"އަހަރެންގެ ވާހަކަ ބުނެދިނީތީ ޝުކުރިއްޔާ!"

ގައުމީ ފުޓްބޯޅަ ޓީމަށް މިދިޔަ 19 އަހަރު، އޭނާ ކުޅުނުއިރު، އިންޑިއާ އާއި އެ ނޫން ވެސް އެކި ގައުމުތަކުގެ މީޑިއާތަކުން އޭނާ އަށް ދިން އެއްބާރުލުން ފާހަގަކޮށް، ގައުމީ ޓީމުން ރިޓަޔާކުރި މެޗަށް ފަހު، ސުނިލް ޗެތުރީ، 39، ހިއްސާކުރި ސިޓީގައި ލިޔެފައިވެ އެވެ.

އިންޑިއާގެ މަޝްހޫރު ސޯލްޓް ލޭކް ސްޓޭޑިއަމްގައި ރޭ 59،000 އަށް ވުރެ ގިނަ ސަޕޯޓަރުންގެ ކުރިމަތީގައި ޗެތުރީ ފަހު މެޗު ކުޅުނީ ކުވެއިތާ ދެކޮޅަށެވެ. ފީފާ ވޯލްޑް ކަޕް ކޮލިފައިންގެ މި މެޗު ނިމުނީ 0-0 އިން އެއްވަރުވެގެންނެވެ.

ޗެތުރީ، އިންޑިއާ ގައުމަށް ކުޅުން ހުއްޓާލިއިރު، 146 މެޗުން 94 ލަނޑު ޖެހި އެވެ. އޭނާ އަކީ ދުނިޔޭގެ ފުޓްބޯޅަ އަށް ބަލާއިރު، ގައުމީ ޓީމަށް ހަތަރު ވަނަ އަށް އެންމެ ގިނަ ލަނޑު ޖެހި ކުޅުންތެރިޔާ އެވެ. ޗެތުރީ އަށް ވުރެ ގިނައިން ގައުމީ ޓީމަށް ލަނޑު ޖެހީ، އީރާންގެ ލެޖެންޑް އަލީ ދާއީގެ އިތުރުުން، ޕޯޗުގަލްގެ ތަރި ކްރިސްޓިއާނޯ ރޮނާލްޑޯ އާއި އާޖެންޓީނާގެ ތަރި، ލިއޮނަލް މެސީ އެވެ.

ކުވެއިތާ ދެކޮޅަށް ރޭ ކުޅުނު މެޗަށް ފަހު ޗެތުރީ.--- ފޮޓޯ: ގެޓީއިމޭޖަސް

ދުނިޔޭގެ މައި ފުޓްބޯޅަ އިދާރާ ފީފާ އިން ވެސް ޗެތުރީ، އިންޑިއާ ޓީމުން ރިޓަޔާކުރި މެޗަށް ހާއްސަ ސަމާލުކަމެއްދިންއިރު، މެޗަށް ފަހު، މީޑިއާތަކުން ވެސް އަވަސްވީ، ޗެތުރީގެ ޝުއޫރުތައް އޮޅުންފިލުވުމަށެެވެ. އެކަމަކު، ގިނަ ސުވާލުތަކަކަށް ޖަވާބު ދިނުމުގެ ބަދަލުގައި، ރޮވިފައި ހުރި ޗެތުރީ ނިންމީ، އޭނާ މީޑިއާ އަށް ދޭ މެސެޖް ލިޔެފައި އޮތް ސިޓީއެއް ގޮތަށް ދޭށެވެ.

އެ ސިޓީގައި ޗެތުރީ ވަނީ، ގައުމީ ޓީމުގައި އޭނާ ހޭދަކުރި 19 އަހަރު ތެރޭގައި މީޑިއާ އިން އޭނާ އަށް ދިން އެއްބާރުލުން ފާހަގަކޮށްފަ އެވެ. އަދި ގައުމީ ޓީމުގެ ކެރިއަރުގައި މީޑިއާއާ އެކު ހޭދަކުރި ވަގުތުތަކާއި އޭނާގެ ކުޅުން ވަޒަންކޮށް މީޑިއާ އިން ހާމަކޮށްފައިވާ ހަގީގަތްތައް ވަރަށް ބޮޑަށް ބަލައިގަންނަ ކަމަށް ޗެތުރީ ވަނީ ބުނެފަ އެވެ.

ރިޓަޔާކުރަން ނިންމި ނިންމުމާ ބެހޭގޮތުން، ޗެތުރީ އެންމެ ބޮޑު ކަމެއްގެ ގޮތުގައި ފާހަަގަކުރީ، މިއީ އަންނަން އޮތް ޖީލުތަކުގެ ސްޓްރައިކަރުންނަށް ފުރުސަތު ދޭންވީ ވަގުތުކަމުގައި ދެކޭ ކަމަށެވެ. އެހެންކަމުން، ދެން އަންނަ ފޯވާޑުން ވެސް ގައުމީ ޒިންމާ އިސްކޮށް، އިންޑިއާ ފުޓްބޯޅަ ކުރިއަރުވާނެ ކަމަށް އުންމީދުކުރާ ކަމަށް ޗެތުރީ ވަނީ ބުނެފަ އެވެ.

އިންޑިއާ ގައުމީ ޓީމާ އެކު ޗެތުރީ ހޯދާފައިވާ ކާމިޔާބީތަކަށް ބަލާއިރު، ސާފް ޗެމްޕިއަންޝިޕްގެ ޗެމްޕިއަންކަން ހަތަރު ފަހަރު ހޯދުމާއި 2008 ވަނަ އަހަރުގެ އޭއެފްސީ ޗެލެންޖް ކަޕް ކާމިޔާބުކުރުމާއި ތިން ފަހަރު ނެހްރޫ ކަޕްގެ ޗެމްޕިއަންކަން ހޯދުމާއި ދެ ފަހަރު އިންޓަ ކޮންޓިނެންޓަލް ކަޕް ހޯދުމުގެ އިތުރުން އެއް ފަހަރު، އިންޑިއާ ޓްރައިނޭޝަންސް ސީރީސް ކާމިޔާބު ކުރުން ހިމެނެ އެވެ.

ޗެތުރީ، މީޑިއާ އަށް ދިން ސިޓީ.