މީގެ 12 އަހަރު ކުރިން، ފިނޭންސް މިނިސްޓްރީ ކުރިމަތީ ގޯޅިގަނޑު ތެރޭގައި އަބްދުލް މުހީތު (ބޮބީ) އަށް ތޫނު އެއްޗަކުން ހަމަލާދީ މަރާލި މައްސަލާގައި ދައުވާކުރި ދެ މީހަކަށް މަރުގެ ހުކުމް ކްރިމިނަލް ކޯޓުން އިއްވިތާ ފަސް އަހަރު ވީއިރު އޭގެ އިސްތިއުނާފު ހައި ކޯޓުގައި މިއަދު ވެސް ފެށޭ ގޮތެއް ނުވި އެވެ.

ގްރޫޕަކުން ހިންގި މި ނުރައްކާތެރި ކުށުގެ މައްސަލާގައި، ޅ. ނައިފަރު ޒައިތޫނިގޭ މުހައްމަދު މައިމޫނާއި ގދ. ގައްދޫ އަބްލަޣީގޭ މުހުޖަތު އަހުމަދު ނާސިހުގެ މައްޗަށް މަރުގެ ހުކުމް އިއްވީ މެއި 2019، ގަ އެވެ.

މި އަހަރުގެ ޖެނުއަރީ މަހު ހައި ކޯޓުގައި އަޑުއެހުމެއް ބޭއްވި އިރު އޭރު ވެސް ދެ މީހުނަށް ވަކީލަކު ހަމަޖެހިފައެއް ނުވެ އެވެ. ކުރިން ހަމަޖެހުނު ވަކީލަކު މައްސަލަ ދޫކޮށްލީ ކަމަށް ދެ މީހުން އެ ދުވަހު ބުނެފައިވެ އެވެ. އެ ފަހުން ވަކީލަކު ހަމަޖެއްސީ މާޗުގަ އެވެ.

މިއަދު ބޭއްވި އަޑުއެހުމުގައި ދެ މީހުން ތަމްސީލްކުރި ވަކީލު އެދުނީ އިސްތިއުނާފު ފޯމު އިސްލާހު ކުރުމުގެ ފުރުސަތު ދިނުމަށެވެ. އެކަމަކު ފަނޑިޔާރުންގެ ބެންޗުން ނިންމީ އެ ފުރުސަތު ނުދިނުމަށެވެ. އެހެން ނަމަވެސް މިއަދަށް އިސްތިއުނާފު ހުށަހަޅަން ތައްޔާރު ނުވާ ކަން ފާހަގަވާތީ ދެން އޮންނަ އަޑުއެހުމަކަށް ފަސްކުރި އެވެ. ދެން އަޑުއެހުން އޮންނާނެ ދުވަހެއް ބެންޗުން އިއުލާނެއް ކުރެ އެވެ.

ހައި ކޯޓުގައި މައްސަލައާ މިހާރު ހަވާލުވެ ބައްލަވަނީ ތިން ފަނޑިޔާރުންގެ ބެންޗަކުންނެވެ. ބެންޗުގެ ރިޔާސަތުގައި އިންނެވީ ފަނޑިޔާރު އަބްދުއްމާނިއު ހުސައިނެވެ. ދެން ތިއްބެވީ ކޯޓުގެ އިސް ފަނޑިޔާރު ހުސައިން ޝަހީދު އަދި ފަނޑިޔާރު ފާތިމަތު ފަރުހީޒާ އެވެ.

ފެބްރުއަރީ 2012، ގައި މުހީތު މަރާލި މައްސަލާގައި އިތުރު ދެ ކުއްޖަކު މައްޗަށް ޖުވެނައިލް ކޯޓުން މަރުގެ ހުކުމް އިއްވާފައިވެ އެވެ. 2013، ގައި ޖުވެނައިލް ކޯޓުން ކުރި ހުކުމް ހައި ކޯޓުން ދަމަހައްޓާފައިވެ އެވެ. އެ މައްސަލަ މިހާރު އޮތީ ސުޕްރީމް ކޯޓުގަ އެވެ.