އަރި އަތޮޅަށް ހުޅުވާލައިގެން ބާއްވާ އެންމެ ބޮޑު އެއް ފުޓްސަލް މުބާރާތްކަމަށްވާ ހަންޔާސް ކަޕް މިރޭ ފަށަން ނިންމައިފި އެވެ.

މީގެ ކުރިން މި މަހުގެ 18 ވަނަ ދުވަހު މި މުބާރާތް ފަށަން ނިންމި ނަމަވެސް ވިއްސާރައިގެ ސަބަބުން މުބާރާތް ވަނީ ދެ ދުވަހަށް ލަސްކޮށްފަ އެވެ.

މިރޭ މުބާރާތް ފަށާއިރު, މުބާރާތުގެ ފުރަތަމަ މެޗުގައި ބައްދަލުކުރާނީ އެންމެ ފަހުގެ ޗެމްޕިއަން ލަކުޑި އާއި އެފްސީ ގޯޅި އެވެ. ލަކުޑިން މިދިޔަ އަހަރުގެ ޗެމްޕިއަންކަން ހޯދީ ނިން އެފްސީ ބަލިކުރުމަށްފަހުގަ އެވެ.

ފަސް ޓީމާ އެކު 2020 ވަނަ އަހަރު މި މުބާރާތް ފެށި ނަމަވެސް މިދިޔަ އަހަރު މުބާރާތުގައި 10 ޓީމުން ވަނީ ބައިވެރިވެފަ އެވެ. އެއީ ހަންޏާމީދޫ އިން ހަތް ޓީމާއި, އދ. އަތޮޅުގެ ދެ ޓީމުގެ އިތުރުން އއ. އަތޮޅުގެ ޓީމެކެވެ.

މިއަހަރުގެ މުބާރާތުގެ މީޑިއާ ޕާޓްނަރަކީ އަދަދު ސްޕޯޓްސް އެވެ. މި މުބާރާތުގެ ހުރިހާ މެޗެއް އަދަދު ސްޕޯޓްސްގެ ފޭސްބުކް ޕޭޖުން ލައިވް ކުރާނެ އެވެ. މީގެ އިތުރުން މި މުބާރާތުގެ ހުރިހާ މެޗެއް ހަންޏާސް ކަޕް ފޭސްބުކް ޕޭޖުންވެސް ލައިވް ކުރާނެ އެވެ.

މި އަހަރުގެ މުބާރާތް ކުރިއަށްދާއިރު, ޖޫނިއާ ކުޅުންތެރިންނަށް އަމާޒުކޮށްވެސް މުބާރާތެއް ކުރިއަށް ގެންދިޔުމަށް ހަންޏާސް ކަޕް އިންތިޒާމް ކުރަމުން ގެންދާ ފަރާތުން އަންނަނީ މަސައްކަތް ކުރަމުންނެވެ.