މިހާރު ކުރިއަށްދާ ހޭންޑްބޯލް ޗެމްޕިއަންޝިޕްގައި އަސްދިގާ ސްޕޯޓްސް ކްލަބް އަތުން ފިއުޗާ ސްޕޯޓްސް ކްލަބުން ރެކޯޑް މޮޅެއް ހޯދިއިރު، އެ ޓީމުގެ، އަހުމަދު ސައިފް ނައީމް މެޗެއްގައި އެންމެ ގިނަ ލަނޑު ޖެހުމުގެ ރެކޯޑް ހަދައިފި އެވެ.

މިއަދު ހަވީރު ގައުމީ ހޭންޑްބޯލް ކޯޓުގައި ކުޅުނު މެޗުން އަސްދިގާ އަތުން ފިއުޗާ މޮޅުވީ 88-20 އިންނެވެ. މިއީ ފިއުޗާ އިން މި ފަހަރުގެ މުބާރާތުގައި ހޯދި ދެ ވަނަ މޮޅެވެ. ފިއުޗާގެ ފުރަތަމަ މެޗުން ވަނީ ވަކަންޑާ ސްޕޯޓްސް ކްލަބް ބަލިކޮށްފަ އެވެ. އެ ޓީމު އޮތީ އެ ގްރޫޕްގެ އެއް ވަނައިގަ އެވެ.

ފިއުޗާގެ ދެ ވަނަ މޮޅު ހާއްސަވާ ސަބަބަކީ، މި މުބާރާތުގައި މެޗެއްގައި އެންމެ ގިނަ ލަނޑު ސްކޯކުރި ފަހަރެވެ.

ފިއުޗާގެ ސައިފް މި މެޗުގައި، 27 ލަނޑު ކާމިޔާބުކުރި އެވެ. މިއާ އެކު، ގައުމީ ހޭންޑްބޯޅަ ޓީމަށް ވެސް ކުޅޭ ސައިފް އަށް ވަނީ ރާއްޖޭގެ ހޭންްޑްބޯޅައިގައި ތާރީހީ ރެކޯޑެއް ލިބިފަ އެވެ.

މި މެޗުގައި، ފިއުޗާގެ މުހައްމަދު އީމާއު 16 ލަނޑު ކާމިޔާބުކުރިއިރު، އެ ޓީމުގެ އަހުމަދު ރަޒުނީ މުހައްމަދު ވަނީ 14 ލަނޑު ކާމިޔާބުކޮށްފަ އެވެ.

މި އަހަރުގެ ހޭންޑްބޯލް މޯލްޑިވްސް ޗެންޕިއަންޝިޕްގައި ޖުމްލަ އެކު، ފިރިހެން ޑިވިޝަނުގައި 10 ޓީމު ވާދަކުރެ އެވެ. ކޮންމެ ގްރޫޕަކުން އެއް ވަނަ އާއި ދެ ވަނަ ޓީމު ސެމީ ފައިނަަލަށް ދަތުރުކުރާނެ އެވެ.

މިދިޔަ އަހަރުގެ، ހޭންޑްބޯލް މޯލްޑިވްސް ޗެމްޕިއަންޝިޕްގެ އަންހެން ޑިވިޝަންގެ ޗެމްޕިއަންކަން ރެޑްހޯކްސް ސްޕޯޓްސް ކްލަބުން ހޯދިއިރު، ފިރިހެން ޑިވިޝަންގެ ތަށި ކާމިޔާބުކުރީ ކްލަބް ޒެފްރޯލް އިންނެވެ.