މިދިޔަ އަހަރަކީ ކެރިއަރުގައި ދިމާވި އެންމެ ދަށް އަހަރު ކަމަށާއި މި ފަހަރުގެ ބޮޑީބޯޑިން ލީގުގެ ފުރަތަމަ މުބާރާތް ބުރުނު ޝިކާރުގެ ދެ ކެޓަގަރީގެ ޗެމްޕިއަންކަން ހޯދުމާ އެކު، ވަރަށް ހިތްހަމަޖެހޭ ކަމަށް ރާއްޖޭގެ އެއް ވަނަ ބޮޑީބޯޑަރު، އަލީ ހުޝްރުވާން އަހުމަދު (ކުޑަ އައްޔަ) ބުނެފި އެވެ.

މި އަހަރުގެ ގައުމީ ބޮޑީބޯޑިން ލީގުގެ ފުރަތަމަ މުބާރާތް ބުރުނު ޝިކާރުގެ މެންސް އޯޕަން އާއި ޑްރޮޕްނީ ކެޓަގަރީގެ ޗެމްޕިއަންކަން ހޯދީ ކުޑަ އައްޔަ އެވެ. މިއީ، ކުޑަ އައްޔަ، މި މުބާރާތުގެ ޗެމްޕިއަންކަން ހޯދި ފަސް ވަނަ ފަހަރެވެ. މިދިޔަ އަހަރުގެ ޗެމްޕިއަނަކީ، އަޝްރަފް ހަސަން އެވެ.

މި ފަހަރުގެ ކާމިޔާބަށް ފަހު، އައްޔަ ބުނީ، މިއީ 22 އަހަރުވީ އޭނާގެ ކެރިއަރުގައި ދިމާވި އެންމެ ދަށް އަހަރުގެ ކަންކަމުން އަރައިގަނެ، ކުރީގެ ފޯމަށް އެނބުރި ދިއުމަށް ރަނގަޅު ކާމިޔާބެއް ލިބުނު ފަހަރެއް ކަމަށެވެ.

"ވަރަށް ބޮޑަށް ހިތްހަމަޖެހިފައި މި ހުރީ. ދެ ކެޓަގަރީން ވެސް އެއް ވަނަ ލިބުނީމަ، އައްޔަ އަބަދުވެސް ބުނާ ވާހަކައެއް ކޮންމެ މުބާރާތެއްގައި ވެސް ބޭނުންވަނީ އެއް ވަނަ ހޯދަން. އެ އަޒުމުގައި ނުކުމެ މި އަހަރު ވެސް މި ހުރީ، އުފާކުރަން ބުރުނު ޝިކާރު ސީރީސް، ހަ ވަނަ ސީރީސްގެ ދެ ކެޓަގަރީން ވެސް އެއް ވަނަ ލިބުނީމަ،" ކާމިޔާބަށް ފަހު ކުޑަ އައްޔަ ބުންޏެވެ.

ކުޑަ އައްޔަގެ އިސްނެގުމާ އެކު، މީގެ އަށް ވަރަކަށްް އަހަރު ކުރިން، "ރާއްޖެ ބޮޑީބޯޑިން"ގެ ނަމުގައި، ވަނީ ރާއްޖޭގެ އެކި ސަރަހައްދުތަކުގައި ކްލިނިކްތަކެއް ހިންގައި، ޒުވާން ބޮޑީބޯޑަރުންތަކެއް އުފެއްދުމުގެ މަސައްކަތް ފަށައިގަނެފަ އެެެެވެ. އެ ގޮތުން، ފުވައްމުލަކުގައި ހިންގި، ރާއްޖެ ބޮޑީބޯޑިންގެ ކްލިނިކްތަކުގެ ފައިދާކުރާކަން، މިހާރު ބާއްވާ ގައުމީ މުބާރާތްތަކުގައި ފެންނަ އެތުލީޓުން ފެންނަ ކަމަށް ކުޑަ އައްޔަ ވަނީ ބުނެފަ އެވެ.

މި ފަހަރުގެ ބުރުނު ޝިކާރުގެ ފައިނަލްގެ ތެރެއިން ކުޑަ އައްޔަ ރާޅާ އަޅަނީ.--- ފޮޓޯ: މިރާން ނާޝިމް / އަދަދު

"ޔަންގް އެތުލީޓުން މީގެ ތެރެއިން ނުކުތީމަ ވަރަށް އުފާވޭ، އައްޔައާ އެއްވަރަށް، އައްޔަ އަށް ވުރެ މޮޅު ރާޅާ އަޅާ ކުދިން އުފެދޭތީ ވަރަށް އުފާވޭ. އެންމެ ކުރިން ވެސް ބޭނުންވާ އެއް ކަންތައް އެއީ، އަންނަ ޖެނެރޭޝަން އައްޔަ އަށް ވުރެ މޮޅަށް ރާޅާ އަޅަން.،" ކުޑަ އައްޔަ ބުންޏެވެ.

"ރާއްޖެ ބޮޑީބޯޑިން ކިޔާ އިވެންޓެއް، ޔަންގް އެތުލީޓުންނަށް ބާއްވަނީ، އޭގަ ކްލިނިކެއްގެ ގޮތުގައި ކިޔައިދެނީ، ވަރަށް އުފާކުރަން އޭގެ ތެރެއިން، އުފެދިގެން މިއައީ، ފުވައްމުލަކުން ވަރަށް ރަނގަޅު، މޮޅު އެތުލީޓުންތަކެއް، ރާއްޖެ ބޮޑީބޯޑިންގެ ނަތީޖާ ފުވައްމުލަކުން ފެންނާތީ ވަރަށް އުފާކުރަން،"

ކުޑަ އައްޔަގެ މި މަސައްކަތުގައި އެންމެ ބޮޑު އެހީތެރިއަކަށް އޮތް އެއް ބަޔަކީ، 2005 އިން ފެށިގެން އޭނަގެ ސްޕޮންސަރުންގެ ގޮތުގައި ހަރަކާތްތެރިވާ، ސީ ސްޕޯޓްސް އެވެ. ކުޑަ އައްޔަ ވަނީ، މި ފަހަރުގެ ބުރުނު ޝިކާރުގެ ޖޫނިއާ ޗެމްޕިއަން، މުހައްމަދު އަޒާން އަހުމަދު އަށް މަރުހަބާ ކިޔައިފަ އެވެ. އަޒާން ވެސް ވަނީ ސީ ސްޕޯޓްސްގެ އެމްބަސަޑަރެއްގެ ގޮތުގައި ހަމަޖައްސައިފަ އެވެ.