝަލް ބީޗުގައި ބޭއްވި ރަސްމިއްޔާތެއްގައި ދިރާގުގެ އެމްބެސެޑާޝިޕް ކަމަށް ހަމަޖެއްސި ކަމުގެ ލިޔުން ކަޔާންއާ ހަވާލުކޮށްދެއްވީ ދިރާގުގެ ޑިރެކްޓާ، ބްރޭންޑް އެންޑް މާކެޓިން ކޮމިއުނިކޭޝަންސް މިރްޝާން ހަސަން އެވެ.

ރަސްމިއްޔާތުގައި ވާހަކަ ދައްކަވަމުން މިރްޝާން ވިދާޅުވީ ކުރިއަރަމުން އަންނަ ޒުވާން ތަރިއަކު ދިރާގާއެކު ޕާޓްނާޝިޕް ހެދުމަކީ ލިބުނު އުފަލެއް ކަމަށާއި ދިރާގުން ކުރިއަރަމުން އަންނަ ޒުވާނުންނަށް އަބަދުވެސް އެހީތެރިވާނެ ކަމަށެވެ.

ޖޫނިއާ ކެޓަގަރީން ތިން ޗެމްޕިއަންޝިޕް ކާމިޔާބުކޮށްފައިވާ އުންމީދީ ތަރި ކަޔާންއަކީ މިވަގުތު 18 އަހަރުން ދަށުގެ ރާއްޖޭގެ ޗެމްޕިއަން އެވެ.

ދިރާގުން ވަނީ މިދިޔަ މަހު ރާއްޖޭގެ އެއް ނަންބަރު ޓީޓީ ކުޅުންތެރިޔާ ދީމާ ވެސް އެ ކުންފުނީގެ އެމްބެސެޑެރަކަށް ހަމަޖައްސާފަ އެވެ.

ދީމާއަކީ ކުރިއަށް އޮތް އޮލިމްޕިކްސްއަށް ކޮލިފައިން ބުރު ފަހަނައަޅައި ގޮސް ސީދާ ގޭމްސްއިން ޖާގަ ހޯދި ފުރަަތަމަ އެތުލީޓެވެ.

ދިރާގުން ވަނީ މަޝްހޫރު އަދި ކުރިއަރަމުން އަންނަ ގިނަ އެތުލީޓުންނާއި ފަންނާނުންނާއެކު ބްރޭންޑް އެމްސެޑާޝިޕް ޕްރޮގްރާމް ކުރިއަށްގެންދަމުންނެވެ.