ޖުޑީޝަލް ސާވިސް ކޮމިޝަން (ޖޭއެސްސީ) އަށް ރައްޔިތުންގެ މަޖިލީހުގެ މެންބަރުންގެ ތެރެއިން ކަނޑައަޅާ މެންބަރުގެ މަގާމަށް މާފުށީ ދާއިރާގެ މެންބަރު ހުސައިން ރިޒާ އާދަމް އައްޔަން ކުރަން ރައްޔިތުންގެ މަޖިލީހުން މިއަދު ފާސްކޮށްފި އެވެ.

ސަރުކާރު ހިންގާ ޕީއެންސީގެ ސުޕަ މެޖޯރިޓީ އޮވެގެން ފެށި ވިހިވަނަ ރައްޔިތުންގެ މަޖިލީހުގެ މިއަދުގެ ޖަލްސާގައި، ޖޭއެސްސީއަށް ރިޒާ އައްޔަން ކުރަން ފާސްކުރީ 83 މެންބަރުންގެ ވޯޓުންނެވެ. ރިޒާގެ ނަން ފާސްކުރަން ނުފެންނަ ކަމަށް އެއްވެސް މެންބަރަކު ވޯޓެއް ނުދެއްވަ އެވެ.

ޖޭއެސްސީއަށް ހުސައިން ރިޒާ އާދަމްގެ ނަން ފާސްކުރި އިރު، 18 ވަނަ ރައްޔިތުންގެ މަޖިލީހުގައި އެ ދާއިރާ ތަމްސީލު ކުރެއްވި އޭނާގެ ބޭބެ އިބްރާހިމް ރިޒާ ވެސް ވަނީ ޖޭއެސްސީގެ މެންބަރު ކަން ކުރައްވައިފަ އެވެ. 19 ވަނަ މަޖިލީހުގައި ވެސް އިބްރާހިމް ރިޒާ ތަމްސީލް ކުރައްވަމުން ދަނިކޮށް ކެންސަރު ބަލީގައި އަވާހަރަވީ މިދިޔަ އަހަރު ފެބްރުއަރީގަ އެވެ.

މިއާ އެކީ، ޖޭއެސްސީގެ އަގުލަބިއްޔަތު ވެސް މިހާރު އޮންނާނީ ޕީއެންސީއަށެވެ. އެ ކޮމިޝަނަށް ރައްޔިތުންގެ މަޖިލީހުގެ ރައީސް އަބްދުއްރަހީމާއި މެންބަރު ރިޒާ އައްޔަން ކުރުން އަދި އޮންނާނެ އެވެ. ރައީސުލްޖުމްހޫރިއްޔާގެ މެންބަރުގެ ހައިސިއްޔަތުން އެ ކޮމިޝަނުގައި ވަކީލު މުހައްމަދު ސަމީރު އިންނަވަ އެވެ. އަދި ބަންޑާރަ ނައިބު އަހުމަދު އުޝާމް ވެސް އެ ކޮމިޝަނުގައި އިންނަވާނެ އެވެ.

ޖޭއެސްސީ އެކުލެވިގެންވާ ގޮތާއި މިހާރު ތިބި މެންބަރުން

ޖުޑިޝަލް ސާވިސް ކޮމިޝަނަކީ ފަނޑިޔާރުންގެ ސުލޫކީ ކަންކަން ބެލުމާއި މަގާމުގެ ކުރިއެރުން ދިނުމާއި ވަކިކުރުމާއި އާ ފަނޑިޔާރުން އައްޔަން ކުރުމުގެ މަސައްކަތްތައް މަތިކޮށްފައި އޮންނަ މުއައްސަސާ އެވެ. އެ ކޮމިޝަނުގައި ސިޔާސީ ބޭފުޅުން ތިއްބަވާތީ އެ ކޮމިޝަން މެދުވެރިކޮށް ކޯޓުތަކަށް ސިޔާސީ ނުފޫޒު ފޯރުވުމަކީ، ކޮންމެ ވެރިކަމެއްގައި ވެސް އަމާޒުވާ ތުހުމަތެކެވެ.

މިޔަ ސަރުކާރުން ވެސް ވައުދުވެފައިވާ ގޮތަށް އެކަމަކު ނުފުއްދާފައިވާ އެ ވައުދު ފުއްދުމަކީ ރައީސް ޑރ. މުހައްމަދު މުއިއްޒުގެ ވެސް ވައުދުފުޅެކެވެ. އެމަނިކުފާނު ވިދާޅުވެފައިވަނީ އެ ކޮމިޝަނުގައި މަގާމުގެ ހައިސިއްޔަތުން އަންނަ އެއްވެސް މީހަކު ނުހިމެނޭ ގޮތަށް ކޮމިޝަނުގެ އެކުލެވުން ބަދަލުކުރާނެ ކަމަށެވެ.