ވިލާ ހަކަތައިން ދެމުން އަންނަ ހިދުމަތްތަކުގެ ފެންވަރު ރަނގަޅު ކުރުމަށް އެތަނުގެ މުވައްޒަފުންނަށް ސްވިޒަލޭންޑުގެ ކައިޒެން އިންސްޓިޓިއުޓުން ތަމްރީން ޕްރޮގްރާމެއް ކުރިއަށް ގެންގޮސްފި އެވެ.

ހަފްތާއެއްގެ މުއްދަތަށް ކުރިއަށްދިޔަ މި ތަމްރީން ޕްރޮގްރާމުގައި ވިލާ ހަކަތައިގެ އިސްކޮށް އަދި އޮޕަރޭޝަންސްގައި މަސައްކަތްކުރާ 20 މުވައްޒަފުން ބައިވެރިވެފައިވެ އެވެ. މުވައްޒަފުންނަށް ތަމްރީން ދީފައި ވަނީ ޕޯޗުގަލްގެ ދެ ޓްރެއިނަރުންނެވެ.

ވިލާ ހަކަތައިގެ މުވައްޒަފުންނަށް ކައިޒެންއިން ތަމްރީން ދިނުން -- ފޮޓޯ؛ މިރާޝް ނާޝިމް / އަދަދު

ވިލާ ހަކަތައިގެ މެނޭޖާ، އެމްޕްލޯއީ ޑިވެލޮޕްމަންޓް އެންޑް ވެލްބީން އަހުމަދު އިރުނާސް "އަދަދު" އަށް ވިދާޅުވީ ޕްރޮގްރާމުން ހަފްތާއެއްހާ ދުވަސްތެރޭގައި މުވައްޒަފުންނަށް ބައިވަރު އާ ކަންތައްތަކެއް ދަސްވެގެންދިޔަ ކަމަށެވެ.

"ކަސްޓަމަރުންނަށް ދޭ ހިދުމަތްތައް އިތުރަށް ރަނގަޅު ކުރުމަށް އާ ކަންތައްތަކެއް މި ޕްރޮގްރާމުން ދަސްވެގެންދިޔަ،" އިރުނާސް ބުންޏެވެ.

ވިލާ ހަކަތައަކީ ރާއްޖޭގެ އެންމެ ބޮޑު އެއް ކޮންގްލޯމެރޭޓް ކަމަށްވާ ވިލާ ޝިޕިން އެންޑް ޓްރޭޑިން ކޮމްޕެނީ ޕްރައިވެޓް ލިމިޓެޑްގެ ސަބްސިޑަރީ ކުންފުންޏެކެވެ.

ވިލާ ހަކަތައިން އަންނަނީ ރާއްޖޭގެ އުމްރާނީ ތަރައްގީގެ މަޝްރޫއުތަކުގައި ބޮޑު ދައުރެއް އަދާކޮށް، ރާއްޖޭގެ މާކެޓުތަކަށް ފެންވަރު ރަނގަޅު އުފެއްދުންތައް ފޯރުކޮށްދެމުންނެވެ.