އޮލިމްޕިކްސް އިން ފުރުސަތު ދޭނެ އެތުލީޓެއް ކަނޑައެޅުމުގައި މިހާތަނަށް ބޭއިންސާފުން އެއްވެސް ކަމެއް ކޮށްފައިނުވާނެ ކަމަށް އެތުލެޓިކްސް އެސޯސިއޭޝަން އޮފް މޯލްޑިވްސް އިން ހާމަކޮށްފި އެވެ.

އެތުލެޓިކްސް އެސޯސިއޭޝަނުން މި ގޮތަށް ހާމަކޮށްފައިވަނީ، އެތުލެޓިކްސް އެސޯސިއޭޝަނުން އޮލިމްޕިކްސް އަށް ކޮލިފައިވާ އެތުލީޓެއް ހޮވުމާ ގުޅޭގޮތުން، ރާއްޖޭގެ މީޑިއާ އާއި ސޯޝަލް މީޑިއާގައި އެކި ކަހަލަ ގޮތްގޮތަށް ވާހަކަ ދެކެވޭތީވެ އެވެ.

ރާއްޖެ އަށް މި ފަހަރު އޮލިމްޕިކްސް އިން ފުރުސަތު ލިބިފައި އޮތީ ތިން ކުޅިވަރަކުންނެވެ. އެއީ ކޮލިފައިވެގެން ރާއްޖޭން ވާދަކުރާ ޓޭބަލް ޓެނިހުގެ އިތުރުން، ޓްރައިޕާޓައިޓް/އިންވިޓޭޝަނަލް ފުރުސަތެއްގެ ގޮތުގައި، ޖާގަ ލިބޭ ތިން ކުޅިވަރު ކަމަށްވާ، ސްވިމިން، ބެޑްމިންޓަން އަދި އެތުލެޓިކްސް އެވެ.

އެތުލެޓިކްސް އެސޯސިއޭޝަނުން ވަނީ ކޮލިފައިނުވާ ގައުމުތަކަށް، އޮލިމްޕިކްސް އިން ފުރުސަތު ލިބޭ ގޮތް ސާފުކޮށްދީފަ އެވެ. އެ ގޮތުން، ކޮލިފިކޭޝަން ތެރެއިން ޖާގަ ނުލިބޭ ގައުމުތަކުގެ ތެރެއިން ގައުމަކަށް، އެތުލީޓުން ފޮނުވުމުގައި ފުރުސަތު ލިބެނީ، 100 މީޓަރާއި 800 މީޓަރު އަދި މެރަތަން އިން އެ ގައުމެއްގެ ރޭންކިން ކަނޑައަޅާ ޕޮއިންޓް އުސޫލުގެ ތެރެއިން އެންމެ ރަނގަޅު އެތުލީޓެވެ.

އޮލިމްޕިކްސް އަށް މި އިވެންޓްތަކަށް އެތުލީޓުންގެ ނަން ހުށަހަޅަން އޮތް ފުރުސަތުގެ ސުންގަނޑި ހަމަވާ ތާރީހަކީ، މެރަތަން އަށް ނަން ހުށަހަޅަން 23 އޭޕްރީލް އެވެ. އަދި 100 މީޓަރާއި 800 މީޓަރު އިވެންޓަށް އެތުލީޓުންގެ ނަން ހުށަހަޅަން އޮތް މުއްދަތު، ހަމަވާނީ މި މަހުގެ ނިޔަލަށެވެ.

އެތުލެޓިކްސް އެސޯސިއޭޝަނުން ވަނީ މި އިވެންޓްތަކަށް ރާއްޖޭ އެތުލީޓުން ހޮވެން ސްކޯ އޮތްގޮތަށް ބަލާއިރު، މި ވަގުތުގެ ހާލަތު އޮޅުންފިލުވައިދީފަ އެވެ.

"އޮލިމްޕިކްސް އަށް ފުރުޞަތު ދިނުމުގައި މިއަދާ ހަމައަށް އެއްވެސް ބޭއިންސާފު ކަމެއް އެސޯސިއޭޝަނުން ނުކުރޭ،" އެތުލެޓިކްސް އެސޯސިއޭޝަންގެ މީޑިއާ ގްރޫޕަށް ފޮނުވި މެސެޖުގައިވެ އެވެ.

އެތުލެޓިކްސް އެސޯސިއޭޝަން އިން ރޭންކިން ހިއްސާކޮށްފައިވާ ގޮތަށް ބަލާއިރު، މި ވަގުތު، އެންމެ ގިނަ ޕޮއިންޓް ހޯދާފައިވާ ދެ އެތުލީޓުންނަކީ ޖެމެއިކާގައި ތަމްރީން ހަދަމުން އަންނަ އިބާދުﷲ އާދަމް އާއި މަރިޔަމް ރޫޔާ އަލީ އެވެ.

މި ހަފްތާގެ ހޮނިހިރު ދުވަހު، އެތުލީޓުންގެ ޓައިމް ޓްރަޔަލެއް ކުރިއަށްގެންދާ ގޮތަށް ވަނީ ހަމަޖެހިފަ އެވެ.