މަޖީދިއްޔާ ސްކޫލުގައި ކިޔަވަމުން އަންނަ ދަރިވަރަކު ޓީބީއަށް ޕޮޒިޓިވް ވުމާ ގުޅިގެން، އެ ސްކޫލުގެ އެހެން ދަރިވަރުންތަކެއް ޓެސްޓުކުރަން ފަށައިފި އެވެ.

މިކަމާ ގުޅިގެން އެޑިއުކޭޝަން މިނިސްޓްރީގެ ތަރުޖަމާނު "އަދަދު" އާ ވާހަކަދައްކަވަމުން ވިދާޅުވީ، މަޖީދިއްޔާ ސްކޫލުގެ ދަރިވަރަކު ޓީބީއަށް ޕޮސިޓިވް ވުމާ ގުޅިގެން ހެލްތު ޕްރޮޓެކްޝަން އެޖެންސީ (އެޗްޕީއޭ) ގެ ޕްރޮޓޮކޯލް އަށް ފޮލޯ ކުރަމުންދާ ކަމަށެވެ.

އަދި، މިނިސްޓްރީ އާއި ސްކޫލުން މި ކޭސް އަށް އެޓެންޑުވަމުން ދަނީ އެޗްޕީއޭގެ ލަފާގެ މަތިން ކަމަށާއި ޓެސްޓު ކުރަމުންދަނީ ޓީބީއަށް ޕޮސިޓިވްވި ދަރިވަރާ ކޮންޓެކްޓުވި ދަރިވަރުން ކަމަށްވެސް އޭނާ ވިދާޅުވި އެވެ.

ރާއްޖެއިން އާންމުކޮށް ޓީބީ ނުފެނުނު ނަމަވެސް ޖަލުތަކުން ޓީބީ ފެންނަ މިންވަރު އިތުރެވެ. އެންމެ ފަހުން ސްކޫލަކުން ޓީބީ ކޭހެއް ފެނިފައިވަނީ މީގެ ދެ އަހަރު ކުރިން ސީއެޗްއެސްސީ އިންނެވެ. ދިވެހި ސަރުކާރުން މިހާރު އަމާޒު ހިފާފައިވަނީ އަންނަ އަހަރުގެ ނިޔަލަށް ރާއްޖެއިން މި ބަލި އެއްކޮށް ނައްތާލުމެވެ.

ޓީބީ ނުވަތަ ޓިއުބަކިއުލޯސިސް އަކީ މައިކްރޯބެކްޓީރިއަލް ޓިއުބަކިއުލޯސިސް ކިޔާ ޖަރާސީމަކުން ފެތުރޭ ގައިން ގަޔަށް އަރާ ބައްޔެކެވެ. ކޮންމެ އުމުރެއްގެ މީހަކަށް ވެސް ޖެހިދާނެ ޓީބީ ބަލި އާންމުކޮށް ޖެހެނީ ފުއްޕާމެޔަށެވެ. ނަމަވެސް ގޮހޮރު، މައިބަދަ، ކަށި ފަދަ ހަށިގަނޑުގެ އެހެން ގުނަވަންތަކަށް ވެސް ޓީބީ ޖެހިދާނެ އެވެ.

ޓީބީ އަކީ ރަނގަޅުކުރެވޭ ބައްޔެއްކަމަށް ވިޔަސް، އެއީ ދުނިޔޭގައި އެންމެ ގަދައަށް ފެތުރި އޭގެ ސަބަބުން އެންމެ ގިނަ މީހުން މަރުވަމުންދާ ބައްޔެވެ. ދެކުނު އޭޝިޔާ ސަރަހައްދަކީ ދުނިޔޭގެ އާބާދީގެ ހަތަރު ބައިކުޅަ އެއްބައި ކަމުގައިވެފައި، ދުނިޔޭގައި ނިސްބަތުން ޓީބީ ޖެހޭ މީހުންގެ އަދަދުގެ 43 ޕަސެންޓު މީހުން ނިސްބަތްވަނީ މި ސަރަހައްދަށެވެ. އެބަލި ޖެހި ރަނގަޅުނުކުރެވޭ މީހުންގެ 3/2 އަކީ ވެސް މި ސަރަހައްދުގެ މީހުންނެވެ.