އައިބީސީ ވޯލްޑް ޓުއާ އިވެންޓް, މޯލްޑިވްސް ޕްރޯ ބޮޑީބޯޑިން މުބާރާތް އަންނަ އޮގަސްޓް މަހު ރާއްޖޭގައި ބާއްވަން ނިންމައިފި އެވެ.

މިދިޔަ ދެ އަހަރު ވެސް މި މުބާރާތް ރާއްޖޭގައި ބާއްވާ, ކާމިޔާބުކަމާ އެކު ނިންމާލި އެވެ. އެއާއެކު, މި އަހަރު ވެސް މި މުބާރާތް ރާއްޖޭގައި ބާއްވަން ފުރުސަތު ވަނީ ލިބިފަ އެވެ. މި އަހަރުގެ މުބާރާތް ރާއްޖޭގައި ކުރިއަށް ދާނީ އޮގަސްޓް މަހުގެ 1-9 އަށް މާލޭ ވަރުނުލާ ރާޅުގަނޑު ސަރަހައްދުގަ އެވެ.

ދުނިޔޭގެ ފެންވަރުގެ ބޮޑީބޯޑަރުން މި މުބާރާތުގައި ވާދަކުރަމުން އަންނައިރު, މިއީ ރާއްޖޭގެ ބޮޑީބޯޑަރުންނަށް ދުނިޔޭގެ ފެންވަރުގެ ބޮޑީބޯޑަރުންނާ ވާދަކުރުމުގެ ފުރުސަތު ލިބޭ މުބާރާތެކެވެ. މި މުބާރާތުގެ ފުރަތަމަ މުބާރާތުން ރާއްޖޭގެ އާމިން އުމަރު މޫސާ ފައިނަލުގައި ވާދަކުރިއިރު, މެންސް އޯޕަން ކެޓަގަރީގެ ސެމީ ފައިނަލުގައި ރާއްޖޭގައި އުފެދުނު އެންމެ މޮޅު ބޮޑީބޯޑަރު, އަލީ ޚުޝްރުވާން (ކުޑަ އައްޔަ) ވަނީ ވާދަކޮށްފަ އެވެ.

އެ ފަހަރު މި ދެ އެތުލީޓުންވެސް ވޯލްޑް ރޭންކިންގައި ބޮޑު ކުރި އެރުމެއް ލިބުނެވެ. އަދި މިދިޔަ އަހަރު ވެސް ޖޫނިއާ ކެޓަގަރީގެ ވޯލްޑް ރޭންކިންގައި އާމިން ހިމެނުނެވެ.

މިއީ ދުނިޔޭގެ ބޮޑީބޯޑިންގެ ޗެމްޕިއަނުން ކަނޑައަޅާ އައިބީސީ ވޯލްޑް ޓުއާގެ ދެ ވަނަ އަށް އެންމެ ބޮޑު މުބާރާތެވެ. ވިޒިޓް މޯލްޑިވްސް ޕްރޯގެ އެންމެ ހާއްސަ އެއް ކަމަކީ ދުނިޔޭގެ ޗެމްޕިއަން ކަނޑައެޅުމަށް ލިބޭ ޕޮއިންޓްތަކަށް ބަލާއިރު މި މުބާރާތުގެ ޗެމްޕިއަންކަން ހޯދާ އެތުލީޓަކަށް ދުނިޔޭގެ ޗެމްޕިއަންކަން ލިބުމުގެ ފުރުސަތު ބޮޑުވުމެވެ.