ރައްޔިތުންގެ މަޖިލީހުގެ ކުރެންދޫ ދާއިރާގެ އިންތިހާބީ މެންބަރު ޝާމިން ހަބީބު މިއަދު ޕީއެންސީއާ ގުޅިވަޑައިގެންފި އެވެ.

ޝާމިންއަކީ އަމިއްލަ ގޮތުން ވާދަކުރައްވާ މަޖިލީހަށް އިންތިހާބު ވެވަޑައިގެންނެވި ބޭފުޅެކެވެ. އޭނާ ވަނީ ޕީއެންސީއަށް ސޮއިކުރެއްވުމަށްފަހު, ފޯމު ރައީސް ޑރ. މުހައްމަދު މުއިއްޒުއަށް އަރުވާފަ އެވެ.

ޝާމިން ޕީއެންސީއަށް ސޮއިކުރުމާ އެކީ ރައްޔިތުންގެ މަޖިލީހުގައި ތިބޭނެ އެ ޕާޓީގެ މެމްބަރުންގެ އަދަދަކީ 74 އެވެ.

ޝާމިން ކުރެންދޫ ދާއިރާގެ ގޮނޑި ކާމިޔާބު ކުރެއްވީ 19 ވަނަ މަޖިލީހުގެ ދެ މެންބަރުންނައި, ސަރުކާރު ކެންޑިޑޭޓާ ވާދަ ކުރައްވައިގެންނެވެ.

ރައްޔިތުންގެ މަޖިލީހުގެ ސުޕަ މެޖޯރިޓީ ސަރުކާރުން ނަގާފައިވާއިރު އޭގެ ތެރޭގައި ހިމެނެނީ ޕީއެންސީ ޓިކެޓުގައި އިންތިހާބުވީ 66 މެމްބަރުންނާއި އަމިއްލަ ގޮތުން ވާދަކޮށް ގޮނޑި ކާމިޔާބުކުރެއްވި އަށް މެމްބަރުންގެ އިތުރުން ސަރުކާރާ ގުޅިފައިވާ ސިޔާސީ ޕާޓީތަކުގެ ލީޑަރުންނާއި އެމްޑީއޭގެ ޓިކެޓުގައި ވެލިދޫ ދައިރާއަށް އިންތިހާބުވީ މުހައްމަދު އައްބާސް އެވެ.

މިއާ އެކީ ސަރުކާރުން ބޭނުންވާ ގޮތަށް ވޯޓު ދޭން މަޖިލީހުގައި ތިބޭނެ މެމްބަރުންގެ އަދަދު ވަނީ 78 އަށް އިތުރުވެފަ އެވެ. މިއީ މިދިޔަ މަޖިލީހުގައި އެމްޑީޕީއަށް ލިބުނު ވަރަށް ވުރެ ވެސް ބޮޑު އަގުލަބިއްޔަތެކެވެ.

އާ މެމްބަރުން ހުވާ ކުރާނީ މި މަހުގެ 28 ގަ އެވެ.