ކްލަބް މޯލްޑިވްސް އިން ރާއްޖޭގެ ފުޓްސަލް ރެފްރީންނަށް ރިފްރެޝާ ކޯހެއް ފަށައިފި އެވެ.

ގިނަ އަދަދެއްގެ ރެފްރީންނާ އެކު، ފެށި މި ކޯހުގައި އިންސްޓްރަކްޓަރެއްގެ ގޮތުގައި މަސައްކަތްކުރަނީ، އޭއެފްސީ އެލީޓް ފުޓްސަލް ރެފްރީ އިންސްޓްރަކްޓާ، މެލޭޝިއާގެ ބަދްރުލް ހިޝާމް އެވެ.

މި ކޯސް ފެއްޓުމަށް އިއްޔެ ހުޅުމާލޭ، މިނީ ސްޕޯޓްސް ކޮމްޕްލެކްސްގައި ބޭއްވި އިވެންޓް ޝަރަފްވެރިކޮށްދެއްވީ ސްޕޯޓްސް މިނިސްޓްރީގެ ސްޓޭޓް މިނިސްޓަރު، އަބްދުލް ރައްޒާގު އިބްރާހިމް އެވެ. މީގެ އިތުރުން، ކްލަބް މޯލްޑިވްސްގެ ވައިސް ޗެއާމަން، އިބްރާހިމް އަޝްރަފް އާއި ގޯލްޑަން ފުޓްސަލް އެސޯސިއޭޝަންގެ ރައީސް، ރިލްވާން މޫސާ ބައިވެރިވެވަޑައިގެންނެވި އެވެ.

އިއްޔެ އިން ފެށިގެން، މާދަމާގެ ނިޔަލަށް ކުރިއަށްދާ މި ރީފްރެޝާ ކޯހުގައި، ފުޓްސަލްގެ ގަވާއިދުތަކުގެ އެންމެ ފަހުގެ އަޕްޑޭޓާއި، މެޗު ހާލަތްތަކުގައި ރެފްރީން އަމަލުކުރާނެ ގޮތުގެ މުހިންމު މައުލޫމާުތުތައް ހިމެނޭ ސެޝަންތައް ކުރިއަށްގެންދާނެ އެވެ.

ރެފްރީސް ރިފްރެޝާ ކޯހުގެ އިންސްޓްރަކްޓަރު، ބަދްރުލް، ކޯހުގެ ބައިވެރިންނާ މުހާތަބުކޮށް ވާހަކަ ދައްކަނީ.--- ފޮޓޯ: މިރާން ނާޝިމް / އަދަދު

ރާއްޖޭގައި އެންމެ ގިނަ ދުވަސްވީ ބޮޑު ފުޓްސަލް މުބާރާތް ބާއްވަމުން އަންނަ ކްލަބް މޯލްޑިވްސް އިން މި އަހަރުގެ މުބާރާތްތައް ފަށަން ނިންމާފައިވަނީ އަންނަ މަހުގެ އެއް ވަނަ ދުވަހު އެވެ. އެ ގޮތުން، އަންނަ މަހު އެއް ވަނަ ދުވަހު ކުޅޭނީ ކިންގްސް ކަޕް އެވެ. އެއީ ކްލަބް މޯލްޑިވްސް ކަޕްގެ އެންމެ ފަހުގެ ޗެމްޕިއަން، ކްލަބް ވެމްކޯ އާއި ރިސޯޓް ލީގުގެ އެންމެ ފަހުގެ ޗެމްޕިއަން ޖޯލި ބީން މެދުގައި ކުޅެން ނިންމާފައިވާ މެޗެކެވެ.

އޭގެ ފަހުން، ކްލަބް މޯލްޑިވްސް ކްލަސިކް އާއި އެއިޓީން ތާޓީ ފުޓްސަލް ފިއެސްޓާ ފަށާނެ އެވެ. ކްލަބް މޯލްޑިވްސް ކަޕް އޮންނާނީ، ފުރަތަމަ ދެ މުބާރާތް ނިމުމުންނެވެ.

ސަރުކާރު ހިއްސާވާ ކުންފުނިތަކާއި އަމިއްލަ ކުންފުނިތަކަށް ހުޅުވާލައިގެން ކްލަބް މޯލްޑިވްސް އިން 2006 ވަނަ އަހަރުން ފެށިގެން ގަވާއިދުން ބާއްވަމުން އައި ކްލަބް މޯލްޑިވްސް ކަޕަކީ އަހަރެއްގެ ތެރޭގައި އެންމެ ގިނަ ބަޔަކު އިންތިޒާރުކުރާ މުބާރާތެވެ. ކޮވިޑް-19ގެ ސަބަބުން އެކި ކަންކަމަށް އައި މެދުކެނޑުމާ ހެދި 2020 ވަނަ އަހަރު ކްލަބް މޯލްޑިވްސް ކަޕް ނުބޭއްވުނެވެ. އެކަމަކު، ފާއިތުވި ތިން އަހަރު އެ މުބާރާތް ވަނީ ކާމިޔާބުކަމާ އެކު ބާއްވައިފަ އެވެ.

ކްލަބް މޯލްޑިވްސް މުބާރާތްތަކުގެ މި ފަހަރުގެ ވެސް އޮންލައިން މީޑިއާ ޕާޓްނަރަކީ، "އަދަދު ސްޕޯޓްސް" އެވެ