ހަތަރު މީހުންނާއެކު ހުކުރު ދުވަހު ގެއްލުނު ދޯނި ފެނިފައިވާ ކަމަށް ކަންނެލި ދޯންޏެއް ކަމަށްވާ އަސުރުމާ ތިނެއް ދޯނިން ސޯޝަލް މީޑިއާގައި ބުނެފި އެވެ.

ސޯޝަލް މީޑިއާގައި ކޮށްފައިވާ ޕޯސްޓުގައި އަސުރުމާ ދޯނިން ވަނީ ގެއްލިގެން ހޯދާ، "AAA-37" ދޯނީގެ ފޮޓޯއާއި އޮތް ސަރަހައްދުވެސް ހިއްސާކޮށްފަ އެވެ.

ދޯނީގެ އޮޑިވެރިން "އަދަދު" އަށް މައުލޫމާތު ދިން ގޮތުގައި މި ދޯނި ފެނިގެން އެމްއެންޑީއެފަށް ގުޅުމުން، ސިފައިންނަށް އެ ދޯންޏާ ގުޅިފައިވާ ކަމަށް ބުނެފައިވާ ކަމަށެވެ. އެ ދޯނި ފެނުނީ ވ. ރަކީދޫ ބޭރުންނެވެ.

އެމްއެންޑީއެފުން ބުނީ، ގެއްލުނު ދޯންޏާ ގުޅިފައިވާ ކަމަށާއި މިހާރު ކޯސްޓްގާޑް ޝަހީދު އަލީ އެ ސަރަހައްދަށް ދުއްވަމުންދާ ކަމަށެވެ.

އެ ދޯނި ގެއްލިގެން ހޯދުމަށް ކުރެވުނު މަސައްކަތުގައި ކަނޑުމަގުން 2461 އަކަ ނޯޓިކަލް މޭލު ސަރަހައްދެއް, އަދި ވައިގެމަގުން 6954 އަކަ ނޯޓިކަލް މޭލު ސަރަހައްދެއް ބެލިކަމަށް އެމްއެންޑީއެފުން ބުނެ އެވެ. މި އޮޕަރޭޝަންގައި ޑްރޯންތައް ބޭނުމެއް ނުކުރެ އެވެ.

މާޗު މަހު ފަހުކޮޅު މ. އަތޮޅުން ގެއްލުނު ދޯންޏެއް ހޯދީ ޑްރޯން ބޭނުންކޮށްގެން ކަމަށް އެމްއެންޑީއެފްއިން އޭރު ބުނެފައިވެ އެވެ. އެ ފަހަރު އެ ދޯނި ހޯދުމަށް ރަތްމެންދޫއާ ދިމާ ކަނޑުގެ ސަރަހައްދުގެ 440 އަކަ ނޯޓިކަލް މޭލްގެ ސަރަހައްދެއް ބެލި އެވެ.

މި ދުވަސްވަރު މުޅި ރާއްޖެ އަށް މޫސުން ގޯސްއިރު، ބޯކޮށް ވާރޭ ވެހި، ވައި ބޮޑަށް ގަދަވެ، ކަނޑުތައް ވެސް ގަދަވެ އެވެ. އެހެންވެ، ދަތުރުފަތުރު ކުރުމުގައި ސަމާލުވުމަށް ވަނީ އިލްތިމާސްކޮށްފަ އެވެ.