މިދިޔަ ރޯދަމަހަށް ހުޅުމާލެ ދެވަނަ ފިޔަވަހީގައި އެޗްޑީސީއިން ހެދި ވަގުތީ މާރުކޭޓުގެ ޓިނުތައް، މިސަރަހައްދަށް މިހާރު ޖެހެމުންދާ ގަދަ ވަޔާއެކު، ވަޔާ ދާން ފަށައިފި އެވެ.

ހިޔާގެ ފުރަތަމަ ދެ ޓަވަރާއި ވިނަރެސް ފްލެޓުތަކާ ދެމެދު އޮންނަ ހުސް ބިމުގައި ޓިނާއި ދަގަނޑުން ހެދި މި މާރުކޭޓު އަދިވެސް ރޫޅާލާފައި ހުރި އިރު، މިއަދު ޖެހެމުންދާ ވަޔާއެކު ޓިނުތައް ދޫވެ ވިއްސައިގެން ދާން ފަށާފައިވާ ކަމަށް "އަދަދު" އަށް ވަނީ މައުލޫމާތު ލިބިފަ އެވެ.

ރޯދައަށް މާރުކޭޓު ހުޅުވަމުން އެ މާރުކޭޓަކީ ސަރަހައްދުގައި ދިރިއުޅޭ ފަރާތްތަކަށް މޭވާ އަދި ތަރުކާރީ އަދި އެހެނިހެން ބާވަތްތައް ފަސޭހަކަމާއިކު ލިބޭނެ ގޮތް ހަމަ ޖެއްސުމަށް ހުޅުވި މާރުކޭޓެއް ކަމަށް އެޗްޑީސީން ބުނެ އެވެ.

މިދިޔަ ބުރާސްފަތި ދުވަހުން ފެށިގެން ރާއްޖެ ސަރަހަށްދަށް ހުޅަނގު މޫސުމުގެ ބާރު ގަދަވެ، ރާއްޖޭގެ ހުރިހާ ހިސާބަކަށް ދަނީ ގަދަވަޔާއެކު ބޯކޮށް ވާރޭވެހެމުންނެވެ. މި ވިއްސާރާގައި މީގެ ކުރިންވެސް އެކި ރަށްރަށުގެ ގޭގޭގެ ފުރާޅު އެއްލާލާފައިވެ އެވެ.

މޫސުމާ ބެހޭ ގައުމީ އިދާރާއިން މިއަދު ބުނި ގޮތުގައި ކުރިއަށް އޮތް ތިން ދުވަހުވެސް ރާއްޖޭގެ ހުރިހާ ސަރަހަށްދަކަށް މޫސުން ގޯސްވެ، ގަދަ ވަޔާއެކު ބޯކޮށް ވާރޭވެހި ކަނޑުތައް ގަދަވާނެ އެވެ. މިވަގުތުވެސް މެޓް އޮފީހުން އޮތީ މިސަރަހައްދަށް އޮރެންޖް އެލާޓް ނެރެފަ އެެވެ. އެއީ ވިލާގަނޑުގައި ގަޑިއަކު 60 މޭލަށް ވައިގަދަވާނެކަަމަށް ލަފާކުރެވޭތީ އެވެ.