ތިލަފުށީގެ ދެވަނަ ފިޔަވަހީގެ ބިން ހިއްކުމުގެ މަޝްރޫއުގެ ބޮޑުބައެއް ނިމި, ފުރަތަމަ މައިލްސްޓޯން ފުރިހަމަވެފައިވާ ކަމަށް ހައުސިން ޑިވެލޮޕްމަންޓް ކޯޕަރޭޝަން (އެޗްްޑީސީ) އިން ބުނެފި އެވެ.

ސިނާއީ މަސައްކަތްތަކަށް ހާއްސަކޮށްގެން ބިން ހިއްކުމުގެ މަސައްކަތް ކުރިއަށް ގެންދާ ތިލަފުށީގެ ދެވަނަ ފިޔަވަހީގެ ބިން ހިއްކުމާއި ގޮނޑުދޮށް ރައްކާތެރި ކުރުމުގެ މަޝްރޫއުގެ ގިނަ މަސައްކަތްތަކެއް ނިމިފައިވާއިރު, އެތަން ތަރައްގީ ކުރަމުން އަންނަނީ ފިޔަވަހިތަކަކަށް ބަހާލައިގެންނެވެ.

ތިލަފުށީގެ ދެވަނަ ފިޔަވަހި ތަރައްގީ ކުރުމުގެ މަސައްކަތް ކުރިއަށް ދާއިރު، ސިނާއީ މަސައްކަތްތަކަށާއި ވިޔަފާރީގެ ބޭނުންތަކަށް ބިން ވިއްކަން މިހާރު ވެސް ވަނީ ހުޅުވާލައިފަ އެވެ.

އެޗްޑީސީން ބުނީ ތިލަފުށިން ބިން ގަނެފައިވާ ފަރާތްތަކާ އެކު ހަދާފައިވާ އެއްބަސްވުމުގައި ކަނޑައަޅާފައި ވަނީ ބިން ހިއްކުމުގެ މަޝްރޫއު ފިޔަވަހިތަކަށް ބަހާލައި، ފުރިހަމަވާ ނިސްބަތަކުން، އެ ބިންތަކުގެ ފައިސާ ދައްކާ ހަމަކުރާ ގޮތަށް ކަމަށެވެ.

ބިން ހިއްކުމުގެ މަޝްރޫއޫގެ މަސައްކަތް ކުރިއަށް ދާ ނިސްބަތާއި ކަނޑައެޅިފައިވާ މައިލްސްޓޯން ފުރިހަމަވާ މިންވަރު, ބިން ގަނެފައިވާ ފަރާތްތަކަށް އެ ކޯޕަރޭޝަނުން އަންގަމުން ދާނެ ކަމަށް ވެސް އެޗްޑީސީން ބުނެ އެވެ.

ކަނޑައެޅިފައިވާ ޕްލޭންއާ އެއްގޮތަށް، ތިލަފުށީގެ ދެވަނަ ފިޔަވަހީގެ މަޝްރޫއުގެ މަސައްކަތް ނިންމައި، ވީހާވެސް އަވަހަކަށް ތަނުގެ ބޭނުން ކުރެވޭނެ ފުރުސަތު ހުޅުވާލަން މަސައްކަތް ކުރަމުންދާ ކަމަށް ވެސް އެޗްޑީސީން ނެރުނު ނޫސްބަޔާނުގައި ބުންޏެވެ.

ތިލަފުށި މާސްޓާ ޕްލޭނުގެ ދަށުން ތިލަފުށި ޑީ އޭރިއާއިން 9.6 ހެކްޓަރުގެ ބިން ހިއްކަމުން ދަނީ ލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕަނީ (ސީއެމްސީ) އާ ހަވާލުކޮށްގެންނެވެ.

ތިލަފުށީ މާސްޓާ ޕްލޭނުގެ ދަށުން ތިލަފުށްޓަށް އިތުރުކުރާ ބިމުގެ ސަރަހައްދުން އޭރިއާ ސީ ހިއްކުމުގެ މަސައްކަތްވެސް އާބަންކޯ އިން ހަވާލުކުރީ ސީއެމްސީ އަށެވެ. މި މަޝްރޫއަކީ ސިނާއީ ދާއިރާއަށް މިހާރު ކުރިމަތިވެފައިވާ ދަތިތަކަށް ހައްލެއް ހޯދައިދިނުމަށް ކުރިއަށްގެންދާ މަޝްރޫއެކެވެ.