ދިރާގުގެ ބްރޭންޑް އެމްބެސެޑަރަކަށް މަޝްހޫރު ޒުވާން ޓީޓީ ކުޅުންތެރިޔާ ފާތިމަތު ދީމާ އަލީ، 16 މިއަދު ހަމަޖައްސައިފި އެވެ.

މިއަދު ދިރާގު ހެޑް އޮފީހުގައި ބޭއްވި ރަސްމިއްޔާތެއްގައި ދީމާއަށް ބްރޭންޑް އެމްބެސެޑާޝިޕް ހަވާލުކުރީ ދިރާގުގެ ސީއީއޯ އަދި އެމްޑީ އިސްމާއިލް ރަޝީދު އެވެ.

ރަސްމިއްޔާތުގައި ދިރާގުގެ ޑިރެކްޓާ، ބްރޭންޑް އެންޑް މާކެޓިން ކޮމިއުނިކޭޝަންސް މިރްޝާން ހަސަން ވިދާޅުވީ އެ ކުންފުނީގެ ބްރޭންޑް އެމްބެސެޑަރަކަށް ދީމާ ހަމަޖެހުމަކީ ލިބުނު ފަހުރެއް ކަމަށެވެ.

ދީމާއަކީ ކުރިއަރަމުން އަންނަ ޒުވާން އެތުލީޓެއް ކަމަށާއި، ދީމާއަކީ ކުރިއަރަމުން އަންނަ ޒުވާން ކުޅުންތެރިންނަށް ނަމޫނާއެއް ކަމަށް ވެސް މިރްޝާން ވިދާޅުވި އެވެ.

މީގެއިތުރުން އޮލިމްޕިކް ކޮލިފައިން ބުރު ފަހަނައަޅައި ގޭމްސްއަށް ފުރަތަމަ ކޮލިފައިވި އެތުލީޓުގެ ޝަރަފް ހޯދުމުން މިރްޝާން ވަނީ ދީމާއަށް މަރުހަބާ ވެސް ކިޔާފަ އެވެ.

ރަސްމިއްޔާތުގައި ދީމާ ބުނީ އޭނާގެ ފުރަތަމަ އެމްބެސެޑާޝިޕް ރާއްޖޭގެ ކުންފުންޏަކުން ލިބުމަކީ ލިބޭ އުފަލެއް ކަމަށާއި، ދިރާގަކީ ރާއްޖޭގައި ޑިޖިޓަލް ހިދުމަތް ދެމުގައި އެންމެ ކުރީގައި އުޅޭ ކުންފުނި ކަމަށެވެ.

ދިރާގުން ވަނީ މަޝްހޫރު އަދި ކުރިއަރަމުން އަންނަ ގިނަ އެތުލީޓުންނާއި ފަންނާނުންނާއެކު ބްރޭންޑް އެމްސެޑާޝިޕް ޕްރޮގްރާމް ކުރިއަށްގެންދަމުންނެވެ. އޭގެ ތެރޭގައި އަލްމަރުހޫމް އަހުމަދު ނާޝިދު (ޒީރޯ ޑިގްރީ)، ސާފާ އިބްރާހިމް އަރީފް، އަބްދުލް ގަފޫރު އަލީ (ގައްބެ)، ދުވުންތެރިޔާ ސާއިދު އަދި ޒޫނާ ނަސީމް (ޒޫންޓި) ހިމެނެ އެވެ.