ދެ ވަޒީފާ އަދާ ކުރާ މީހަކު ނިކަމެތިންގެ ލިސްޓުގައި ޖަހައިގެން ދައުލަތުގެ ހަރަދުގައި ހައްޖަށް ފޮނުވުމަށްފަހު އެ ގޮތަށް ކަންތައް ދިމާވީ ކުރީ ސަރުކާރުން ހެދި ފަގީރުންގެ ލިސްޓަކަށް ބަލައިގެން މީހުން ހައްޖަށް ފޮނުވުމުން ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ވިދާޅުވެއްޖެ އެވެ.

އިސްލާމް ޓީޗަރެއްގެ ވަޒީފާ އަދި އިމާމެއްގެ ގޮތުގައި ވެސް މަސައްކަތް ކުރާ މީހަކު ނިކަމެތިންގެ ލިސްޓުގައި ޖަހައިގެން ހައްޖަށް ފޮނުވިކަން އެނގުނީ ޕީއެސްއެމްއިން އޭނާގެ އިންޓަވިއުއެއް ގެނެސްދިނުމުންނެވެ. އެއާއެކު ސަރުކާރަށް އަންނަނީ ގިނަ ފާޑުކިޔުން އަމާޒުވަމުންނެވެ.

އެ މައްސަލައިގައި ކޮމެންޓެއް ހޯދަން މި ނޫހުން ޝަހީމްއަށް ގުޅުމުން ފޯނު އަދި މެސެޖަށް ޖަވާބެއް ނުދެއްވި އެވެ. ނަމަވެސް އެހެން މީޑިއާއަކަށް ދެއްވި އިންޓަވިއުއެއްގައި ޝަހީމް ވިދާޅުވީ ރައީސް ޑރ. މުހައްމަދު މުއިއްޒުގެ ރިޔާސީ ވައުދު ފުއްދުމަށް މިފަހަރު ނިކަމެތިން ހައްޖަށް ފޮނުވީ ނޮވެމްބަރު 16، 2023، ގައި ނިމުނު ސަރުކާރުން ހެދި ލިސްޓަކަށް ބަލައިގެން ކަމަށެވެ.

"ތިއީ ކުރީ ސަރުކާރުގައި އެކުލަވާލާފައި އޮތް ލިސްޓެއް. އަަޅުގަނޑުމެން ހަވާލުވިއިރު ވެސް އޮތް ލިސްޓެއް،" އެ އިންޓަވިއުގައި ޝަހީމް ވިދާޅުވި އެވެ. "އެކަން ހިނގާފައިވާ ގޮތް ބަލަމުންދަނީ."

ޝަހީމް އެހެން ވިދާޅުވި ނަމަވެސް ފަގީރުންގެ ދަފުތަރުގައި ރަޖިސްޓްރީވުމަށް މި އަހަރު ހުރިހާ ރަށު ކައުންސިލެއް ކަހަލަ ގޮތަކަށް ވަނީ އިއުލާނުކޮށްފަ އެވެ. އަދި މާލެ ސަރަހައްދުގައި ދިރިއުޅޭ ފަގީރުން އެކަމަށް އެދި ފޯމު ހުށަހެޅުމަށް ޖެނުއަރީ، 2024، ގައި އިސްލާމިކް މިނިސްޓްރީން ވެސް އޮތީ އިއުލާނެއްކޮށްފަ އެވެ.

ސަރުކާރުން ކުރިން ބުނެފައި ވަނީ ފަސް އަހަރު ތެރޭ 1000 މީހުން ހިލޭ ހައްޖަށް ފޮނުވާނެ ކަމަށެވެ. ފޮނުވާނީ ނިކަމެތިން ކަމަށް ވެސް ސަރުކާރުން ބުނެފައިވެ އެވެ. އޭގެ ތެރެއިން މި އަހަރު ހައްޖަށް ފޮނުވަން ނިންމީ 50 މީހުންނެވެ.

ނިކަމެތިން ހައްޖަށް ފޮނުވާ މައްސަލައިގައި ބައެއް ދީނީ އިލްމުވެރިންގެ ފަރާތުން ސަރުކާރަށް ވަނީ ފާޑުކިޔުން އަމާޒުވެފަ އެވެ. އެގޮތުން، ހައްޖު ވާޖިބު ވަނީ އެކަމަށް މާލީ ގޮތުން ވެސް ކެރިކުޅަދާނަ ބަޔަކަށްވާތީ، ހަައްޖު ވާޖިބު ނޫން ބަޔަކު ދައުލަތުގެ ހަރަދުގައި ހައްޖަށް ފޮނުވުން އެންމެ ރަނގަޅު ނޫން ކަމަށް ބައެއް އިިލްމުވެރިން ބުނެފައިވެ އެވެ.