ބާލިން (މެއި 25) - ޖަރުމަނު ދެ ވަނަ ޑިވިޝަނުގެ ޓީމެއް ކަމަށްވާ ކައިސަސްލައުޓެން އަތުން 1-0 އިން މޮޅުވެ، ބަޔާ ލެވަކޫސަނުން ޖަރުމަނު ކަޕްގެ ޗެމްޕިއަންކަން ހޯދައިފި އެވެ

މި ފަހަރުގެ ލީގު ޗެމްޕިއަންކަން ވެސް ހޯދާފައިވަނީ މެޗަކުން ބަލިނުވެ ނިންމާލި ލެވަކޫސަނުންނެވެ. މި ސީޒަނުގައި ލެވަކޫސަން ކުޅުނު 53 މެޗުގެ ތެރެއިން ބަލިވީ އެއް މެޗުންނެވެ. އެއީ މިދިޔަ ބުދަ ދުވަހުގެރޭ، ޔޫރޮޕާ ލީގު ފައިނަލުގައި އެޓަލަންޓާ އަތުންނެވެ.

ބާލިންގެ އޮލިމްޕިކް ސްޓޭޑިއަމްގައި ރޭ ކުޅުނު މެޗުގައި ލެވަކޫސަންގެ ހަމައެކަނި ލަނޑު ޖަހައިދިނީ، މެޗުގެ 17 ވަނަ މިނިޓްގައި ގްރޭނިޓް ޝަކާ އެވެ. އޭނާ މި ލަނޑު ޖެހީ އޭރިއާބޭރުން ގޯލުގެ މަތީ ކަނަށް ބޯޅަ ފޮނުވާލައިގެންނެވެ.

ލެވަކޫސަނުން މި މެޗުގެ ބޮޑުބައި ކުޅުނީ އެއް ކުޅުންތެރިއަކު މަދުކޮށެވެ. އެއީ، މެޗުގެ 44 ވަނަ މިނިޓްގައި އެ ޓީމުގެ، އޮޑީލޯން ކޮސޫނޫ އަށް ރަތް ކާޑެއް ދެއްކުމުންނެވެ. ބޯޅަ ހޯދަން އުޅުމުގެ ތެރޭގައި، ކޮސޫނޫ އަތުން ކައިސަސްލައުޓެން ކުޅުންތެރިއަކު ފައި މައްޗަށް ފައިން އެރުމުން، ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލާފައި އޭނާ އަށް ވަނީ ރަތް ކާޑެއް ދައްކައިފަ އެވެ.

މެޗުގެ ދެ ވަނަ ހާފުގައި، ކައިސަސްލައުޓެން އިން ކުރިއަށް ޖެހިގެން ލަނޑެއް ޖެހޭތޯ މަސައްކަތް ކުރި ނަމަވެސް، ލެވަކޫސަނުން ވަނީ ރަނގަޅަށް ޑިފެންސްކޮށް، މެޗުން މޮޅުވެ، އެ ކްލަބްގެ ތާރީހީ ސީޒަނެއް ނިންމައިލައިފަ އެވެ.

މެޗުގައި ލެވަކޫސަންގެ ގޯލްކީޕަރު، ލޫކަސް ރަޑޭޝްކީ ވެސް ވަނީ ރަނގަޅު ހަަމަލާތަކެއް ހުއްޓުވައިފަ އެވެ.

ލެވަކޫސަންގެ ކޯޗު ޒަބީ އަލޮންސޯ ވަނީ ބަލިނުވެ، ޖަރުމަނުގެ ފުޓްބޯޅަ ސީޒަން ނިންމާލެވުނީތީ އެކަމަށް ކުޅުންތެރިންނަށް މަރުހަބާ ކިޔައިފަ އެވެ.