ހުކުރު ދުވަހު ޑރ. މުހައްމަދު މުއިއްޒުގެ ރިޔާސީ ދައުރުގެ ފަސް އަހަރުގެ ތެރެއިން ފުރަތަމަ އަހަރު ވަނީ ދެބައިވެފަ އެވެ. އެމަނިކުފާނުގެ ފުރަތަމަ ހަ މަސްދުވަހުގެ ތެރޭ ތާރީހުގައި ފަވައިލެވޭނެ ކާމިޔާބީތަކެއް ފެނުނެވެ. އެއާއެކު ފާހަގަކޮށްލެވޭ ވަރުގެ ނާކާމިޔާބީތަކަކާވެސް ރައީސް އަދި ސަރުކާރު ކުރިމަތިލި އެވެ.

ޕާޓީ ތެރޭގެ ސިޔާސީ ވާދަވެރިކަމާއި، އިދިކޮޅުގެ އެކި ހަރަކާތްތަކުގެ ތެރެއިން ދާހިލީ މާހައުލުގައިވެސް މި ވެރިކަމުގެ ފުރަތަމަ ހަ މަސް ފާހަގަވީ ހަލަބޮލި ދުވަސްވަރެއްގެ ގޮތުގަ އެވެ. ކޮންމެ ފަސް އަހަރަކުން އެއްފަހަރު، ރިޔާސީ އިންތިހާބުން މަޖިލިސް އިންތިހާބަށް ދިވެހިން ތަޖުރިބާކުރާ ސިޔާސީ ހަޅަ ނިމުނުއިރު ސިޔާސީ ގޮތުންވެސް ރައީސްގެ ފުރަތަމަ ބައި އަހަރުގައި ރަނާއި ކަޅު ކުލަ ފެންނާން އެބަހުއްޓެވެ.

ގައުމިއްޔަތުގެ އާ ވިންދެއްގެ ގޮތުގައި ސިފަކުރައްވަމުން ފެށްޓެވި ވެރިކަމުގައި، ގައުމެއް އެބައެއްގެ ގައުމިއްޔަތު އެންމެ ބޮޑަށް ތަމްސީލުކުރާ ބައިނަލްއަގުވާމީ މުޖުތަމައުގައިވެސް ރައީސް މުއިއްޒުއަށް އެކި ކޮޅިގަނޑު ކުރިމަތިވެވަޑައިގެންނެވި އެވެ. ހާރިޖީ ސިޔާސަތަކީ 'ޕްރޯ މޯލްޑިވްސް' ކަމަށް އެމަނިކުފާނު ވިދާޅުވި ނަމަވެސް އެކަމާ ނުބައްދަލު މަންޒަރުތަކެއްވެސް ފެނިގެން ގޮސްފި އެވެ.

ކޮންމެ ކަމެއް އެންމެ ފުރިހަމަ ނުވާނެކަން އެއީ ހަގީގަތެވެ. ނަމަވެސް ރައްޔިތަކު އެބައެއްގެ ވެރިން މިނަނީވެސް ވެރީންގެ އަމަލުތަކުންނެވެ. ސިޔާސަތު ތަކުންވެ. ދަތި ވަގުތުގަޔާއި ތަނަވަސް ވަގުތުގައި އަޅާ ފިޔަވަޅުތަކުންނެވެ.

ރައީސް މުއިއްޒުގެ ފުރަތަމަ ހަ މަހުގެ އެންމެ ފާހަގަކޮށްލެވޭ އުސްއަލިތައް ގެނެސްމިދެނީ ކާމިޔާބީތަކާއި ނާކާމިޔާބީތަކުންނެވެ.

ނާކާމިޔާބީތައް

ވަންހަނާ ސިޔާސަތާއި ނޫސްވެރިކަމާ ބީރަށްޓެހި ވުން

ރައީސް މުއިއްޒުގެ ވެރިކަމެއް، އެމަނިކުފާނު ރިޔާސީ ކެމްޕޭނުގައި ސިފަކުރެއްވީ ފޮރުވާނެ އެއްވެސް ކަމެއް ނުބާއްވާނެ ވެރިކަމެއްގެ ގޮތުގަ އެވެ. ކުރީ ސަރުކާރުން ގެންގުޅުނު ހާމަނުކުރުމުގެ ސިޔާސަތާ މެދު އެމަނިކުފާނު އޭރު އެތައް ފާޑެއް ވިދާޅުވި އެވެ.

ނަމަވެސް، ވެރިކަމަށް ހަ މަސްދުވަސް ވީއިރު، އޭރު ފާޑުވިދާޅުވި ވަންހަނާ ސިޔާސަތުތައް އެމަނިކުފާނު އެ ގެންދަވަނީ ނަގަހައްޓަވަމުންނެވެ. އިތުރަށް ވަރުގަދަކުރައްވަމުންނެވެ. ރައީސް އޮފީހުން މައުލޫމާތު ހޯދާ ލިބިގަތުމުގެ ހައްގުގެ ގާނޫނު ބޮލާލައި ޖަހައި، އާރުޓީއައި ތަކަށް ޖަވާބު ދިނުން ވަނީ ހުއްޓާލާފަ އެވެ. އެކަމާ ވިދިގެން އައިކޮމް އިން ބަލާ މައްސަލަތަކަށް ހާޒިރުވުންވެސްމެ އެވެ. އެ މައްސަލަ ބަލާނެ ކަމަށް އިންފޮމޭޝަން ކޮމިޝަނަރުވެސް ވަނީ ވިދާޅުވެފަ އެވެ.

ނޫސްވެރިންނާ ގާތްކޮށް މަސައްކަތް ކުރައްވާނެ ކަމަށް ރައީސް މުއިއްޒު ވިދާޅުވި ނަމަވެސް، ސަރުކާރުގެ ފުރަތަމަ ހަ މަހުން ބޮޑުބައި ދިޔައީ ރައީސް އޮފީހުގައި ތަރުޖަމާނަކު ނެތި އެވެ. އެމަނިކުފާނު އެންމެ ފަހުން ނޫސްވެރިންގެ ބައްދަލުވުމެއް ބޭއްވީ މިދިޔަ ޑިސެމްބަރު މަހުގެ ފަހެއްގަ އެވެ.

ދެވަނަ މަހުގެ ތެރޭ ތިން ނޫހެއް ބްލޮކް ކުރި އެވެ. މިދިޔަ މަހު ރާއްޖޭގެ ތާރީހުގައި ފުރަތަމަ ފަހަރަށް ނޫސްވެރިންގެ ފޯނު ރައީސް އޮފީހަށް ވެއްދުން މަނާކުރި އެވެ. ފާޑުކިޔުން އަމާޒުވުމާއެކު މި ދެ ނިންމުންވެސް ސަރުކާރުން އަނބުރާ ގެންދިޔަ އެވެ.

ސަރުކާރުން ޗައިނާއާއެކު ވީ އެއްބަސްވުންތަކާއި ޑްރޯން ގެނައުމަށް ވީ އެއްބަސްވުމުގެ އިތުރުން، މުލީއާގޭގެ މަރާމާތައް ކުރި ހަރަދުވެސް މި ސަރުކާރަށް ވެފައިވަނީ އާންމު ކުރަން ހެޔޮނުވާވަރުގެ މައުލޫމާތު ތަކަކަށެވެ.

ސިޔާސީ މުވައްޒަފުންގެ އަދަދު ގިނަ، ހާމައެއް ނުކުރި

މިދިޔަ ސަރުކާރުގެ އެންމެ ބޮޑު ގޯހެއް ކަމުގައި އޭރު އިދިކޮޅު، މިހާރު ވެރިކަމުގައި ތިއްބެވި ބޭފުޅުން ސިފަކުރެއްވީ ސިޔާސީ މަގާމުތައް ގިނަ ވުމެވެ. ރައީސް މުއިއްޒު ވަޑައިގެންނެވީ 700 ގައި ސިޔާސީ މުވައްޒަފުންގެ ރޮނގެއް އޮތް ކަމަށް ވިދާޅުވަމުންނެވެ.

ނަމަވެސް، ސަރުކާރުގައި ހިމެނޭ 22 ވުޒާރާއާއި ސަރުކާރުގެ މަތިފަޑީގައި ތިއްބެވި ސިޔާސީ މުވައްޒަފުންގެ އަދަދު މި ސަރުކާރުންވެސް ހެދީ ބޮޑު ސިއްރަކަށެވެ. އައިކޮމް އިން އެ މައުލޫމާތު ދޭން އެންގުމުންވެސް ދީފައެއް ނުވެ އެވެ.

އިދިކޮޅުން ތުހުމަތު ކުރާ ގޮތުގައި އެ އަދަދު މިހާރު ވަނީ 700 ފަހަނައަޅާ ގޮސްފަ އެވެ. އެކަމަށް ބާރު ލިބިދެނީ ފެންނާން ހުރި ހަގީގަތްތަކުންނެވެ. ބައެއް ވުޒާރާތަކުގައި ނައިބު ވަޒީރުންގެ ގޮތުގައި 20 އަށްވުރެ ގިނަ ބޭފުޅުން އެބަތިއްބެވި އެވެ. އެ ބޭފުޅުންނަށް އެ ވުޒާރާތަކުގައި ހަމައަށް މޭޒާއި ގޮނޑި ނެތްކަމުގެ އަޑުތައްވެސް ސޯޝަލް މީޑިއާގައި ދައުރުވި އެވެ.

ސަރުކާރުގެ އެންމެ ބޮޑު މަޝްރޫއު، ރަސްމާލެ ހުއްޓިފައި

ރައީސް މުއިއްޒުގެ އެންމެ ތަރައްގީއާއި އެއްފަސްކުރުމުގެ ވިސްނުންފުޅުގެ ތެރެއިން އެމަނިކުފާނުގެ ވެރިކަމުގެ އެންމެ ބިޔަ މަޝްރޫއުގެ ގޮތުގައި ފެށްޓެވި، މާލެ އަތޮޅު ދެކުނު ބުރީގައި އޮންނަ ފުށިދިއްގަރުފަޅުން 1153 ހެކްޓަރުގެ ބިން ހިއްކާ 'ރަސްމާލެ' ތަރައްގީ ކުރުމުގެ މަސައްކަތް މިހާރު އޮތީ ހުއްޓިފަ އެވެ.

މެދު ކެނޑުމެތްނެތި އަށް މަސްދުވަހުގެ ތެރޭގައި ރަސްމާލޭގެ ބިން ހިއްކުން ނިންމަވާލައްވާނެ ކަމަށް ރައީސް މުއިއްޒު، ޑިސެމްބަރު 18، 2023 ގައި ވިދާޅުވީ މަޖިލީހަށްވެސް ގޮންސައްވާފަ އެވެ.

މަޖިލީހުން އެ މަޝްރޫއަށް ކަނޑައެޅި 400 މިލިއަން ރުފިޔާ ކަނޑާލުމުން، މި ސަރުކާރުން އެ މަޝްރޫއު ފެށީ ދައުލަތުން ލޯ ލާރިއެއްވެސް ހަރަދުނުކޮށް ހިއްކޭނެ ކަމަށް ބުނަމުންނެވެ. ނަމަވެސް ފުރަތަމަ ހަފުތާ ހިއްކި 10 ވަރަކަށް ހެކްޓަރަށްފަހު މަޝްރޫއު ހުއްޓުމުން، ރައީސް އެކަމަށް އެއްބަސްވެވަޑައިގެން، ވަނީ މަޝްރޫއު ލަސްވުމުގެ އެއް ސަބަބުގެ ގޮތުގައި ބަޖެޓު ފާސްނުކޮށްދިނުން ހިމަނުއްވާފަ އެވެ.

އިއްޔެއަށް ރަސްމާލެ މަޝްރޫއަށް ފަސްމަސްވެއްޖެ އެވެ. ބާކީ އޮތް ތިން މަސްދުވަހުން ބާކީ 1143 ހެކްޓަރު ހިއްކޭނެ ހިސާބެއް ސަބަބުވެރި ވިސްނުމަކުން ނުވިސްނެ އެވެ.

ހަފުތާ 14، ގިނަ ސުވާލުތަކެއް!

ސަރުކާރުގެ ފުރަތަމަ 100 ދުވަސް މި ސަރުކާރުން ގުނީ 14 ހަފުތާގެ ގޮތުގަ އެވެ. ގިނަ ވައުދުތަކެއް ހިމަނާ ހުރިހާ ވުޒާރާތަކަކުން މަސައްކަތްތައް ބައްޓަން ކުރި އެވެ.

ނަމަވެސް ހަފުތާ 14 ގެ ތެރޭގައި ހިމެނޭ ބޮޑެތި ގިނަ ކަންކަން އަދިވެސް ހުރީ މަޑުޖެހިފަ އެވެ. ކަރުދާހުގައި ހުރި ގިނަ މަޝްރޫއުތައް ނިމިފައިވީ ނަމަވެސް، އަމަލީ މަސައްކަތްތައް ހުރީ ފުނިޖެހިފައި ކަމަށް ބުނުމަކީ ދޮގަކަށް ނުވާނެ އެވެ.

ފާހަގަކޮށްލެވޭ ބައެއް ކަންކަމުގެ ތެރޭގައި އަރަބިއްޔާ މަޝްރޫއު ފެށިފައި ނުވުމާއި، ސަރުކާރުން ބަޖެޓު ނުދިނުމުގެ ސަބަބުން ހުޅުމާލޭގެ މުނިސިޕަލް ހިދުމަތްތައް މާލެ ސިޓީ ކައުންސިލްގެ ދަށަށް މިހާތަނަށްވެސް ބަދަލެއް ނުކުރެވުނެވެ. މަޖިލީހަށް ފޮނުވަން ނިންމި ބައެއް ބިލުތައްވެސް އެ މުއްދަތުގައި ނުފޮނުވުނެވެ.

މީގެއިތުރުން، މި ސަރުކާރުން އެންމެ ބޮޑަށް ވަކާލާތު ކުރާނެ ކަމަށް ބުނި ރާއްޖޭގެ ދެކުނު ކަނޑު 'ގެއްލުނު' މައްސަލާގައި އިޓްލޮސްގައި އިސްތިއުނާފީ މައްސަލައެއް ސަރުކާރަށް ހުށައެއް ނޭޅުނެވެ. ފުރަތަމަ 100 ދުވަސް ނިމި، ފުރަތަމަ ހަ މަސް ނިމުނުއިރުވެސް އެ މަސައްކަތުގައި ރިޕޯޓެއް ހަދާއި، އެ ރިޕޯޓު ދިރާސާކުރުން ނޫން އިތުރު ކަމެއް ނުވެ އެވެ.

އިންޑިއާ ސިފައިންގެ ބަދަލުގައި މަދަނީން، އަސްކަރިއްޔާ އަދިވެސް ރާއްޖޭގައި!

މިދިޔަ ސަރުކާރު ކުޑަކަކުލަށް ތިރިކޮށްލި އެއް ހަރަކާތަކީ، ރާއްޖޭގައި ތިބި އިންޑިއާ ސިފައިންނާއި އަސްކަރިއްޔާ ބޭރު ކުރުމަށް ހިންގި 'އިންޑިއާ އައުޓް' ހަރަކާތެވެ. އޭރުގެ ސަރުކާރުން ބުނީ އިންޑިއާ ސިފައިން ތިބީ އަސްކަރީ ހަރަކާތެއްގައި ނޫން ކަމަށާއި އިންސާނީ އެހީ ދިނުމުގައި ކަމަށެވެ.

އެކަން ހުރީ އެގޮތަށް ނޫންކަން މި ސަރުކާރަށްވެސް ސާބިތުކޮށް ނުދެވުނު އިރު، އޭރު ކިޔަމުންދިޔަ އެތައް ހާސް ސިފައިންގެ ބަދަލުގައި މި ސަރުކާރަށް ހޯދުނީ 88 ސިފައިންނެވެ. ފޮނުވާލެވުނީ 76 ސިފައިން ކަމަށް ބުނެފައިވެ އެވެ. ބާކީ ތިބީ ސެނަހިޔާގައި ތިބި އަސްކަރީ ޑޮކްޓަރުންނެވެ.

ފޮނުވާލީ ރާއްޖޭގައި ހުރި އިންޑިއާގެ އަސްކަރީ ދެ ހެލިކޮޕްޓަރާއި ޑޯނިއާ ބޯޓު ދުއްވުމަށް ތިބި ސިފައިންނެވެ. އެ އުޅަނދުތައް ގެންދިއުމުގެ ވިސްނުމެއް ނެތްއިރު، އިންޑިއާއިން އެދުނު ގޮތަށް ސިފައިންގެ ބަދަލުގައި ގެނެސްފައިވަނީ، އެ ގައުމުގެ އަސްކަރިއްޔާގެ ސީދާ ބެލުމުގެ ދަށުން ހިންގާ ސަރުކާރު ކުންފުންޏެއް ކަމުގައިވާ ހިންދުސްތާން އޭރޮނެޓިކްސް ލިމިޓެޑުގެ ފަންނީ މީހުންނެވެ. އެއީ މަދަނީން ކަމުގައި ސަރުކާރުން ތަކުރާރުކޮށް ބުނެ އެވެ.

ނަމަވެސް އިންޑިއާގެ އަސްކަރިއްޔާ އަދިވެސް ރާއްޖޭގައި އެބައޮތް ކަމަށް ކުރީގެ ބަންޑާރަނައިބު ޑރ. މުހައްމަދު މުނައްވަރު އަދި ކުރީގެ ހޯމް މިނިސްޓަރު އުމަރު ނަސީރުވެސް ވަނީ ވިދާޅުވެފަ އެވެ.

ރަށްރަށުގެ ތަރައްގީ ހުއްޓި ރައްޔިތުންގެ އެތައް ކަންބޮޑުވުމެއް!

ނިމިދިޔަ މަޖިލިސް އިންތިހާބުގައި އިދިކޮޅުން އެންމެ އަޑުހަރުކޮށް ދެއްކި އެއް ވާހަކައަކީ، ކުރީ ސަރުކާރުން ފެށި ތަރައްގީގެ މަޝްރޫއުތައް މި ސަރުކާރުން ހުއްޓުވާ ވާހަކަ އެވެ. އެ ތުހުމަތުތަކަށް ރައީސްވެސް ރަށްދުދެއްވާ އިދިކޮޅުން އޮޅުވާލަނީ ކަމަށް ވިދާޅުވި އެވެ.

ނަމަވެސް، ރަށްރަށުގެ ރައްޔިތުންނާއި ކައުންސިލްތަކުން މިހާރު ވަނީ އެ ވާހަތައް، ތޮށިގަނޑު ފަޅާލާ ނުކުނެ ދައްކަން ފަށާފަ އެވެ. އިދިކޮޅުން ތުހުމަތު ކުރާ ގޮތުގައި މަޝްރޫއުތައް މަޑުޖައްސާލާފައިވަނީ ސަރުކާރުގެ މަތިބަރުވެ، ހަރަދުތައް ދެކޮޅު ޖެއްސުމުގެ ބޭނުމުގަ އެވެ.

ހުއްޓިފައިވާ މަޝްރޫއުތަކުގެ ތެރޭގައި ރަށްރަށުގެ މަގުހެދުމާއި، ބަނދަރާއި ނަރުދަމާއިން ފެށިގެން، މަޖިލިސް އިންތިހާބާ ގުޅިގެން އިއުލާނުކުރި ބޮޑެތި އެއާޕޯޓުތަކުގެ މަސައްކަތްވެސް ހިމެނެ އެވެ. ހުވަދޫގެ ދެ ވެރިރަށުގައި އަޅަން ބުނި އެއާޕޯޓުތަކުގެ ފަހުމުނާމާ ފިޔަވާ އިތުރު މަންޒަރެއް ނުފެނެ އެވެ.

ކާމިޔާބީތައް!

އެއާ އެމްބިއުލާންސް

ރައީސް މުއިއްޒުގެ ރިޔާސީ ވައުދެއް ގޮތުގައި އޮތް އެއާ އެމްބިއުލާންސްގެ ހިދުމަތް ތައާރަފު ކުރެއްވުން އަވަސް ކުރެއްވީ ޖެނުއަރީ މަހު ޗައިނާއަށް ކުރެއްވި ދަތުރަށްފަހު އިންޑިއާއަށް ދެއްވި ބަހުގެ ހަމަލާތަކުގެ ތެރެއިންނެވެ.

މީގެ ކުރިން ބަލިމީހުން އުފުލަމުން ދިޔަ އިންޑިއާގެ ދެ ހެލިކޮޕްޓަރާއި ޑޯނިއާ އަށް ގޮންޖަހާ ރައީސް އެ ދުވަހު ވިދާޅުވީ، ދިވެހީން އެހެން ގައުމަކަށް ބަރޯސާވުން ނިމުމަކަށް ގެންނަވާނެ ކަމަށެވެ.

އެގޮތުން، މޯލްޑިވިއަންގެ ޑޭޝް-8 ބޯޓެއްގެ ބޭރުގެ ކުލަ ބަދަލުކޮށް އެތެރެވެސް ބަލިމީހުން އުފުލޭ ގޮތަށް ހަދާ އެއާ އެމްބިއުލާންސް އުދުއްސާލީ މާޗު މަހުގެ ފުރަތަމަ ދުވަހު އެވެ. ޑޭޝް-8 ގެ އިތުރަށް 15 ވަނަ ދުވަހު ސަރުކާރުން ވަނީ ސީޕްލޭނެއްވެސް މި ގޮތަށް ފަރުމާކޮށް ހިދުމަތަށް ނެރެފަ އެވެ.

އޭގެ ފަހުން ވޭތުދިޔަ، ތިން މަހެއްހާ ދުވަހު ބަލިމީހުން އުފުލާފައިވަނީ މި އުޅަނދުތަކުގައި ދިވެހީންނެވެ.

އަސްކަރިއްޔާއަށް ޑްރޯން ގެނައުން

މަޖިލިސް ކެމްޕޭނުގެ ކުރީކޮޅު ރައީސް މުއިއްޒު އެންމެ ގިނައިން ދެއްކެވި ވާހަކައަކީ ރާއްޖޭގެ ކަނޑުގެ ސަރަހައްދު ބެލެހެއްޓުމުގެ ގާބިލުކަން ދިވެހި އަސްކަރިއްޔާގައި ނެތް ވާހަކަ އެވެ. މިއަށް ބާރުލިބުނީ ރާއްޖޭގެ ކަނޑުގެ ސަރަހަށްދަށް އިންޑިއާގެ އަސްކަރީ ދެ އުޅަނދަކުން ވަދެ ދިވެހި މަސްދޯނިތަކަށް އެ ގައުމުގެ ސިފައިން އެރުމެވެ.

އޭރުވެސް ސަރުކާރުން ވަނީ ތުރުކީގެ ބައިކާރު ކުންފުނިން އުފައްދާ ބައިކާރު ކުންފުނިން އުފައްދާ ޑްރޯންތަކުގެ ތެރެއިން އަސްކަރިއްޔާތަކުގެ މެދުގައި އެންމެ މަގުބޫލު ޑްރޯން ކަމަށްވާ ބައިރަކުތާރު ޓީބީ2 ޑްރޯންތަކެއް ގެނައުމަށް އެއްބަސްވެފަ އެވެ.

ގާތްގަނޑަކަށް 560 މިލިއަން ރުފިޔާގެ އެއްބަސްވުމެއްގެ ދަށުން، އަސްކަރީ ޑްރޯން ހަދަން އެންމެ ކުޅަދާނެ އެއް ގައުމު ކަމަށްވާ ތުރުކީން ޑްރޯން ގަންނަން ނިންމުމުން، އެތައް ބައެއްގެ ތައުރީފު ސަރުކާރަށް އޮހުނެވެ.

މާޗު 15، ގައި ނ. މާފަރުގައި ބޭއްވި ހާއްސަ ރަސްމިއްޔާތެއްގައި ރައީސް މުއިއްޒު އޭގެ ތިން ޑްރޯން ތައާރަފުކުރެއްވުމަށްފަހު ވިދާޅުވީ، އޭގެ ތެރެއިން ބައެއް ޑްރޯންތަކަކީ ތުރުކީ ސަރުކާރުގެ ހިލޭ އެހީގެ ދަށުން ލިބިފައިވާ އާލާތްތަކެއް ކަމަށެވެ.

މި ޑްރޯންތަކުން ރާއްޖޭގެ ކަނޑުގެ ސަރަހައްދު ބަލަހައްޓަމުން ދާއިރު، މިދިޔަ އެޕްރީލް މަހުގެ 21 ގައި އޮތް މަޖިލިސް އިންތިހާބުގެ ކުރީ ދުވަހު ޑްރޯންތަކުން ވަނީ ގެއްލުނު ދޯންޏެއްވެސް ހޯދާފަ އެވެ.

ފައިސާ ޗާޕު ނުކުރުން

މިދިޔަ ސަރުކާރުގެ މާލީ ސިޔާސަތުތަކުގެ ތެރެއިން އިދިކޮޅުގެ އެންމެ ބޮޑު ނުރުހުމެއް އަމާޒުވީ ފައިސާ ޗާޕު ކުރުމަށެވެ. ކޮވިޑުގެ ބަލިމަޑިކަމާއެކު އައި އޮއެވަރުން ސަލާމަތްވާން އޭރު އެޅި ފިޔަވަޅު މިދިޔަ އަހަރުގެ ފަހުކޮޅަށް ދަންމާލި އެވެ.

ކުރީ ސަރުކާރުން ޑިސެމްބަރުން ފެށިގެން ފައިސާ ޗާޕުނުކުރާން ނިންމި ނިންމުމަށް ރައީސް މުއިއްޒު އަމަލުކުރެއްވުން ވެގެން ގޮސްފައިވަނީ އެމަނިކުފާނަށް އެންމެ ތައުރީފު ލިބޭ މާލީ ނިންމުމަށެވެ.

މަޝްރޫއުތަކާއި ރިކަރަންޓު ހަރަދުތައް ބަލަހައްޓަމުން މި ސަރުކާރުން ހަ މަސް ނިންމާލާފައިވަނީ ފައިސާ ޗާޕު ނުކޮށެވެ. ފައިސާ ޗާޕު ކުރުމުގެ އިހުތިޔާރެއް ސަރުކާރަށް ނެތެވެ. ގާނޫނީ ގޮތުން ޑިސެމްބަރު 2023 އަށް ފަހު ޗާޕު ނުކުރެވޭނެ ކަމަށް އޮތީ ބަޔާންކޮށްފަ އެވެ.

މަޖިލީހުގެ ސުޕަމެޖޯރިޓީ އާއެކު ރައްޔިތުންގެ އިތުބާރު ސަރުކާރަށް

ކޮންމެ ވެރިކަމެއްގެވެސް ފުރަތަމަ 100 ދުވަހުގެ މަސައްކަތް ރައްޔިތުން ބަލައިގަނެފައިވާ މިންވަރު ދައްކުވައިދެނީ މަޖިލިސް އިންތިހާބުންނެވެ. ވޭތުވެދިޔަ ދެ ވެރިކަމެކޭ އެއްގޮތަށް މި ސަރުކާރަށްވެސް ރައްޔިތުން ވަނީ ސުޕަ މެޖޯރިޓީ ދީފަ އެވެ.

މި މަހު 28 ގައި ހުވާކުރާ 20 ވަނަ މަޖިލީހަށް ހޮވާ ޖުމްލަ 93 މެންބަރުންގެ ތެރެއިން ސަރުކާރުން ވަނީ 75 އަށްވުރެ ގިނަ ގޮނޑި ކާމިޔާބު ކޮށްފަ އެވެ. އޭގެ ތެރޭގައި ޕީއެންސީއިން ހޮވުނު މެންބަރުންނާއި ހޮވުމަށްފަހު ޕީއެންސީއަށް ސޮއިކުރި މެންބަރުން އަދި ސަރުކާރާއެކު މަސައްކަތްކުރާ ޕާޓީތަކުގެ މެންބަރުން ހިމެނެ އެވެ.

މިއީ ފެހި ގާނޫނު އަސާސީއަށް އަމަލުކުރަން ފެށި ފަހުން ހޮވި މަޖިލިސް ތަކުގެ ތެރެއިން ސަރުކާރަކަށް އެންމެ ބޮޑު އަގުލަބިއްޔަތެއް ދިން މަޖިލީހެވެ. އިދިކޮޅު އެމްޑީޕީއަށް މި މަޖިލީހުން ލިބުނީ އެންމެ 12 ގޮނޑި އެވެ.