ހުކުރު ދުވަހު ތިލަފުށިން ފުރައިގެން މ. އަތޮޅުގެ ރިސޯޓަކަށް ދަތުރުކުރަމުން ދަނިކޮށް ގެއްލުނު ދޯނި ހޯދަން އަސްކަރީ ޑްރޯންތައް ބޭނުން ނުކުރާ ސަބަބު ހާމަ ކުރަން އެމްއެންޑީއެފް އިން ދެކޮޅު ހެދި ކަމަށް އިއްޔެ ރިޕޯޓުކުރި އެވެ.

ގެއްލުނު ދޯނި ހޯދަން ވައިގެ މަގުން ބޭނުންކުރަނީ މޯލްޑިވިއަންގެ މަތިންދާ ބޯޓެއް ކަމަށް ބުނެފައިވެ އެވެ. ފަހުން އެނގުނު ގޮތުގައި ބޭނުންކުރީ މޯލްޑިވިއަންގެ ސީޕްލޭނެކެވެ. އެ މައުލޫމާތާއެކު މި އޮޕަރޭޝަނުގައި ޑްރޯންތައް ބޭނުންނުކުރާ ސަބަބު ހޯދުމަށް މި ނޫހުން ވަނީ އެދިފަ އެވެ.

ނަމަވެސް މިހާތަނަށް ވެސް އެމްއެންޑީއެފްގެ ތަރުޖަމާނު ވިދާޅުވަމުން ގެންދަވަނީ، މިކަމުގައި އެކްސް އެކައުންޓާއި ޓެލެގްރާމް ގްރޫޕުގައި ހިއްސާކުރި މައުލޫމާތު ފިޔަވާ އިތުރު މައުލޫމާތެއް ދެވެން ނެތް ކަމަށެވެ. ޑްރޯން ބޭނުންނުކުރާ ސަބަބު ހޯދުމަށް ތަކުރާރުކޮށް އެދުމުން ވެސް އެމްއެންޑީއެފުން ބުނީ ބަހެއް ނެތް ކަމަށެވެ.

ގެއްލިގެން ހޯދަމުން ދަނީ މ. އަތޮޅު މެދުފުށި އައިލެންޑް ރިޒޯޓަށް ދަތުރުކުރަމުން ދިޔަ “AAA-37” ނަމަކަށް ކިޔާ ދޯންޏެކެވެ. އެ ދޯނީގައި ތިބީ ދިވެއްސަކާއި ތިން ބަންގްލަދޭޝް މީހުން ކަމަށް ވެސް އެމްއެންޑީއެފުން ބުނެ އެވެ.

އެ ދޯނި ހޯދުމަށް ހިންގާ އޮޕަރޭޝަނާ ގުޅިގެން ސިފައިންގެއިން ބުނީ، ކަނޑުމަގުން ދޯނި ހޯދުމަށް އެމްއެންޑީއެފް ކޯސްޓްގާޑު ޝަހީދު އަލީ އާއި މޯލްޑިވިއަންގެ ސީޕްލޭނުން ކަނޑާއި ވައިގެމަގުން، މ. ރަތްމަންދޫގެ އިރުމަތީ ބިތުން ބޮޑު ސަރަހައްދެއް ބަލާފައިވާ ކަމަށެވެ.

މުހިއްމު ބައެއް ހަބަރު